Inyule di nok ndutu ngéda biloñge bi bôt bi mboma mandutu. Jon mut nye kiki nye a ga bana bé ngôñ i boñ loñge tiga le a nok ndutu.

Bôt bahogi ba nhoñol le bikuu bi mpémél bôt inyule Djob nyen a bi téé hala. Ba nkal le Djob a nkogse bôt inyule ba mboñ bibéba bi mam. Bape ba nhoñol le Djob a mboñ le biloñge bi bôt bi nok ndutu inyu noode bo. Ba nkal le “hisi hini hi yé hisi hi manoodana” ni le Djob a nkônde bagwélél bé mandutu. Ndi . . .

• Ibale Djob nyen a bi téé le di nok ndutu, hala a ta bé nseñ i boñ biliya inyu ba mbôô ni inyu keñgle mam mabe.

• Baa Djob a ngwélél mandutu inyu noode bôt, i nlélém ngéda a bak Djob li loñge ñem ni li konañgoo?

  INYU KÔHNA BINIIGANA BIPE

  Béñge vidéô i gwé ño le Inyuki Djob a nwas mandutu? i jw.org.

Djob a nkogse bé bôt ni njel mandutu.

Maselna ni hala, bôt ba mbéna nok ndutu inyule ba yé i béba homa i béba ngéda.

“Pééna ngwéé i tane bé inyu bikwele bi bôt, to gwét inyu mimpémba mi bôt, to koga i tane bé inyu bôt ba pék, to lingwañ inyu ba ba ntibil yi, to karis ki inyu bôt ba likeñge; ndi ngéda ni mpuhge ngéda ba mpémél bôt boba- sôna.”​—ÑAÑAL 9:11.

Di nok ndutu inyule di yé bikwéha bi bôt.

Bôt ba mbéna gwélél buk ini le “béba” inyu pôdôl jam libe mut a mboñ. Ndi yak Bibel i ngwélél buk i inyu pôdôl libak li kwéha bôt ba binam bobasôna ba bi kôdôl.

“Me bi gwééne ikété béba; ikété béba nyen ini a nembene me.”​—TJÉMBI 51:7.

I béba bôt ba binam ba bi kôdôl i nlona bo bikuu.

I béba i, i bi ôbôs ndik bé maada més ni Djob, ndi i bi bagal yak bés ni bini bihégél bi Djob bipe. Hala a bi lona ndutu ngandak inyu bôt ba binam bobasôna.

“I ngéda me nsômbôl boñ jam li téé sép, i jam li yé béba jon li yé ikété yem.”​—RÔMA 7:21.

“Mam momasôna ma bi héga ma nwaa bé tjelel to nok njôghe lôñ.”​—RÔMA 8:22.