• Dipillit Debata. “Nunga hupabangkit rajangKu . . . LehononKu ma tu Ho sude bangso, sude portibi on Ho ma nampunasa.”​—Psalmen 2:6, 8, Bibel siganup ari.

• Pinoppar ni Raja Daud. “Ai nunga tubu di hita sada posoposo dilehon tu hita sada Anak . . . Bahen hagaganda ni harajaon dohot hadameon na so marujung di habangsa ni si Daud dohot di harajaonna i.”​—Jesaya 9:5, 6.

• Tubu di Betlehem. “Ale Betlehem . . . , sian ho do haroroan ni na gabe panggomgomi . . . Timbul ma ibana disi ro di angka ujung ni tano on.”​—Mika 5:1, 3.

• Dileai halak jala diuhum mate. “Dibahen leana, jadi ndang pola hurajumi hami ibana. Hape ala ni pangalaosinta ibana tartullang, binahen ni hajahatonta ibana mabugang.”​—Jesaya 53:3, 5.

• Dipahehe sian hamatean jala dipasangap. “Diramoti do ahu sian huaso ni hamatean, jala ndang dipasombu na hinaholonganNa i di inganan ni na mate. . . . Di lambungMu gok las ni roha na mambahen ahu marolopolop salelenglelengna.”​—Psalmen 16:10, 11, Bibel siganup ari.

Holan tu Jesus Kristus do na cocok tu sude hatorangan manang perincian i. Ibana ma na cocok gabe Raja. Dipaboa sada suru-suruan do tu si Maria, omak ni Jesus, “Lehonon ni Debata Jahowa ma tu ibana habangsa ni si Daud amana i, . . . jala ndang na laho marujung Harajaonna i.”​—Lukas 1:31-33.

Memang dang hea Jesus gabe raja tikki di tano on. Alai, nungnga mamaretta ibana sian surgo di Harajaon ni Debata. Jadi, boasa ibana na cocok gabe Rajatta? Parrohahon ma aha naung diulahon Jesus tikki di tano on.

•   Holong do roha ni Jesus tu sude jolma. Diurupi Jesus do sude halak, bawa, borua, na poso nang na matua, dang soal manang ise pe nasida. (Mateus 9:36; Markus 10:16) Tikki ro sahalak na marsahit kusta mandapotton Jesus, didok ibana ma, “Molo na olo ho, boi do ahu malum bahenonmu.” Gabe asi ma roha ni Jesus jala dipamalum ma ibana.​—Markus 1:40-42.

• Diajari Jesus do hita carana pasonakkon Debata. Didok ibana, “Ndang boi hamu gabe hatoban ni Debata dohot hatoban ni Hamoraon.” Ditogihon Jesus do akka halak asa mangulahon Aturan Emas. Maksudna, molo lomo rohatta denggan bahenon ni halak tu hita, ikkon taulahon ma na sarupa tu nasida. Dipatorang Jesus do muse, dang holan aha na taulahon na diparrohahon Debata, alai dohot do diparrohahon Debata aha na adong di pikkiran dohot di bagasan rohatta. Jadi, asa boi pasonakkon Debata, ikkon tajaga do rohatta. (Mateus 5:28; 6:24; 7:12) Asa boi marlas ni roha, ikkon taparsiajari do lomo ni roha ni Debata jala taulahon ma i.​—Lukas 11:28.

• Diajari Jesus do hita asa makkaholongi na asing. Hona do tu roha ni halak, sude na dihatahon dohot na diulahon Jesus. “Longang ma natorop i mambege carana mangajari, ai sian Debata do na niajarhonna i.” (Mateus 7:28, 29) Diajarhon Jesus do tu nasida, ‘Haholongi ma musum.’ Gariada, ditangiakkon Jesus do akka halak na mambunu ibana, “Ale Amang, sesa ma dosa ni nasida, ai ndang diboto nasida na binahen ni nasida i.”​—Mateus 5:44; Lukas 23:34.

Takkas ma, Jesus do na cocok gabe Raja di tano on. Alana burju do ibana jala rade mangurupi. Alai, andigan ma Jesus mulai mamaretta?