Dilehon Jesus do ngoluna gabe tobusan, asa boi akka halak na marhaporseaon mandapot hangoluan. (Mateus 20:28) Didok do di Bibel, Jesus i “Sipalua ni portibi on”. (1 Johannes 4:​14) Jala didok do muse, “Holan di bagasan ibana do adong haluaon, ai dang adong goar na asing dilehon tu jolma di toru ni langit na boi paluahon hita.”​—Ulaon ni Apostel 4:​12.

 ‘Mate do Jesus humongkop sude jolma’ na porsea tu ibana. (Heber 2:9; Johannes 3:​16) Dukkon i, “dipahehe Debata do ibana sian na mate”. Naik ma ibana tu surgo. (Ulaon ni Apostel 3:​15) Gabe “boi do ibana paluahon sude jolma na pajonokkon dirina tu Debata marhite ibana. Ala mangolu do ibana saleleng ni lelengna, gabe boi ma ibana mambahen pangidoan tu Debata taringot tu nasida”.​—Heber 7:​25.

Boasa ikkon Jesus na mangido tu Debata asa dipalua hita?

 Jolma na mardosa do hita sude. (Rom 3:​23) Dosa i do na mangambati hita asa jonok tu Debata. Jala alani dosa do mate hita. (Rom 6:​23) Alai, diurupi Jesus do akka halak na porsea tu tobusan. (1 Johannes 2:1) Dilehon do dirina gabe tobusan. Alani i, boi ma dipangido ibana tu Debata asa ditangihon tangiang ni akka halak na porsea i, jala disalpuhon dosa ni nasida. (Mateus 1:​21; Rom 8:​34) Ditangihon Debata do pangidoanna i. Alana, sadalan do pangidoanna i tu lomo ni roha ni Debata. Jadi, disuru Debata do Jesus tu tano on “asa malua do portibi on marhite ibana”.​—Johannes 3:​17.

Cukup do holan porsea tu Jesus asa boi malua?

 Dang. Dang cukup holan porsea tu Jesus asa boi malua. Adong do na ikkon taulahon. (Ulaon ni Apostel 16:30, 31) Didok di Bibel, “Mate do daging molo so adong hosa, songon i ma mate do haporseaon molo so adong parniulaon.” (Jakobus 2:​26) Jadi asa malua, hita ikkon:

•   Mananda Jesus dohot Amana, i ma Jahowa.​—Johannes 17:3.

•   Porsea tu nasida.​—Johannes 12:44; 14:1.

•   Mangulahon paretta ni nasida. (Lukas 6:​46; 1 Johannes 2:​17) Didok Jesus do dang sude halak na manjou ibana “Tuan” boi malua. Alai “holan na mangulahon lomo ni roha ni Damang na di banua ginjang i do” na boi malua.​—Mateus 7:​21.

•   Toktong porsea nang pe adong sitaonon. Didok Jesus, “Paluaonna do na manahan ro di ujungna.”​—Mateus 24:13.