Mbôgi Yéhôva i ntégbaha makoda map hiki sonde ngélé iba, i bahoma ba bibégés di nsébél le Mandap ma Ane (Salles du Royaume). Kii i ntagbe i Ndap Ane? Umbe nseñ u nla ôt i lo i makoda més??

•  Kii i ntagbe i Ndap Ane?

•  Inyuki u nlama lo makoda?

•  I jam bisega gwoñ bi nkal

 Ndap Ane i yé homa bibégés het bôt ba nigil i niñ inoñnaga ni matiñ ma Bibel. Makoda ma ntagbe mu ma nla hôla we:

•   i yi maliga inyu Djob.

•   i tibil nok ndoñi i mam ma mbôña munu ngéda yés.

•   i lémés libak joñ ni bilem gwoñ.

•    i léba bañga mawanda.

 Baa u yik hala? Bahoma Mbôgi Yéhôva i nkodba ba nséblana le “Ndap Ane” inyule minkwel mi mi nkwélana mu mi mbéna pôdôl Ane Djob.—Matéô 6:9, 10; 24:14; Lukas 4:43.

 Biniigana di nkôs mu bi ga hôla we. Mu makoda ma Mbôgi Yéhôva, di nwan matiñ ma Bibel ma ma ga hôla we i “yéñ pék” ni i kôhna yo. (Bingéngén 4:5) Hala a nkobla le Bibel i nla toi hôla we i yoñ makidik malam mu niñ yoñ. I nhôla ki we i timbhe mambadga makeñi ma niñ, kiki bo:

•   Inyuki di niñ?

•   Baa Djob nyen a yé njom i mandutu més?

•   Kii i ntagbe i mbus nyemb?

 I makoda més ma mamélél ma sonde, di ñemble minkwel mi Bibel, kiki bo:

•   Inyuki di nlama nwas le Bibel i éga bés?

•   Hee u nla kôhna mahôla i ngéda ndutu?

•   Kii Ane Djob i mboñ inyu yés i len ini.

 “Liwanda jem jada li suklu li bi lo likoda jés jada. A yén ni lihaa jem, di hôlga nye i noñ yigil mu bikaat gwés bi yigil. I mbus likoda, a kal me le mandimbhe bôt ba tinak mu pes yigil i mambadga ni mandimbhe, ma ntihba nye ngandak. A kônde ki le base yé i gwé bé jôga li bikaat bi yigil Bibel kiki bés.”—Brenda.

 Baa u yik hala? I Ndap Ane, biyééne gwobisô bi yé kunde inyu bôt bobasô, to njañgi yo ki yo i mbéda bé.

 Bilôñ bilam bi ga lédés we. Bibel i nkal le njom yada i makoda més i yé le “di tina makénd bés ni bés.” (Lôk Héber 10:24, 25) I ba lôñ yada ni bôt ba mbii gwéñe bi Djob ni bi bôt bape i bisu bi gwéñe gwap, hala a hôgbaha ñem, téntén munu nkoñ ’isi unu, u u yé nyonok ni bôt ba ntôñ ndik bomede.

 “I mbus ngim kel bôlô, me mbéna nimis maséé mem inyu ngandak waa, ndi i bôt me boma i Ndap Ane ba nhôla me hiki ngéda i témbna ngui. Kayéle i mahuu mem, i mbus likoda, me yé maséé ni nkôôbaga inyu hilo hi noñ.”—Elisa.

 Baa u yik hala? Makoda ma Mbôgi Yéhôva ni nkoñ ’isi wonsôna ma nloo 120 000, bahoma ba bibégés het ba nkodba ba nloo 60 000. Hiki nwii, di ñoñ bebee le 1 500 i Mandap ma Ane inyu leege i ngandak bôt i nkôndba mu nsoñgi u balo i makoda més. a