Yésu a ntoñol i mam u nlama boñ inyu yila Mbôgi Yéhôva, di nléba mo i kaat Matéô 28:19, 20. Nlôñ kaat u, u ñunda mam mut a nlama boñ inyu yila nnigil Yésu, hala wee i pot tole i bok mbôgi inyu Yéhôva.

 Jam 1: Nigil Bibel. Yésu a bi kal banigil bé le ba ‘yilha bôt bape banigil . . ., ba niigaga bo.’ (Matéô 28:19, 20) I buk ba nkobol hana le “nnigil” i nkobla le ‘nwet a nigil.’ Bibel, téntén biniigana bi Yésu bi bi yé mukété, i gwé biniigana u gwé ngôñ inyu bana niñ ilam ni i maséé. (2 Timôtéô 3:​16, 17) Di yé maséé i hôla we i nigil Bibel ni njel gwigil bi Bibel di mboñ yañga i mambai ma bôt.​—Matéô 10:​7, 8; 1 Tésalônika 2:​13.

 Jam 2: Bii mam u nigil i bisélél. Yésu a bi kal le i bet ba nigil, ba nlama yak “tééda mam momasôna a bi kal.” (Matéô 28:20) Hala a nkobla le yigil yoñ i Bibel i nlama bé ndigi ba inyu yônôs boña ni mam​​—ndi i nlama tinde we i lona mahéñha ikété mahoñol moñ ni ikété maboñog moñ. (Minson mi baôma 10:42; Efésô 4:​22-​29; Lôk Héber 10:24, 25) I bet ba noñ mambén ma Yésu ba gwé makénd i yoñ makidik map bomede i ti niñ yap nkikip yak Yéhôva Djob.​—Matéô 16:24.

 Jam 3: Kôs sôble. (Matéô 28:19) Bibel i hégha sôble ni majôna. (Béñge Rôma 6:​2-4.) Sôble i yé wengoñle u njô nlômbi woñ niñ, ndi u bôdôl i mondo. Sôble yoñ i yé inyu unda i mbamba le u nyônôs mam ma bisu ima Yésu a mpôdôl, ni le u yé bat Djob le a ti we kiññem i mpôp.​—Lôk Héber 9:​14; 1 Pétrô 3:​21.

 Kwel ni mimañ mi likoda. Ba ga emble we inyu béñge ibale u nok kii i kôs sôble i nkobla, ibale u mbii mam u nigil i bisélél, ni ibale u nti wemede nkikip yak Djob ibabé le mut a nyéksa we.​​—Minson mi baôma 20:28; 1 Pétrô 5:​1-3.

 Ñ. Di néñés bon bés “ikété maéba ma Nwet” le Yéhôva, kiki Bibel i niiga. (Efésô 6:4) Ndi, kiki ba nañ, bomede bon ba nlama yoñ makidik i nigil, neebe, ni bii biniigana bi Bibel i bibôñôl ilole ba nkôs sôble. (Rôma 12:2) Sôk i nsôk, hiki mut nyen a nlama pohol base yé.​​—Rôma 14:12; Galatia 6:5.