1. Perkawinan

Marragam do pandangan ni halak taringot perkawinan. Jala marragam do tong pandangan ni nasida taringot boha do carana asa bahagia perkawinan ni nasida.

LAPATANNA: Debata do na parjolo sahali mambahen perkawinan di tano on. Jadi pasti diboto Ibana do songon dia carana asa boi bahagia sada perkawinan. (Markus 10:​6-9) Asa boi suami dohot istri marlas ni roha, ikkon olo do nasida mamparrohahon kebutuhan ni pasanganna. Unang ma holan mamikkirhon dirina sandiri. Molo holong do roha ni suami tu istrina, pasti disarihon ibana do kebutuhan ni istrina jala diargai ibana istrina i. Songon i ma nang istri. Ikkon didukung ibana do suamina, jala unang ma leas rohana tu suamina i.

MANFAATNA MANGIHUTTON I: Adong suami istri na margoar si Quang dohot si Thi sian Vietnam. Dang bahagia rumah tangga ni nasida. Dang diargai si Quang istrina. Didok ibana, “Dang hea hupikkiri songon dia perasaan ni istrikku jala sering do hubahen haccit rohana.” Alani i gabe naeng disirakkon si Thi ma ibana. Didok si Thi, “Dang porsea be au tu suamikku jala dang huargai be ibana.”

Ujungna marsiajar Bibel ma nasida. Diparsiajari ma songon dia carana mangulahon Epesus 5:33 di perkawinan ni nasida. Didok si Quang, “Dung hurimangi ayat i, gabe huboto ma ikkon burju do au tu istrikku jala ikkon boi do dihilala ibana na holong rohakku tu ibana. Jadi ikkon hupikkirhon do perasaanna jala ikkon husarihon do kebutuhanna. Dung hubahen songon i, gabe dihaholongi jala diargai ibana ma au.” Didok si Thi, “Ala huihutton poda di Epesus 5:33 jala huargai suamikku, gabe dihaholongi ibana ma au, dijaga, jala gabe merasa aman ma au.”

 2. Pandanganta Taringot Halak

Jotjot do halak marsogo ni roha tu halak na asing ala berbeda sukuna, bangsona, penampilanna, dohot agamana. Jala godang do halak na marsogo ni roha tu halak na homoseksual.

LAPATANNA: Dang hea dijujui Bibel hita asa marsogo ni roha tu halak ala berbeda sukuna, bangsona, manang ala homoseks nasida. Gariada dijujui do hita asa mangargai sude halak, dang soal manang aha pe sukuna, negarana, na pogos manang na mamora nasida. (Ulaon ni Apostel 10:34) Bahkan nang pe dang sarupa haporseaotta tu nasida jala dang lomo rohatta tu na diulahon nasida, ikkon tetap do hita burju jala mangargai nasida.—Mateus 7:12.

MANFAATNA MANGIHUTTON I: Sai dianggap si Daniel do akka halak na sian Asia i musu ni negarana. Alani i gabe sogo ma rohana tu sude halak Asia. Jala jotjot do diejek ibana nasida di jolo ni halak. Didok si Daniel, “Menuruthu on ma buktina na holong rohakku tu negarakku. Jadi dang sala huhilala na huulahon i.”

Dung i marsiajar Bibel ma si Daniel. Didok ibana, “Hupauba ma cara marpikkirhu. Hutiru ma cara pandang ni Debata. Molo di jolo ni Debata sarupa do sude jolma.” Saonari songon dia ma perasaan ni si Daniel molo pajuppang tu marragam halak? Didok ibana, “Dang gabe masalah be di au sian negara dia pe ni nasida. Saonari holong do rohakku tu sude jolma. Jala adong do dongan kompakku sian marragam negara.”

 3. Hepeng

Godang do halak na mangulahon manang aha pe asa boi mamora. Alana dirippu nasida, boi do i mambahen nasida marlas ni roha jala gabe denggan masa depanna.

LAPATANNA: Porlu do memang di hita hepeng, alai belum tentu gabe bahagia manang gabe denggan masa depanta holan alani godang hepengta. (Poda 18:11; 23:​4, 5) Alai molo taihutton poda ni Debata na tarsurat di Bibel, on ma na mambahen las rohatta jala gabe denggan masa depanta.—1 Timoteus 6:​17-19.

MANFAATNA MANGIHUTTON I: Saleleng ni ngoluna, holan hepeng do na dilului sahalak bawa na margoar si Cardo sian Indonesia. Didok ibana, “Boi do hutuhor sude lomo ni rohakku. Boi do au mardalani, manuhor akka barang na arga, jala manuhor piga-piga mobil dohot jabu.” Alai dang martahan hamoraonna i. Didok ibana, “Ditipu halak ma au. Holan sakkidop mata do mago sude artakki. Hape nungnga habis tikkikku martaon-taon papunguhon i, alai ujungna gabe kecewa jala mandele do au.”

Dung i diulahon si Cardo ma poda na tarsurat di Bibel taringot hepeng. Dang holan mangalului hepeng be ibana saonari. Alai dibahen ibana ma sederhana ngoluna. Didok ibana, “Nga dapottu be hamoraon na martahan salelengna ala nga jonok be hubunganku tu Debata. Saonari ganup borngin boi ma au renges modom jala puas ma huhilala.”

 4. Seks

Marragam do pandangan ni halak taringot hubungan seks.

LAPATANNA: Takkas do dipaboa di Bibel aturan taringot hubungan seks. Hata “seks na so patut” na dipaboa di ayat i, termasuk ma i mangalakkup, mangulahon seks holan lao mangalului hepeng, mangulahon seks hape dang menikah dope, bawa mangulahon seks tu bawa, borua mangulahon seks tu borua, dohot halak na mangulahon seks dohot binatang. (1 Korint 6:​9, 10) Silehon-lehon ni Debata do hubungan seks i. Alai didok Debata holan bawa dohot borua naung menikah do na boi mangulahon i.—Poda 5:​18, 19.

MANFAATNA MANGIHUTTON I: Songon on ma na didok sahalak borua na margoar si Kylie sian Australia, “Tikki dang muli dope au, hurippu do molo mangulahon seks gabe percaya diri ma au jala boi ma huhilala na dihaholongi au. Alai sebalikna do hape na huhilala. Gabe dang arga be huhilala dirikku jala hancur ma perasaanku.”

Dung i marsiajar Bibel ma si Kylie jala diihutton ibana ma na didok Bibel taringot seks. Didok ibana, “Gabe huboto ma molo taihutton petunjuk na sian Debata, boi do i melindungi hita. Jadi huulahon ma sude na nidok ni Debata. Saonari nungnga menikah be au. Boi do huhilala na dihaholongi suamikku au. Jala gabe merasa percaya diri ma au. Gabe denggan ma saonari ngolukku ala huihutton poda na adong di Bibel!”