IRUẸMWI 9
De Vbene Ẹgbẹe Ruẹ Khian Ya Gha Mwẹ Oghọghọ Hẹ?
1. Vbọzẹ ne oghọghọ ọghe ẹgbẹe na hẹnhẹn egbe yan orọnmwẹ na ru ẹse?
Obọ e Jehova ẹre ne iyẹn nọma ke de, irẹn keghi re Osa nọ mwẹ oghọghọ, ọ vbe hoo ne ẹgbẹe hia gha mwẹ oghọghọ. (1 Timoti 1:11) Irẹn ẹre ọ mu orọnmwẹ gbọọ. Oghọghọ ọghe ẹgbẹe keghi hẹnhẹn egbe yan orọnmwẹ na ru ẹse, rhunmwuda ọ kie ẹkpotọ yọ na ya koko emọ vbe odẹ ọghe egberhọkhọmwẹ. Ọ khẹke ne Ivbiotu e Kristi gha lele uhi ọghe ẹvbo niran ye, nọ dekaẹn ebe orọnmwẹ na rhie obọ yi.—Tie Luk 2:1, 4, 5.
De aro ne Osanobua ya ghe orọnmwẹ? Ọ keghi hoo ne emwamwa na gha re nọ ku okpia vbe okhuo kugbe vbe ẹdẹdẹmwẹdẹ. E Jehova hoo ne ọdọ vbe amwẹ gba ẹko egbe. (Hibru 13:4) Irẹn ma kueyọ hiehie na gha sẹ ebe orọnmwẹ rua. (Malaki 2:16) Sokpan irẹn kueyọ wẹẹ, Ivbiotu e Kristi sẹtin sẹ ebe orọnmwẹ rua adeghẹ ọkpa vbọ na fie owẹ ye oha.—Tie Matiu 19:3-6, 9.
2. De obọ nọ khẹke ne ọdọ vbe amwẹ ya gha mu egbe?
E Jehova keghi yi okpia vbe okhuo niran guobegbe vbuwe orọnmwẹ. (Gẹnẹsis 2:18) Zẹvbe uhunta ọghe ẹgbẹe, ọ keghi bi ye ọdọ izabọ nọ kpemehe ne ẹgbẹe ọre vbe odẹ ọghe ikpakpa, kevbe nọ gha ma iran emwi vbekpae Osanobua. Ọ khẹke nọ ye ekhọe hia hoẹmwẹ ọvbokhan rẹn. Ọ khẹke ne ọdọ vbe amwẹ gha mwẹ ahoẹmwọmwa kevbe ọghọ ne egbe. Ugbẹnvbe a miẹn wẹẹ, emwa ni ma gba ẹre ọdọ vbe amwẹ khin, ọ keghi re emwi kpataki niran gha ye orukhọ bọ egbe rhunmwuda, ọna gha ye iran gha mwẹ oghọghọ.—Tie Ẹfisọs 4:31, 32; 5:22-25, 33; 1 Pita 3:7.
3. Ọ khẹke nu rhunmwuda ẹzọ kpa sẹ ọmwa nu rọnmwẹ rae ra?
Adeghẹ u na gha mwẹ ọlọghọmwa vbe orọnmwẹ ruẹ, ọ khẹke ne uwa eva ye ahoẹmwọmwa sọfurre yọ. (1 Kọrinti 13:4, 5) Ẹmwẹ ọghe Osanobua ma kha wẹẹ, ne ọdọ vbe amwẹ wannọ egbe, rhunmwuda ọlọghọmwa nọ rhirhi de rre vbe orọnmwẹ.—Tie 1 Kọrinti 7:10-13.
4. De emwi nọ re ahoo ọghe Osanobua ne uwa ne emọ?
E Jehova hoo ne uwa gha mwẹ oghọghọ. Ibude nọ ghi maan sẹ nọ gha ye uwa gha mwẹ oghọghọ vbe ẹghẹ igbama ọghe uwa, ẹre ọ rhie ne uwa. Ọ hoo ne uwa miẹn ere vbe ẹwaẹn kevbe irẹnmwi ọghe evbibie uwa. (Kọlose 3:20) E Jehova vbe hoo ne uwa gha mwẹ oghọghọ nọ kẹrikian, deghẹ uwa na gha ru emwi nọ gha yọre kevbe ovbiẹre.—Tie Asan-Ibo 11:9–12:1; Matiu 19:13-15; 21:15, 16.
5. Evbibiemọ, de emwi ne uwa gha ru nọ gha ye ivbie uwa gha mwẹ oghọghọ?
Ọ khẹke ne uwa hia, ne uwa kpemehe evbare, owa na gha dia, kevbe ukpọn na gha yọ ne ivbie uwa. (1 Timoti 5:8) Sokpan ne ivbie uwa mieke na gha mwẹ oghọghọ, ọ khẹke ne uwa ma iran emwi nọ gha ye iran hoẹmwẹ Osanobua kevbe gha tie ẹmwẹ ọghẹe. (Ẹfisọs 6:4) Adeghẹ ivbuẹ na gha bẹghe ahoẹmwọmwa nu mwẹ da Osanobua, iran gha ye egbe ta ruẹ. Adeghẹ u na ye ẹmwẹ ọghe Osanobua gha dia ivbuẹ, ọ sẹtin ye iran gha mwẹ iziro nọma.—Tie Diuteronomi 6:4-7; Itan 22:6.
Ọ keghi maan ne emọ, deghẹ u na gha rhie igiọdu kevbe etian ne iran. Ọ khẹke na gha dia iran, kevbe na gha gbe iran hiẹn ọkhọ rre. Adeghẹ a na koko emọ vbe odẹ vberriọ, ọ gha lọghọ niran mwẹ obọ vbe uyinmwẹ nọ gha sie akhiẹ ye iran egbe. (Itan 22:15) Ọrheyerriọ, ọ ma khẹke nu gha dia iran vbe odẹ ọghe atosi kevbe ọkpankpan.—Tie Kọlose 3:21.
Avbe Osẹe Jehova keghi gbẹnẹ avbe ebe nibun na ru emwamwa rẹn, na ya ru iyobọ katekate nẹ evbibiemọ kevbe emọ. Avbe ebe na keghi hẹnhẹn egbe yan e Baibol.—Tie Psalm 19:7, 11.
You May Also Like
ẸGBẸE RUẸ GHA SẸTIN GHA MWẸ OGHỌGHỌ
Lele Adia Ọghe Osanobua Ne Orọnmwẹ Ruẹ Mieke Na Gha Mwẹ Oghọghọ
Orọnmwẹ ruẹ gha sẹtin gha mwẹ oghọghọ sayọ deghẹ u na nọ egbe ruẹ inọta eva kẹkan.
ẸGBẸE RUẸ GHA SẸTIN GHA MWẸ OGHỌGHỌ
Vbene A Ya Sọfurre Ye Ọlọghọmwa Hẹ
Adeghẹ u na lele adia nọ khẹke, orọnmwẹ ruẹ ghi do khian nọ wegbe kevbe ne oghọghọ ye, nọ gha te ya khian ne ghẹghẹghẹ kevbe ne orriara ye.
