• Lesa e wamusalile. Lesa atile: “Ine ninsansabika imfumu yandi.” Kabili aebele iyi imfumu ukuti: “Pa kuti nkupeele inko shibe e bupyani bobe ne mpela she sonde shibe shobe.”—Amalumbo 2:6, 8.

• Ali no kuba impyani ya Mfumu Davidi. Baibolo itila: “Umwana natufyalilwa, umwana umwaume napeelwa kuli ifwe . . . Ukuteka kwakwe kukaba fye konse konse na ku mutende wakwe takwakabe impela, pa cipuna ca bufumu ica kwa Davidi na pa bufumu bwakwe pa kuti akabupampamike.”—Esaya 9:6, 7.

• Ali no Kufyalilwa mu Betelehemu. Baibolo yasobele ukuti: “We Betelehemu . . . muli iwe e mukafuma uukaba kateka . . . Akaba umukalamba ukufika na ku mpela sha pano isonde.”—Mika 5:2, 4.

• Abantu Bali no Kumukaana no Kumwipaya. Baibolo itila: “Alisuulilwe, kabili twalemumona uushacindama. . . . Alashiilwe pa mulandu wa filubo fyesu; aculiile pa membu shesu.”—Esaya 53:3, 5.

• Ali no Kubuuka ku Bafwa Kabili ali no Kucindikwa. Baibolo itila: “Tamwakanshe mu Nshiishi. Tamwakaleke uwa cishinka wenu ukubola mu nindi. . . . Ubusuma buli mu kuboko kwenu ukwa kulyo pe na pe.”—Amalumbo 16:10, 11.

Ni muli Yesu Kristu fye emo aya masesemo yonse yafikilishiwe. Na kuba, malaika aebele Maria nyina wa kwa Yesu ukutila: “Lesa akamupeela icipuna ca bufumu ica kwa Davidi wishi, . . . no bufumu bwakwe tabwakabe ne mpela.”—Luka 1:31-33.

Ilyo Yesu ali pe sonde tabalile aba kateka, lelo pali ino nshita ni Mfumu ya Bufumu bwa kwa Lesa ubwaba ku muulu ubukalateka abantu pe sonde. Mulandu nshi twingalandila ukuti Yesu e walinga ukuteka abantu? Natulande pa fyo alecita ilyo ali pe sonde ifilanga ukuti ni Kateka umusuma.

•   Yesu alebika amano ku bantu. Yesu aleafwa abantu ba nkulilo yonse; abaume na banakashi, abanono na bakalamba, abakankaala na bapiina kumo. (Mateo 9:36; Marko 10:16) Ku ca kumwenako ilyo umuntu uwakwete ifibashi alombele Yesu ati: “Kuti mwamposha, nga mulefwaya,” Yesu alimumfwilile uluse no kumuposha.—Marko 1:40-42.

• Yesu alesambilisha abantu ifya kucita pa kuti Lesa abatemwe. Atile: “Te kuti mubombele Lesa ne Fyuma.” Na kabili atile tulingile ukulacitila abantu ifyo twingatemwa batucitila. Ukucita ifi e kukonka ifunde beta ukuti, Ifunde lya Mulinganya. Alilandile na pa filanga ukuti Lesa tabika fye amano ku fyo tucita, lelo alabika amano na ku fyo tutontonkanya na ku fyo tumfwa. Kanshi nga tulefwaya Lesa atutemwe, tulingile ukulatontonkanya pa fintu ifisuma. (Mateo 5:28; 6:24; 7:12) Yesu alandile no kuti nga tulefwaya ukuba ne nsansa, tulingile ukwishiba no kulacita ifyo Lesa afwaya.—Luka 11:28.

• Yesu alesambilisha abantu pa kutemwa kabili alecita ifyo alesambilisha. Ifyo Yesu alesambilisha pa kutemwa ne fyo alecita fyalefika abantu pa mutima. Baibolo itila: “Amabumba yalipapile imisambilishishe yakwe; pantu alebasambilisha ngo muntu uwaba na maka.” (Mateo 7:28, 29) Asambilishe abantu ukuti: “Muletemwa abalwani benu.” Kabili alilangile ukutemwa ku balemwipaya ilyo abapepeleko ukuti: “Mwe Tata, mubabelele uluse, pantu tabeshibe ifyo balecita.”—Mateo 5:44; Luka 23:34.

Yesu e walinga ukuteka isonde pantu aleafwa abantu kabili ali ne cikuuku. Nomba ni lilali akatendeka ukuteka isonde?