Nọ ya lughaẹn ne emwa nagbọn ọvbehe, Jesu ke gha rre ẹrinmwi zẹvbe ọmwa orhiọn, a te miẹn wẹẹ a biẹ ọre vbe otagbọn na. (Jọn 8:23) Irẹn ọre evbayi nokaro ọghe Osanobua, kevbe ọ vbe ru iyobọ ne Osabobua ya yi avbe emwi nikẹre hia fẹrẹ. Irẹn ọkpa ẹre Osanobua wa ye obọ re yi, ọni ẹre ọ siẹre ne ọ na guaero, ne a na tiẹre “ukpọmọkpa” ọghe Osanobua. (Jọn 1:14) Jesu wa vbe winna zẹvbe ọmunu ọghe Osanobua, ọni ẹre ọ siẹre ne a na vbe tiẹre ‘ne ẹmwẹ.’—Tie Itan 8:22, 23, 30; Kọlose 1:15, 16.

Osanobua keghi gie ovbiẹre gha die agbọn, lekpae nọ na fi arrọọ ọghẹe werriẹ vbe ẹrinmwi, ọ na muẹn ye uwẹ akuọmọ ọghe Meri, ovbie Ju ne uvbi. Rhunmwuda ọni, Jesu i mwẹ erha ọghe ọmwa nagbọn nọ biẹ ọre. (Luk 1:30-35) Jesu ke gha die agbọn na rhunmwuda emwi eha; (1) te ọ rre do ma ima re, ẹmwata vbekpae Osanobua, (2) ọ na vbe do rrie igiemwi yotọ, nọ dekaẹn vbene a gha ya ru ahoo ọghe Osanobua hẹ, uhiẹn vbe ẹghẹ ọlọghọmwa, kevbe (3) ọ na vbe ye arrọọ ọghẹe nọ gbae ya fiohan ne ima zẹvbe ‘adẹwerriegbe.’—Tie Matiu 20:28.

Adẹwerriegbe keghi re igho na hae, na ya miẹn ọmwa fan, na ghẹ mieke na gbẹrua. (Ẹksodọs 21:29, 30) Uwu kevbe ọmaẹn ma deba emwamwa ne Osanobua gu yi emwa nagbọn. Vbe ima ya rẹn hẹ? Osanobua keghi tama Adam ne okpia nokaro ne irẹn yi wẹẹ, adeghẹ ọ na ru emwi ne Baibol tiẹre “orukhọ,” ọ gha wu.  Akpawẹ Adam ma ru orukhọ, rẹn ghẹ te wu. (Gẹnẹsis 2:16, 17; 5:5) Zẹvbe ne Baibol khare, obọ Adam ẹre uwu “la lae” emwa nagbọn egbe. Rhunmwuda ọni, orukhọ kevbe uwu nọ kẹrikian, keghi re emwi ne ivbie Adam re vbe ukhu. Ma keghi gualọ adẹwerriegbe nọ gha fan ima hiẹn imu ọghe uwu ne ima re vbe ukhu vbe obọ Adam.—Tie Rom 5:12; 6:23.

De ọmwa nọ gha sẹtin hae ne osa ne a gha ya fan ima hiẹn uwu rre? Ma gha wu, ọni ma hae osa ye orukhọ ọghe ima nẹ. Ọmwa nagbọn nọ ma gba ọkpa i rrọọ nọ gha sẹtin hae osa ye uwu ọghe emwa ọvbehe.—Tie Psalm 49:7-9.

Nọ ya lughaẹn ne ima, Jesu ke gha re ọmwa nọ gbae. Rhunmwuda ọni, ẹi re orukhọ ọghẹe ẹre ọ wu yi, ọ ma ru orukhọ rhọkpa. Nọghayayerriọ, irẹn keghi wu ye orukhọ ọghe emwa ọvbehe. Osanobua keghi rhiẹre ma ahoẹmwọmwa nọ ghi dinmwi sẹ ma emwa nagbọn, lekpae nọ na gie ovbiẹre gha de nọ do wu ne ima. Jesu vbe rhie ahoẹmwọmwa ma ima lekpae nọ na họn ẹmwẹ nẹ erhae, vbene ọ na wu ye orukhọ ọghe ima.—Tie Jọn 3:16; Rom 5:18, 19.

Ghee vidio nọ mwẹ uhunmwuta nọ khare wẹẹ Vbọzẹe Ne Jesu Na Wu?

Vbe ẹghẹ ne ọ na gha rre agbọn, Jesu mu emwa ni khuọnmwi egbe rhan, ọ huẹn emwa ni wulo kpaegbe, kevbe ọ vbe miẹn emwa fan vbuwe ẹbe. Odẹ vbe nia, ẹre irẹn ya rhiẹre ma emwi ne irẹn khian ru vbe odaro ne emwa nagbọn ni ru emwi esi. (Matiu 15:30, 31; Jọn 5:28) Vbe Jesu ghi wu nẹ, Osanobua keghi huọn rẹn kpaegbe zẹvbe ọmwa orhiọn. (1 Pita 3:18) Jesu na ghi tota ye oberhọmwa ọghe Osanobua gha khẹ, a te miẹn wẹẹ e Jehova mu ẹtin nẹ zẹvbe Ọba, nọ gha kha yan otagbọn hia. (Hibru 10:12, 13) Nia, Jesu keghi kha zẹvbe ọba vbe ẹrinmwi, kevbe wẹẹ, avbe erhuaengbe ẹre keghi ye iyẹn nọma ni wewe vbe otagbọn hia.—Tie Daniẹl 7:13, 14; Matiu 24:14.

Vbe nẹi khian kpẹ gbe, Jesu gha loo ẹtin ọghẹe zẹvbe Ọba, ya rhie ufomwẹ ye usẹ hia, kevbe emwa ni siẹre. Emwa hia ni ghi rhiẹre ma wẹẹ, iran mwẹ amuẹtinyan dae Jesu, lekpae ne iran họn ẹmwẹ nẹ, gha sọyẹnmwẹ arrọọ vbe paradais vbe otagbọn.—Tie Psalm 37:9-11.