Jesus mandok, “Marporang ma bangso tu bangso jala harajaon tu harajaon. Masa ma gempa na mansai gogo jala masa ma haraparon dohot sahit di godang inganan.” (Lukas 21:10, 11) Molo nungnga masa sude akka tanda i, on patuduhon “nunga jonok Harajaon ni Debata”. Tutu do masa akka tanda i di liat portibi on? Parrohahon ma akka bukti on.

1. PORANG

Di taon 1914, masa ma porang na so hea dope masa! Akka sejarawan mandok taon 1914, i ma sada taon na bersejarah. Alana di tikki i do parjolo sahali masa porang dunia. Godang do halak na mate alani porang on. Di porang on ma mulai dipakke akka senjata songon tank, bom na didabuhon sian pesawat, senjata mesin dohot gas beracun. Dukkon i, masa ma porang dunia paduahon. Di porang on ma parjolo hian dipakke senjata atom. Sian taon 1914, masa ma akka porang di godang inganan, jala godang do halak na mate alani i.

2. GEMPA BUMI

Britannica Academic mandok ganup taon, adong ma hira-hira 100 gempa bumi na massai gogo na mambahen “godang kerusakan”. Survei Geologi Amerika Serikat paboahon, “Menurut laporan (hira-hira sian taon 1900), adong 16 gempa bumi na massai gogo masa ganup taon.” Memang, lam denggan do alat na dibahen lao mendeteksi gempa bumi. Alai nang pe songon i, tong do godang halak na mate jala susa alani gempa bumi di liat portibi on.

 3. HARAPARON

Haraparon boi masa alani porang, korupsi, krisis ekonomi, pengaturan na so denggan di bidang pertanian, manang cuaca buruk. Menurut “Laporan Taon 2018” sian Program Pangan Dunia, “Di liat portibi on, adong 821 juta halak na hahurangan sipanganon jala adong 124 juta halak na haraparon. Ganup taon, 3,1 juta dakdanak mate alani hahurangan gizi.” Di taon 2011, hira-hira 45 persen sian sude dakdanak na mate di liat portibi on, mate alani hahurangan gizi.

4. AKKA SAHIT

Sada artikel sian Organisasi Kesehatan Dunia mandok, “Mulai abad ke 21, lam godang ma akka sahit na menular. Muncul ma muse akka sahit najolo songon kolera dohot demam kuning. Dang holan i. Adong ma akka sahit na baru songon SARS, flu na menular, MERS, Ebola dohot Zika.” Na parpudi, i ma wabah COVID-19. Nang pe lam godang na diparsiajari akka pakar dohot dokter taringot sahit i, alai dang dapot ni nasida dope ubatna.

5. ULAON MARBARITA DI LIAT PORTIBI ON

Dipaboa Jesus do tanda na asing. Didok ibana, “Baritahononhon ma barita na uli taringot tu Harajaon i di liat portibi on, asa saluhut bangso mambege barita i, dung pe i asa ro ujungna.” (Mateus 24:14) Nang pe godang hasusaan na masa di liat portibi on, alai adong lobi ualu juta halak sian marragam bangso na pasahatton barita na uli taringot Harajaon ni Debata di 240 negara. Jala marbarita do nasida di lobi sian 1.000 bahasa. Dang hea dope masa sisongon i.

Akka tanda na dilehon Jesus nungnga masa be di tikkinta saonari. Alai boasa ikkon talehon rohatta tu akka tanda i? Alana Jesus mandok, “Molo diida hamu masa sudena i, botoonmuna ma nunga jonok Harajaon ni Debata.”​—Lukas 21:31.

Sian akka tanda naung dipaboa Jesus dohot sian perhitungan waktu na adong di Bibel, taboto ma nungnga dipajongjong Debata Harajaonna di surgo di taon 1914. a Jala di tikki i ma dilantik Debata anakna, i ma Jesus Kristus gabe Raja. (Psalmen 2:2, 4, 6-9) Satokkin nai, ro nama Harajaon ni Debata tu portibi on, ripashononna ma sude pamarettaon ni jolma. Dung i, bahenon ni Debata ma tano on gabe Paradeiso lao inganan ni akka jolma salelengna.

Satokkin nai, saut ma tangiang na diajarhon Jesus tu hita na mandok, “Sai ro ma Harajaonmu. Sai saut ma lomo ni roham di tano on songon na di banua ginjang.” (Mateus 6:10) Alai aha do naung diulahon Harajaon ni Debata dung dipajongjong i di surgo taon 1914? Jala dung mamaretta Harajaon i tu sude jolma, pasu-pasu aha ma na tadapot?