Petunjuk Terbaik na sian Bibel

PANGOLU

Molo holan mangihutton perasaanta manang pandangan ni halak hita tikki naeng manottuhon dia na sittong dohot na sala, belum tentu denggan hasilna. Dipaboa Bibel do alasanna. Jala dipaboa Bibel do muse petunjuk na terbaik na boi taihutton asa marlas ni roha jala martujuan ngolutta.

PETUNJUK NA SIAN DEBATA

Didok di Bibel, lomo do roha ni Jahowa a molo diihutton jolma petunjuk na sian Ibana. Alana dang na lao marhasil jolma molo holan mangandalhon pikkiranna sandiri. (Jeremia 10:23) Alani i ma diparade Ibana petunjuk di Bibel asa boi hita manottuhon dia na sittong dohot na sala. Dang lomo rohana gabe celaka manang gabe susa jolma ala sala mambahen keputusan. (5 Musa 5:29; 1 Johannes 4:8) Jala na paling penting ala Debata do na manoppa hita, Ibana do na paling mamboto petunjuk na songon dia do na tahaporluhon. (Psalmen 100:3; 104:24) Nang pe songon i, dang hea dipaksa Debata asa diihutton jolma petunjukna i.

Dilehon Jahowa do tu jolma na parjolo, i ma si Adam dohot si Hawa sude na dihaporluhon nasida asa boi marlas ni roha. (1 Musa 1:28, 29; 2:8, 15) Asing ni i, dilehon Ibana do muse petunjuk na sederhana na porlu diihutton nasida. Nang pe songon i, diloas Debata do nasida mamillit naeng mangihutton petunjuk i manang na dang. (1 Musa 2:9, 16, 17) Alai dialo si Adam dohot si Hawa do petunjuk ni Jahowa i jala nasida sandiri ma na manottuhon dia na sittong dohot na sala. (1 Musa 3:6) Aha ma akibatna? Gabe las do roha ni nasida ala mangihutton pikkiranna sandiri? Daong. Nungnga taida sian najolo sahat tu saonari, pasti susa do ngolu ni jolma molo dang mangihutton petunjuk ni Debata.—Parjamita 8:9.

Dipaboa do di Bibel akka petunjuk na tahaporluhon asa boi hita mambahen keputusan na denggan. Cocok do akka petunjuk i tu sude halak dang soal songon dia latar belakangna. (2 Timoteus 3:16, 17; ida ma kotak “ Bukku tu Sude Halak”.) Taida ma contohna.

Parsiajari ma muse boasa didok Bibel i “hata ni Debata”.—1 Tessalonik 2:13. Tonton ma video Ise do Pangarang ni Bibel? di jw.org/bbc.

BOASA ADONG NA SO SETUJU TU ISI NI BIBEL

Piga-piga halak mandok, dang boi Bibel mangurupi nasida lao manottuhon dia do na sittong dohot na sala.

Na didok nasida: “Maralo do isi ni Bibel i.”

Sebenarna: Olo do memang tahilala hira na maralo isi ni Bibel. Alai molo taparsiajari latar belakang ni sada ayat, kebiasaan ni akka halak di tikki i, cara marpikkir ni panuratna, dohot nandigan i disurat, gabe boi ma taboto sadalan do sebenarna sude isi ni Bibel.

Asa diboto hamu piga-piga contohna, jaha ma artikel “Apakah Isi Alkitab Saling Bertentangan?” di jw.org.

Na didok nasida: “Dang suman pangalaho ni akka halak na mangakku mangihutton isi ni Bibel. Jadi dang cocok taihutton petunjuk na sian Bibel i.”

Sebenarna: Dang boi gabe disalahon isi ni Bibel alani pangalaho ni akka halak na so mangihutton ajaran ni Bibel. Alana nungnga dipaboa hian di Bibel, godang do halak na mangakku mangihutton ajaran ni Bibel, termasuk akka pamimpin agama, na so mangulahon na nidok ni nasida. Akibatna “gabe marlea ma ajaran na sittong i”.—2 Petrus 2:1, 2.

Godang do pamimpin agama na so mangihutton isi ni Bibel. Asa boi diboto hamu contohna, jaha ma artikel “Apakah Agama Sudah Menjadi Bisnis?” di jw.org.

Na didok nasida: “Dang diargai akka halak na mangihutton isi ni Bibel halak na berbeda sian nasida.”

Sebenarna: Dijujui Bibel do hita asa mangargai halak na asing. Jala diorai do hita . . .

manganggap diritta untimbo sian na asing. —Pilippi 2:3.
dang mangargai halak na berbeda sian hita.—1 Petrus 2:17.
mamaksahon pandapotta tu halak na asing.—Mateus 10:14.

Didok di Bibel, adil do Debata jala dihaholongi Ibana do sude jolma. Jala lomo do rohana molo tatiru Ibana.—Rom 9:14.

Asa diboto hamu muse hatorangan na asing taringot i, jaha ma artikel “Aha do Artina Toleransi?” di jw.org/bbc.

DIPABOA BIBEL DO AHA NA DIPANGIDO DEBATA SIAN HITA

Dipaboa do di Bibel akka halak na songon dia do na mambahen las roha ni Jahowa, jala akka halak na songon dia do na mambahen sogo rohana. Sian i gabe boi ma taboto songon dia do pandangan ni Debata taringot na sittong dohot na sala. Jala ulaon na songon dia do na bermanfaat tu hita dohot na parohon bahaya. (Psalmen 19:7, 11) Molo taparsiajari i, boi ma hita gabe marbisuk tikki naeng mambahen keputusan di ngolutta siganup ari.

Contohna, didok do di Poda 13:20, “Gabe marbisuk do manang ise na mardongan tu halak na marbisuk, alai gabe marjea do manang ise pe na mardongan tu halak na oto.” Nang pe nungnga leleng poda on disurat, alai cocok dope tapakke prinsipna di jamanta saonari on. Jala godang nai dope prinsip na tarsurat di Bibel na marguna tu ngolutta saonari.—Ida ma kotak, “ Marlakku Dope Nasehat na Tarsurat di Bibel”.

Alai olo do ra sukkun-sukkun rohamuna, ‘Cocok dope petunjuk na sian Bibel i tu ngolutta saonari?’ Di artikel na mangihut, taida ma pengalaman ni piga-piga halak na mangihutton petunjuk na sian Bibel.

a Goar ni Debata do Jahowa.—Psalmen 83:18.

MARLAKKU DOPE NASEHAT NA TARSURAT DI BIBEL

Nang pe nungnga 2.000 taon naung salpu Bibel disurat, alai marlakku dope i tu jamanta saonari on. Alana mulai sian najolo sahat tu saonari, sarupa do keinginan ni akka jolma. Lomo do rohatta asa martujuan ngolutta jala marlas ni roha. (Parjamita 1:9) Boi do Bibel mangurupi hita asa dapotta keinginanta i.

Asa Jujur

“Lomo do rohanami asa jujur di saluhutna.”—Heber 13:18.
“Molo panakko ibana najolo, unang be manakko. Alai ringgas ma ibana mangulahon karejo na denggan.”—Epesus 4:28.

Asa Denggan Hubunganta tu Halak na Asing

“Ikkon dipikkirhon ganup halak do aha na penting di halak na asing, unang ma holan na penting di dirina sandiri na dipikkirhon.” —1 Korint 10:24.
“Toktong ma hamu sabar tu na asing, jala rade ma hamu manalpuhon hasalaan ni nasida.”—Kolosse 3:13.

Mambahen Keputusan

“Dihaporseai halak na so marpengalaman do sude hata, alai dipikkiri halak na marbisuk do ganup lakkana.”—Poda 14:15.
“Molo dibereng halak na marbisuk adong jea, martabuni do ibana.Alai anggo halak na so marpengalaman, ditorusson do dalanna gabe marjea ma ibana.”—Poda 22:3.

JOUJOU PABOAHON