IRUẸMWI 5
De Emwi Ne Osanobua Mwẹ Vbe Ekhọe Nọ Gu Yi Agbọn Na?
1. Vbọzẹ ne Osanobua na yi agbọn na?
Rhunmwuda ima ne emwa nagbọn ẹre Jehova na yi agbọn na. Owa ọghomwa ẹre nọ. Rhunmwuda ọni, Osanobua ma yi okpia vbe okhuo nokaro Adam kevbe Ivi ne iran biẹlẹ ye ẹrinmwi. Osanobua yi avbe odibosa ye ẹrinmwi nẹ. (Job 38:4, 7) Nọghayayerriọ, Jehova keghi rhie okpia nokaro nọ yi ye uwe paradais, ehe ne mose na tiẹre ogba ọghe Idẹn. (Gẹnẹsis 2:15-17) E Jehova keghi kie ẹkpotọ nẹ kevbe emọ nọ gha biẹlẹ, ne iran gha sọyẹnmwẹ arrọọ vbe etẹbitẹ vbe otagbọn.—Tie Psalm 37:29; 115:16.
Vbe ẹghẹ okaro, ogba ọghe Idẹn ni ọkpa ẹre ọ gha re paradais. Okpia vbe okhuo nokaro keghi re na fonbọ na, ne iran biẹlẹ vuọn otagbọn. Vbe ne ẹghẹ ya khian, iran ghi do vẹlẹ kue otagbọn hia, a te miẹn wẹẹ iran ye ehe hia khian e paradais. (Gẹnẹsis 1:28) Ẹghẹ ọkpa i rrọọ na khian ya guọghọ otagbọn na. Owa ọghe emwa nagbọn khian gha nọ vbe ẹdẹdẹmwẹdẹ.—Tie Psalm 104:5.
Ghee vidio nọ mwẹ uhunmwuta nọ khare wẹẹ Vbọzẹe Ne Osanobua Na Yi Agbọn Na?
2. Vbọzẹ ne paradais na wii?
Adam kevbe Ivi keghi sọtẹ dae Osanobua, rhunmwuda ọni, e Jehova na ghi khulo iran kua vbe ogba ni. Erriọ e paradais ya wii. Ke ẹghẹ ni gha dee, a ma ghi miẹn ọmwa ọkpa nọ ghi sẹtin werriegbe muẹn gbọọ. E Baibol khare wẹẹ: “Osanobua mu agbọn na ne emwa dan.”—Job 9:24.—Tie Gẹnẹsis 3:23, 24.
E Jehova miamia emwamwa ne irẹn mwẹ vbe ekhọe ke otọ gha de ne emwa nagbọn nẹ ra? Hiehie! Irẹn ọre Osa ne udazi. Ẹi re ọmwa nọ gha sẹtin gbokhuẹre. (Aizaia 45:18) Ọ gha werriegbe muẹn ne emwa nagbọn, arrọọ ne irẹn mwamwa khẹ iran ke otọ gha de.—Tie Psalm 37:11, 34.
3. De vbene a khian ya werriegbe mu e paradais gbọọ hẹ?
Ẹghẹ ne Jesu khian ya suẹn gha kha zẹvbe Ọba ne Osanobua mu ye ukpo, ẹre a khian ya werriegbe muẹn e paradais gbọọ. Vbe ẹghẹ okuo na tiẹre Amagẹdọn, Jesu gha viọ avbe odibosa ọghe Osanobua ba egbe, ya guọghọ emwa hia ni gbodan ghe Osanobua. Vbe iyeke ọni, Jesu ghi mu e Setan ye eghan vbe ukpo 1,000. Emwa ọghe Osanobua gha miẹnfan rhunmwuda Jesu gha gbaroghe iran. Iran gha sọyẹnmwẹ arrọọ etẹbitẹ vbe paradais vbe otagbọn na.—Tie Arhie Maan 20:1-3; 21:3, 4.
4. De ẹghẹ ne usẹ khian ya fo?
De ẹghẹ ne Osanobua khian ya rhie ufomwẹ ye emwi dan vbe agbọn na? Jesu keghi tama ima ‘ama’ ne a khian ya rẹn wẹẹ ufomwẹ agbọn sotọ nẹ. Emwi nọ ghi sunnu vbe ẹghẹ na niạ, keghi mu arrọọ ọghe emwa nagbọn ye ikpadede, kevbe ọ vbe rhiẹre ma wẹẹ, ‘ẹghẹ ufomwẹ agbọn na ẹre ima ghi ye na.’—Tie Matiu 24:3, 7-14, 21, 22.
Vbuwe ẹghẹ ukpo 1,000 ne Jesu gha ya kha zẹvbe ọba vbe ẹrinmwi yan agbọn, ọ gha rhie ufomwẹ ye usẹ. (Aizaia 9:6, 7; 11:9) Gberra wẹẹ irẹn gha kha zẹvbe Ọba, Jesu gha ga zẹvbe ogiohẹn, kevbe wẹẹ, ọ gha wabọre rua orukhọ ọghe emwa ni hoẹmwẹ Osanobua. Nọnaghiyerriọ, Osanobua gha loo e Jesu ya wabọre rua emiamwẹ, ọmaẹn kevbe uwu.—Tie Aizaia 25:8; 33:24.
5. De aro emwa ni khian diẹya ighẹ paradais nọ de vbe odaro?
U gha sẹ Ọgua Arriọba ọghe iran, u gha miẹ emwa ni hoẹmwẹ Osanobua kevbe ni vbe hoo niran rẹn emwi niran gha ru nọ gha ye ẹko rhiẹnrhiẹn ọnrẹn
Emwa ni họn ẹmwẹ ne Osanobua gha die paradais ya. (1 Jọn 2:17) Jesu gie erhuaengbe ọghẹe, ne iran ya gualọ emwa ọmẹhẹ, kevbe niran ma iran re emwi ne iran gha ru, ne Osanobua mieke na miẹn iran yi. Vbe ẹdẹnẹrẹ, Jehova keghi mu ẹbo emwa nibun egbe khẹ arrọọ ne iran khian yin vbe paradais vbe otagbọn na. (Zefanaia 2:3) Vbe avbe Ọgua Arriọba ọghe avbe Osẹe Jehova, avbe erha emọ, iye emọ, kevbe avbe ọdọ vbe amwẹ, keghi ruẹ emwi nọ gha ye iran khian nọ rẹn enegbe sayọ vbe owa ne iran ye. Emọ kevbe evbibiemọ keghi ga vbuwe akugbe, kevbe wẹẹ, iran vbe ruẹ emwi nọ dekaẹn afiangbe niran khian miẹn vbe ne iyẹn nọma.—Tie Maika 4:1-4.
