Jue Mun 55:1-23
Ɔ ti jue tofuɛ’m be su kpɛn’n i liɛ. Kɛ bé tó’n, maan be bo miziki bolɛ ninnge nga be le ɲanman’n. Maskili* su. Davidi i jue-ɔ.
55 Ee Ɲanmiɛn, tie min srɛlɛ’n,+yɛ nán ɔ ɲin kpa srɛlɛ mɔ n srɛ ɔ kɛ a si min aunnvɔɛ’n su.*+
2 Sie ɔ su, yɛ tɛ min su.+
Sa ng’ɔ o min su’n ti’n, n ɲanman wunmiɛn lowlɛ,+yɛ min wla w’a tɔ blo,
3 ndɛ nga min kpɔfuɛ’n kan’n,ɔ nin yalɛ nga klunwifuɛ’n kle min’n ti.
Afin be yo maan ɲrɛnnɛn tɔ min su,yɛ be fa min wun ya, yɛ be kpɔ min.+
4 Min klun titi min.+
Yɛ wie’n i wun srɛ w’a kun min kpo.+
5 Srɛ’n w’a kun min kpo, n usu sa tututu,yɛ ayrɛ w’a gua min wun.
6 N se titi kɛ: “Sɛ ɔ ti kɛ n le ndɛwa kɛ auble sa’n,nn ń tú ń kɔ́ mmua, yɛ ń kó trán lika kun mɔ sa su ɲanman min lɔ’n nun,
7 nn ń tú ń kɔ́ mmua kpa,+nn ń kó trán aawlɛ flɛnnɛn’n nun lɔ,+ (Sela)
8 nn ń kɔ́ fiawlɛ kun nun ndɛndɛ,ń kɔ́ aunmuan m’ɔ fita kekle kpa’n ɔ nin nzue m’ɔ tu aunmuan’n, be wun mmua.”
9 Ee Zoova, sanngan be nun, yɛ yo maan like nga be sunnzun’n ɔ kpi ase,*+
afin n wunnin nzaje sa nin ndɛnngan klɔ’n nun.
10 Be wlanwlan klɔ’n i talɛ’m be su wia nun nin kɔnguɛ.
Klɔ’n nun ti klunwi nin ɲrɛnnɛn ngunmin.+
11 Ɲrɛnnɛn’n wo klɔ’n i lika kwlaa.
Sran yalɛ klelɛ’n ɔ nin sran lakalɛ’n be jasoman klɔ’n i gua’n su.+
12 Afin nán min kpɔfuɛ wie yɛ ɔ yo min finfin-ɔn,+sɛ ɔ ti sɔ’n, nn ń kwlá jrán kekle.
Nán min ɲrun tanndanfuɛ wie yɛ ɔ jasoli min wun-ɔn,sɛ ɔ ti sɔ’n, nn ń kwlá fíɛ i ɲrun.
13 Sanngɛ ɔ bɔbɔ mɔ a ti kɛ min sa’n* niɔn,+ɔ bɔbɔ mɔ a ti min janvuɛ mɔ n si wɔ kpa’n niɔn.+
14 E nin wɔ e ti janvuɛ kpa,e nin wɔ e nanti e kɔ Ɲanmiɛn i sua’n nun, e nin sran kpanngban yɛ e kɔ-ɔ.
15 Maan ɲrɛnnɛn tɔ be su,+blɛ mɔ be o nguan nun’n, maan be jra Ndia’n* nun lɔ,afin sa tɛ’n o be afiɛn yɛ ɔ o be nun.
16 Sanngɛ min liɛ’n, ń kpán flɛ́ Ɲanmiɛn,yɛ Zoova dé min.+
17 Nnɔsua, nin nglɛmun, nin mindi su’n, min akunndan’n ti sannganwa yɛ n kplin,*+
kpɛkun ɔ ti min nɛn’n.+
18 Ɔ́ wá dé min,* kpɛkun ɔ́ yó maan ń ɲán min ti be nga be nin min kun’n be sa nun,afin sran kpanngban be su ba min su tɔlɛ.+
19 Ɲanmiɛn wá tí, yɛ ɔ nin be wá kán.+
Kɛ ɔ fɛ i laa lele’n, i yɛ ɔ ti famiɛn bia’n su-ɔ.+ (Sela)
Be nga be sroman Ɲanmiɛn’n,+be su kplinman su kɛ bé káci.
20 Be nga be nin i tran fɔuun’n, ɔ* tɔli be su,+w’a dimɛn i aenguɛ’n su.+
21 I nuan nun ndɛ’m be ti wɛtɛɛ tra bɛli,+sanngɛ ndɛnngan’n wo i awlɛn’n nun.
I nuan nun ndɛ’m be ti mɔntɔɔn tra ngo,sanngɛ be ti kɛ tokofi mɔ b’a yi i floko’n nun’n sa.+
22 To ɔ ti su trɔ’n yi iZoova su,+yɛ ɔ́ súan ɔ bo.+
Ɔ su kplinman su le kɛ sran kpa’n ɔ tɔ.*+
23 Sanngɛ Ɲanmiɛn, á wá yó maan bé jrá kunman dan kpafuɛ’n nun.+
Sran kunfuɛ nin sran lakafuɛ’n, be su juman be nguan ɲanman’n i afiɛn bɔbɔ.+
Sanngɛ min liɛ’n, ń fá min wla ń gúa ɔ su.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “kɛ n srɛ wɔ kɛ a wa uka min’n, nán fia.”
^ Ebr., “sanngan be aniɛn’n.”
^ Annzɛ “e nin wɔ e ti kun’n.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “n kwlá tranman diin.”
^ Ebr., “Ɔ́ wá kpɔ́ min ti.”
^ I janvuɛ m’ɔ kɛnnin i ndɛ ndɛ mma 13 nin 14 nun’n niɔn.
^ Annzɛ “ɔ bo tanngan.”
