Ano an Pangaran nin Diyos? Sinabi mismo nin Diyos: “Ako si Jehova. Iyan an sakuyang pangaran.” (Isaias 42:8) An personal na pangaran nin Diyos naglataw nin mga 7,000 na beses sa Bibliya. Alagad, sala nanggad an ginibo sa dakul na traduksiyon nin Bibliya, rinibayan diyan an pangaran nin Diyos nin mga titulo, arog nin “Kagurangnan.” Gusto nin Diyos na magin amigo ka niya, kaya dinadagka ka niya na “mag-apod sa saiyang pangaran.”—Salmo 105:1.

Mga Titulo ni Jehova. Sa Bibliya, ginagamit an mga titulong “Diyos,” “Makakamhan sa Gabos,” “Kaglalang,” “Ama,” “Kagurangnan,” asin “Soberano” para ipanungod ki Jehova. Dakul na pamibi an  nakarekord sa Bibliya kun sain parehong inaapod si Jehova sa sarong kagalang-galang na titulo asin sa saiyang personal na pangaran na Jehova.—Daniel 9:4.

An Itsura nin Diyos. An Diyos sarong dai nahihiling na espiritu. (Juan 4:24) Sinasabi kan Bibliya na “mayo nin tawong nakahiling sa Diyos.” (Juan 1:18) Ihinahayag sa Bibliya an saiyang mga namamatian. Puwede siyang mapamundo o ‘mapaugma’ kan mga tawo.—Talinhaga 11:20; Salmo 78:40, 41.

An Magagayon na Kuwalidad nin Diyos. An Diyos mayong pinapalain na tawo, ano man an saindang nasyon asin pinaghalian. (Gibo 10:34, 35) Siya man “mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan.” (Exodo 34:6, 7) Pero, may apat na kuwalidad an Diyos na talagang kahanga-hanga.

Kapangyarihan. Dahil siya an “Diyos na Makakamhan sa Gabos,” daing limite an kapangyarihan niya para gibuhon an ano man na ipinapanuga niya.—Genesis 17:1.

Kadunungan. An kadunungan nin Diyos nakakalabi sa gabos. Huli kaiyan, sinasabi kan Bibliya na siya “iyo an solamenteng madunong.”—Roma 16:27.

Hustisya. Pirming ginigibo nin Diyos kun ano an tama. An saiyang mga gibo “perpekto,” asin “dai lamang [siya] naggigibo nin inhustisya.”—Deuteronomio 32:4.

Pagkamuot. Sinasabi kan Bibliya na “an Diyos pagkamuot.” (1 Juan 4:8) Dai sana an Diyos nagpapahiling nin pagkamuot—siya mismo an personipikasyon nin pagkamuot. An saiyang daing kapantay na pagkamuot an nasa likod kan gabos niyang ginigibo, asin nakikinabang kita diyan sa dakul na paagi.

An Pakikiamigo nin Diyos sa mga Tawo. An Diyos an satong mamumuton na Ama sa langit. (Mateo 6:9) Kun magtubod kita sa saiya, puwede niya kitang magin mga amigo. (Salmo 25:14) Sa katunayan, inaagda ka nin Diyos na rumani sa saiya sa pamibi asin na ‘ipasa mo sa saiya an gabos mong kahaditan, huli ta nagmamakulog siya sa saimo.’—1 Pedro 5:7; Santiago 4:8.

Si Jesus Bako an Diyos. Daing kaagid si Jesus—siya sana an direktang linalang nin Diyos. Iyan an rason kun taano ta inaapod siya kan Bibliya na Aki nin Diyos. (Juan 1:14) Pagkatapos lalangon si Jesus, ginamit ni Jehova an saiyang panganay bilang sarong “ekspertong trabahador” para lalangon an gabos na bagay asin an gabos na may buhay.—Talinhaga 8:30, 31; Colosas 1:15, 16.

 Dai nuarin man sinabi ni Jesu-Cristo na siya an Diyos. Imbes, ipinaliwanag niya: “Representante . . . ako [nin Diyos], asin Siya an nagsugo sa sako.” (Juan 7:29) Kan makipag-ulay siya sa saro sa mga disipulo niya, inapod ni Jesus si Jehova na “sakuyang Ama asin saindong Ama” asin “sakuyang Diyos asin saindong Diyos.” (Juan 20:17) Pagkagadan ni Jesus, binuhay siya ni Jehova sa langit asin tinawan siya nin dakulang awtoridad sa Saiyang tuong kamot.—Mateo 28:18; Gibo 2:32, 33.

Matatabangan Ka ni Jesu-Cristo na Rumani sa Diyos

Nagdigdi si Jesus sa daga para tukduan kita manungod sa saiyang Ama. Sinabi mismo ni Jehova manungod ki Jesus: “Ini an sakuyang Aki, an namumutan. Magdangog kamo sa saiya.” (Marcos 9:7) Si Jesus an mas nakakamidbid sa Diyos. Sinabi niya: “Dai nin siisay man na nakakamidbid kun siisay an Ama kundi an Aki sana asin an siisay man na gusto kan Aki na pahayagan manungod sa saiya.”—Lucas 10:22.

Perpektong naipahiling ni Jesus an mga kuwalidad nin Diyos. Naipahiling na marhay ni Jesus an mga kuwalidad kan saiyang Ama kaya nasabi niya: “An siisay man na nakahiling na sa sako nakahiling na man sa Ama.” (Juan 14:9) Irinani ni Jesus sa Diyos an mga tawo paagi sa pag-arog niya sa pagkamuot kan saiyang Ama asin ipinahiling niya iyan paagi sa tataramon asin gibo. Sinabi niya: “Ako an dalan asin an katotoohan asin an buhay. Mayo nin makakadulok sa Ama kun bakong paagi sa sako.” (Juan 14:6) Sinabi pa niya: “An tunay na mga parasamba masamba sa Ama sa espiritu asin katotoohan, huli ta sa katunayan, mga arog ninda an hinahanap kan Ama na magsamba sa saiya.” (Juan 4:23) Isip-isipa iyan! Hinahanap ni Jehova an mga tawong arog mo na gustong makaaram kan katotoohan manungod saiya.