IRUẸMWI 2
De Ọmwa Ne Osanobua Khin?
1. Vbọzẹ nọ na khẹke nima ga Osanobua?
Ne Osa ọghe ẹmwata ọre ayi ọghe emwi hia. Ọ keghi re Osa nẹi mwẹ omuhẹn, nẹi khian vbe gha mwẹ ufomwẹ. (Psalm 90:2) Obọ re ẹre ọ ke rre, ne iyẹn nọma nọ rre uwe Baibol. (1 Timoti 1:11) Ugbẹnvbe a miẹn wẹẹ, irẹn ẹre ọ rrie arrọọ ne ima, irẹn ọkpa ẹre ọ khẹke nima gha ga.—Tie Arhie Maan 4:11.
2. Vbe Osanobua ye hẹ?
Ọmwa nagbọn ọkpa i rrọọ nọ he bẹghe Osanobua ẹdẹ, rhunmwuda orhiọn ẹre irẹn khin. Nọ rhiema wẹẹ, arrọọ ọghe irẹn hiunsi sẹ ọghe evbayi na zaro bẹghe ni rre agbọn na. (Jọn 1:18; 4:24) Ọrheyerriọ, ma gha sẹtin rẹn avbe akpa ọghe Osanobua lekpae emwi nirẹn yi. Vbe igiemwi, avbe ọmerhan ughughan, kevbe avbe obobo gima rẹn vbekpae ahoẹmwọmwa kevbe ẹwaẹn ọghẹe. Ukpọlọmwẹ ọghe agbọn vbe ẹrinmwi gima rẹn vbekpae ẹtin ọghẹe.—Tie Rom 1:20.
Ma gha ruẹ sayọ vbe nọ dekaẹn akpa ọghe Osanobua lekpae na gha tie Baibol. Vbe igiemwi, e Baibol tama ima emwi nọ yẹẹ Osanobua kevbe emwi nẹi yẹẹ ọre, obọ nọ ya mu emwa, vbe nọ ya yin vbe ihẹghẹ ughughan.—Tie Psalm 103:7-10.
3. Osanobua mwẹ eni ra?
Jesu khare wẹẹ: “Erha mwa ne ọ rre ẹrinmwi: Gia ya ọghọ ne eni ruẹ nọhuanrẹn.” (Matiu 6:9) Agharhemiẹn wẹẹ Osanobua mwẹ iwaeni nibun, eni ọkpa ẹre ọ mwẹ. Odẹ ughughan ẹre dọmwadẹ urhuẹvbo ya tiẹre. Vbe urhuẹvbo ọghe Ẹdo, a keghi tiẹre “Jehova.” Sokpan emwa eso vbe tiẹre “Yahweh.”—Tie Psalm 83:18.
Eni ọghe Osanobua keghi re na rhie hiẹn e Baibol nibun rre, vbene iran na ye iwaeni vbe na ghe Enọyanmwa ra Osanobua ya rhihe ẹre. Sokpan vbe ẹghẹ na ya gbẹn e Baibol, igba 7,000 ẹre eni ọghe Osanobua ladian vbọ. Jesu gie emwa rẹn eni ọghe Jehova vbe ẹghẹ nọ ya gha ma emwa emwi vbekpae Osanobua.—Tie Jọn 17:26.
Ghee vidio nọ mwẹ uhunmwuta nọ khare wẹẹ Osanobua Mwẹ Eni Ra?
4. E Jehova gbaroghe ima ra?
Zẹvbe na ghe Erha na nọ mwẹ ahoẹmwọmwa, Osanobua keghi zẹ emwi ru, rhunmwuda umamwẹ etẹbitẹ ọghomwa
Usẹ nọ wa gba ehe hia rhiema wẹẹ Osanobua i gbaroghe ima ra? Emwa eso keghi tae wẹẹ, Osanobua ẹre ọ sie usẹ ye ima egbe nọ ya danmwẹ ima, sokpan ọna i re ẹmwata.—Tie Jems 1:13.
Osanobua keghi mu uyi ye ima egbe, vbene ọ na rhie asẹ na ya zẹ ne egbọmwa ne ima. Ẹre emwi ne ima gha gbọyẹmwẹ yi nọ wẹẹ, Osanobua fonbọre ne ima, asẹ ne ima gha ya zẹ ne egbe ima na ga irẹn ra? (Jọsua 24:15) Sokpan emwa nibun keghi zẹ niran gha ru emwa ọvbehe khọ, rhunmwuda ọni, usẹ keghi gba eha hia. E Jehova keghi khiẹ yọ vbọ ghaa bẹghe egbe agbọmwa ekueku vberriọ.—Tie Gẹnẹsis 6:5, 6.
Jehova keghi re Osa nọ gbaroghe ima. Ọ hoo ne ima sọyẹnmwẹ arrọọ. Vbe nẹi khian kpẹ gbe, ọ gha wabọre rua ighẹ usẹ kevbe emwa ni siẹre. Vbe ẹghẹ na ye na, ọ mwẹ emwi nọ siẹre kpataki, ne Osanobua na kueyọ ne usẹ gha rrọọ vbe ovbiẹghẹ kherhe. Vbe iruẹmwi nogie 8, ma gha ruẹ vbekpae nẹ emwi nọ siẹre.—Tie 2 Pita 2:9; 3:7, 13.
5. De vbene ima khian ya sikẹ Osanobua sayọ hẹ?
Jehova gie na tie ima, ne ima sikẹ irẹn lekpae na gha gu irẹn guan vbe erhunmwu. Ọ keghi mwẹ ẹmwẹ ima vbe ekhọe zẹvbe edọmwadọghọe. (Psalm 65:2; 145:18) Ọ keghi mwẹ ekhọe ayabọ. Ọ rẹnrẹn ghe ima wa hia na ye ẹko rhiẹnrhiẹn irẹn, agharhemiẹn wẹẹ, ugbẹnso ma i sẹtin musọe. Agharhemiẹn wẹẹ, emwa ni ma gba ẹre ima khin, ma gha sẹtin gele gha gu Osanobua mwẹ aguegbemuobọ ne khuankhuankhuan.—Tie Psalm 103:12-14; Jems 4:8.
Ugbẹnvbẹ a miẹn wẹẹ e Jehova rrie arrọọ ne ima nẹ, ọ khẹke nima hoẹmwẹ irẹn sẹ emwa ọvbehe. (Mak 12:30) Zẹvbe ne u ya rhiẹre ma ahoẹmwọmwa nu mwẹ nẹ Osanobua, lekpae nu gha ruẹ sayọ vbekpae irẹn, kevbe nu gha họn ẹmwẹ nẹ, u ghi do sikẹ ọre vbe etẹbitẹ.—Tie 1 Timoti 2:4; 1 Jọn 5:3.
