Awe, tatufwile ukupepa ifilubi. Icitabo ca New Catholic Encyclopedia cilanda pa mafunde Lesa apeele abena Israele aciti: “Ukulingana na Malembo, twalisanga ukuti Abena Kristu ba cine tabalebomfya utulubi.” Tontonkanyeni pali aya amalembo ya mu Baibolo:

•   “Wilabasa icimpashanya nelyo conse icapala ica mu muulu ku muulu nelyo ica pe sonde pa nshi nelyo ica mu menshi mwi samba lya calo. Wilafikontamina nelyo ukutunkwa ukufibombela, pantu ne Yehova Lesa obe ndi Lesa uufwaya ukupepwa fye neka.” (Ukufuma 20:​4, 5) Apo Lesa afwaya ‘ukupepwa fye eka,’ tatemwa nga tulelumbanya nelyo ukupepa ifilubi, ifikope, ifipasho, ifimpashanya nelyo ifintu fimbi.

•   “Nshakapeele ubukata bwandi kuli umbi, nangu amalumbo yandi ku fimpashanya ifyabaswa.” (Esaya 42:8) Lesa tafwaya aba mupepa ukupitila mu kubomfya ifilubi. Ilyo abena Israele batampile ukupepa Lesa ukubomfya umwana wa ng’ombe, Lesa abebele ukuti balicitile “ulubembu ulwabipisha.”​—Ukufuma 32:​7-9, Easy-to-Read Version.

•   “Tatufwile ukumona ukuti Lesa aba nga golde atemwa silfere atemwa ilibwe, nge cabaswa ku bantu abacenjela mu fya kupangapanga kabili ku mano ya bantunse.” (Imilimo 17:29) Ukupusanako na bashipepa Lesa wa cine, abo ilingi line babomfya ifilubi “ifyabaswa ku bantu abacenjela mu fya kupangapanga kabili ku mano ya bantunse,” Baibolo itila Abena Kristu balingile “ukwendela mu kutetekela, te mu kumona.”​—2 Abena Korinti 5:7.

•   “Mwe twana, muletaluka ku tulubi.” (1 Yohane 5:21) Mu mafunde ayo Lesa apeele abena Israele na Bena Kristu, monse Baibolo ilanga ukuti icisambilisho ca kuti Lesa alasuminisha ukubomfya ifilubi ne fimpashanya ca bufi.