An Diyos Daw Yaon sa Gabos na Lugar?
An simbag kan Bibliya
Nahihiling nin Diyos an gabos asin kaya niyang gumibo nin ano man na bagay sain man na gustuhon niya. (Talinhaga 15:3; Hebreo 4:13) Pero, dai itinutukdo kan Bibliya na an Diyos omnipresente, na siya yaon sa gabos na lugar saka sa gabos na bagay. Imbes, itinutukdo kaiyan na siya sarong persona saka igwa siya nin lugar na iniistaran.
Kun ano an Diyos: An Diyos sarong espiritung persona. (Juan 4:24) Dai siya nahihiling kan mga tawo. (Juan 1:18) Pirming ipinapahiling kan mga bisyon sa Bibliya manungod sa Diyos na yaon siya sa sarong espesipikong lokasyon. Mayo lamang kitang mababasa sa Bibliya na nagpaparisa na yaon siya sa gabos na lugar.—Isaias 6:1, 2; Kapahayagan 4:2, 3, 8.
Kun sain nakaistar an Diyos: An Diyos nakaistar sa lugar nin mga espiritu, asin bako iyan pareho kan pisikal na mga lugar na nahihiling ta. Sa lugar na iyan, an Diyos may ‘iniistaran sa langit.’ (1 Hade 8:30, An Banal na Biblia (Paulines) May sinambit an Bibliya na sarong pagkakataon kun sain an espiritung mga linalang ‘puminaduruman sa atubangan ni Jehova,’ a na nagpaparisa na an Diyos nakaistar sa sarong espesipikong lokasyon.—Job 1:6.
Kaya daw akong tabangan nin Diyos dawa yaon lang siya sa sarong espesipikong lugar?
Iyo. Nagmamalasakit na marhay an Diyos sa lambang saro sa sato. Maski ngani nakaistar siya sa lugar nin mga espiritu, nahihiling nin Diyos an mga tawo digdi sa daga na gustong gibuhon an kabutan niya, asin tinatabangan niya sinda. (1 Hade 8:39; 2 Cronica 16:9) Pag-isipan kun paano ipinapahiling ni Jehova an saiyang pagmalasakit sa saiyang sinserong mga parasamba:
Pag namimibi ka: Dinadangog ka tulos ni Jehova sa oras na mamibi ka.—2 Cronica 18:31.
Pag namumundo ka: ‘Harani an Kagurangnan sa mga nagmumundo; iliniligtas niya an mga nawaran nin paglaom.’—Salmo 34:18, An Marahay na Bareta Biblia (Bikol Popular Version).
Pag dai mo aram kun ano an gigibuhon: Tatawan ka ni Jehova nin pakasabot asin tutukduan ka niya paagi sa saiyang Tataramon, an Bibliya.—Salmo 32:8
Salang mga paniniwala manungod sa kun hain an Diyos
Salang paniniwala: An Diyos yaon dawa sain.
An totoo: An Diyos dai nakaistar digdi sa daga ni sa iba pang lugar sa pisikal na uniberso. (1 Hade 8:27) Totoo na an ‘kamurawayan nin Diyos’ ihinahayag kan mga bituon saka kan iba pang mga linalang. (Salmo 19:1) Minsan siring, dai nakaistar an Diyos sa saiyang mga linalang kun paanong an sarong pintor dai nakaistar sa saiyang painting. Pero, may ihinahayag an painting na iyan manungod sa kaggibo kaiyan. Arog man kaiyan sa mga nahihiling tang linalang. Ipinaparisa kaiyan an “dai nahihiling na mga karakteristiko” kan Kaglalang, arog kan saiyang kapangyarihan, kadunungan, saka pagkamuot.—Roma 1:20.
Salang paniniwala: Siguradong an Diyos yaon dawa sain ta aram niya an gabos na bagay saka siya an pinakamakapangyarihan sa gabos.
An totoo: An banal na espiritu nin Diyos, o aktibong puwersa, an ginagamit niya para maisagibo an mga bagay-bagay. Paagi sa saiyang banal na espiritu, kayang aramon asin gibuhon nin Diyos an ano man na bagay, sain man na lugar, ano man na oras, dawa mayo siya diyan.—Salmo 139:7.
Salang paniniwala: Itinutukdo kan Salmo 139:8 na an Diyos yaon sa gabos na lugar. Sinasabi kaiyan: ‘Kun sumakat ako sa kalangitan, diyan yaon ka; kun sa kararuman nin bungaw, gigibuhon ko an sakuyang higdaan, uya, yaon ka diyan.’
An totoo: Bakong manungod sa lokasyon nin Diyos an sinasabi sa tekstong ini. Saro ining tula na nagtutukdo sa sato na puwede kitang tabangan nin Diyos dawa hain kita.
a Jehova an pangaran nin Diyos uyon sa Bibliya.
Puwede Mo Man Magustuhan
MAHALAGANG MGA TUKDO KAN BIBLIYA
Totoo Daw an Diyos?
Siyasaton an mga ebidensiya na tama sanang magtubod sa Diyos.
SIMBAG SA MGA HAPOT SA BIBLIYA
Ano an Banal na Espiritu?
Sinasambit sa Bibliya an banal na espiritu nin Diyos bilang an saiyang “kamot.”
MANUNGOD SAMO
Mag-request na May Magdalaw Saimo
Pag-ulayan an sarong hapot sa Bibliya, o aramon pa an manungod sa mga Saksi ni Jehova.