Ni Lilali Ubufumu bwa kwa Lesa Bukatendeka Ukuteka Isonde?
Abasambi ba kwa Yesu bamo balefwaya ukwishiba ilyo Ubufumu bwa kwa Lesa bukatendeka ukuteka. Yesu abebele ukutila te kuti beshibe ubushiku ne nshita bukatendeka ukuteka isonde. (Imilimo 1:6, 7) Na lyo line, umuku wa kubalilapo baipwishe ici cipusho, Yesu alibebele pa fyali no kulacitika ifyo abasambi bakwe bali no kwishibilako ukuti ‘ubufumu bwa kwa Lesa bwali mupepi,’ no kuti bwalatendeka ukuteka isonde.—Luka 21:31.
FINSHI YESU ALANDILE UKUTI E FYO BALI NO KWISHIBILAKO UKUTI UBUFUMU BWALATENDEKA UKUTEKA ISONDE?
Yesu atile: “Uluko lukemina uluko lumbi, no buteko bukemina ubuteko bumbi; kabili kukaba ifinkukuma ifikalamba, na mu ncende shimo shimo mukaba ifikuko ne fipowe.” (Luka 21:10, 11) Nga filya fine icifwati ca munwe cingamwafwa ukwishibilako umuntu e fyo ne fi ifilecitika fingamwafwa ukwishiba ukuti “ubufumu bwa kwa Lesa buli mupepi.” Bushe ifi Yesu alandile fyalyamba ukucitika mwi sonde lyonse? Lekeni tulande pa fya kumwenako.
1. INKONDO
Mu 1914, kwali inkondo ya calo, icintu icishabalile acicitikapo! Abasambilila ilyashi lya kale balanda ukuti iyi inkondo yalilengele ifintu ukwaluka sana. Muli iyi inkondo e mo abantu babalilepo ukubomfya ifyanso pamo nga amamotoka ayafumya amabomba, amabomba ayenda intamfu iitali, imfuti isha maka sana, sumu iyo babika mu mwela, e lyo ne fyanso fimbi ifya maka. Ilyo iyi nkondo yapwile kwaishileba nkondo ya calo iya bubili umo abantu batendeke ukubomfya amabomba ya nuclear ayakwata sana amaka. Ukutula mu 1914 lyonse kulaba inkondo mu ncende ishalekanalekana kabili abantu abengi balafwa.
2. IFINKUKUMA
Icitabo ca Britannica Academic citila, cila mwaka kulaba ifinkukuma ifikalamba nalimo 100 “ifingonaula ifintu ifingi nga nshi.” Na kabili, akabungwe ka United States Geological Survey kalandile ukuti, “Ukulingana na malipoti ya finkukuma ifibako (ukufuma nalimo mu 1900), tulingile ukwenekela ukuti cila mwaka kulingile ukuba ifinkukuma ifikalamba nalimo 16.” Bamo nalimo kuti balanda ukuti icilenga tulemona kwati ifinkukuma fileya filefulilako, ni co ino nshita kuli ifyakupangapanga ifyo bapanga bwino ifilenga baleishiba nga kwaba icinkukuma. Nampo ici ca cine nelyo iyo, icishinka ca kuti ifinkukuma ifikalamba filalenga abantu ukucula no kufwa ukucila ifyo cali kale.
3. IFIPOWE
Fimo ifilenga kwaba ifipowe ni nkondo, amafisakanwa, ubunonshi bwa calo ukubwelela pa nshi, ubulimi ukubwelela pa nshi, nelyo ukukanaipekanishisha libela ku miceele yabipa. Ulupapulo lwa ba World Food Programme ulo beta ukuti “Year in Review” ulwa mu 2018 lwalandile ukuti: “Abantu amamilioni 821 tabakwata ifya kulya fyalinga kabili abantu amamilioni 124 bena tabakwata ifya kulya nangu fimo.” Cila mwaka abana ukucila pa mamilioni yatatu balafwa ku nsala. Pa bana abafwile mu 2011 mwi sonde lyonse, mupepi na hafu bafwile ku nsala.
4. AMALWELE NE FIKUKO
Icitabo cimo ica kabungwe ka World Health Organization citila: “Ukufuma mu 2000, mu calo mulaba ifikuko ifikalamba ifingi nga nshi. Amalwele ya kale pamo nga kolela, plague na yellow fever yalibwela, kabili kwaliba na malwele yambi ayaisa pamo nga SARS, influenza, MERS, Ebola na Zika.” Nangu ca kuti pali ino nshita basayantisti na badokota balisambilila ifingi pa malwele, balifilwa ukupwisha amalwele yonse.
5. UKUBILA IMBILA NSUMA MWI SONDE LYONSE
Yesu alilandile pa lubali na lumbi ulwa cishibilo ca nshiku sha kulekelesha ilyo asobele ukuti: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:14) Nangu ca kuti mu calo muli sana amafya, abantu ukucila pa mamilioni 8, balebila imbila nsuma iya Bufumu mu fyalo 240, ukubomfya indimi ukucila pali 1,000. Ifya musango uyu tafyatala aficitikapo!
FINSHI ICI CISHIBILO CILANGILILA?
Ifyo Yesu alandilepo filecitika. Nomba mulandu nshi tulingile ukubikila amano kuli ifi filecitika? Ni co Yesu atile: “Ilyo mwamona ifi filecitika, mwishibe ukuti ubufumu bwa kwa Lesa buli mupepi.”—Luka 21:31.
Nomba line fye, Ubufumu bwa kwa Lesa bukalenga ukufwaya kwa kwa Lesa ukucitika pe sonde
Icishibilo Yesu alandilepo e lyo na Malembo yambi filatwafwa ukwishiba ukutila ubu Ubufumu bwatendeke ukuteka mu muulu mu 1914. a Muli uyu mwaka e mo Lesa abikile Umwana wakwe Yesu Kristu pa Bufumu. (Amalumbo 2:2, 4, 6-9) Nomba line Ubufumu bwa kwa Lesa bwalatendeka ukuteka isonde kabili buli no kufumyapo amabuteko ya bantu yonse, pa kuti abantu bakaleikala umuyayaya mu paradaise pe sonde nga fintu Lesa afwaya.
Nomba line fye, amashiwi yaba mwi pepo Yesu asambilishe abasambi bakwe yali no kufikilishiwa aya kuti: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Nomba finshi Ubufumu bwacita ukufuma mu 1914 ilyo bwatendeke ukuteka? Kabili finshi bukacita ilyo bukalateka isonde lyonse?
a Nga mulefwaya ukwishibilapo na fimbi pa mwaka wa 1914, belengeni isambililo 32 mu citabo citila Kuti Mwaba ne Nsansa Umuyayaya! Abalemba ici icitabo ni Nte sha kwa Yehova.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Finshi Baibolo Ilandapo pa Mwaka wa 1914?
Ubusesemo pa “inshita cinelubali” muli Daniele icipandwa 4 bulanda pa nshita ya mitekele ya buntunse iyayafya.
ULUPUNGU LWA KWA KALINDA
Bushe Yesu Atile ni Lilali Impela Ikesa?
Bushe mulamona ifishibilo ifyo Yesu alandilepo filecitika?
AMASUKO KU MEPUSHO YA MU BAIBOLO
“Finshi Twingeshibilako Inshiku sha Kulekelesha, Nelyo ‘Inshita ya Mpela’?”
Baibolo yalisobele ifintu ifingi ifyali no kulanga ukuti tuleikala mu nshiku sha kulekelesha.
