Hégda le jam lini: Karen a yé i ngand hala a yé ngi to pam jôm li manut. Ha nyen a nok kiñ i mut a nyi i mbus yé.

Karen a nhielba, a tehe liwanda jé Jésika a gwé bipôs biba a ntip yibil. A nyi yaga le maok ma. Jésika a yé ti Karen pôs yada, a kalak le: “Me nhoñol le u ta bé mañge ngandak inyu tégbaha loñge ngéda nga?”

Karen a nsômbôl tjél, ndi Jésika a yé liwanda jé. Ni le Karen a nsômbôl bé le liwanda jé li hoñol le a yé mboye mañge wanda. U héa hala, Jésika a yé mañge wanda nu a gwé bilem bilam. Ibale nye a yé nyo, wee hala a ta bé béba. Karen a yé hoñol ikété ñem wé le: ‘Ngo a yé ndik ndék yom i nyo, a ta bé wengoñle di yé ôt bañga.’

Ibale wen u bak Karen, ki w’a boñ lelaa?

Inyu yoñ makidik malam munu jam lini, u nlama yi umbe ntén mut u yé. I yi umbe ntén mut u yé i nkobla le u yi njee u yé, ni mambe mam u ngwés ngandak. Ngéda u gwé i yi i, u gwé ngui i kena niñ yoñ kiki u ngwés, iloole u nwas le bôt bape bon ba kit inyu yoñ.—1 Korintô 9:26, 27.

Lelaa u nla sal inyu bana ntén ngui u? Inyu bôdôl, timbhe mana mambadga.

I yi ngap yoñ (tole ngui yoñ) ni bilem bilam u gwé, i nla kônde ti we ngui ni makénd.

HIHÉGA HI BIBEL: Ñôma Paul a bi toñol le, to ibale a yé mut nu a nyi bé hop, hala a nkobla bé le a yé mut nu a gwé bé yi. (2 Korintô 11:6) Ni ngandak yi i Bitilna a bééna, ñôma Paul a bi la telbene mu makidik mé, to ngéda bape ba bé noode nye. A bi nwas bé le bibuk bibe bi bôt bape bi tômbôs nye mu makénd mé.—2 Korintô 10:10; 11:5.

WAN WEMEDE: Tila ngap yada tole lem yada i tôbôtôbô u gwé.

Nano toñol bañga lem lam yada u gwé. (Kii héga, baa u ntôñ bôt? Baa u yé mut a nkap? Baa u yé mut ba mbôdôl ñem? Baa u yé mut a noñ ngeñ?)

Ibale litôi li môô li ntihba mbot, hala nkobla bé le i mbot i, i gwé ha bé mahee. Nlélém jam inyu yoñ. Ibale u nlôôha bok mis ngii bibomb gwoñ, hala a nla tinde we i pala hoñol le u gwé ha bé mahee.

HIHÉGA HI BIBEL: Ñôma Paul a bé yi bibomb gwé. Jon a bi tila le a ngwés mbén i Djob, ndi a ntehe mbén ipe ikété nyuu yé, i i njôs mahoñol mé, i gwelek ki nye, le a ba i si mbén i béba, i i yé ikété nyuu yé.—Rôma 7:22, 23.

WAN WEMEDE: Imbe bomb u nlama boñ biliya le u jôs?

Baa u ga jôp ikété ngim litôa, u bat nluk matôa le a kiiña i nlélém homa letee le belesin gwé bi mal? Ngo njék i—hala a ga yoñ ki ngandak moni!

Hala a niiga kii bés? I bana mam u nyéñ boñ, i nhôla we i tibil kena niñ yoñ, i nkéñ ki we njel i ba wengoñle u yé kiiña i nlélém homa. U ñunda le u gwé homa u nyéñ ke, u bak ki nkôôbaga inyule u nyi lelaa u nlama boñ inyu bol nyoo.

HIHÉGA HI BIBEL: Ñôma Paul a bi tila le: “Me me mpééna ni ngwéé hala, ndi ha lumdalumda bé.” (1 Korintô 9:26) Iloole a nwas le niñ yé i ndéñgés nye, Paul a bééna mam a bé yéñ yônôs, a boñok ki biliya inyu yônôs mam ma.—Filipi 3:12-14.

WAN WEMEDE: Tila mam maa u nyéñ yônôs mu ñwii u u nlo.

Ibale u nyi bé mam u ndiihe (tole mam u ngwés ngandak), w’a la bé telbene mu makidik moñ. Kiki yôñgôô u u nhéñha minsonol nwé (tole nuga i i nhéñha kôgôô yé) hiki ngéda, hala nyen w’a héñha libak joñ tole bilem gwoñ, inyu kôna bisega gwoñ—hala a ñunda yaga le wemede u gwé bé joñ libak.

Ndi, ngéda maboñog moñ ma umne ngii mam u ndiihe toi, u ntééda libak joñ—ibabé tôñ inyu mam bôt bape ba mboñ

HIHÉGA HI BIBEL: Ngéda a bé a ngi yii mañge wanda, mpôdôl Daniel “a ôm siñ ikété ñem wé” le a ga nôgôl mbén Djob, to hala kiki a bé mbaglak ni lihaa jé. (Daniel 1:8) Mu kiki a bé boñ hala, a bi tééda toi libak jé. Daniel a bé niñ inoñnaga ni mam a bé diihe toi.

WAN WEMEDE: Mambe mam u ndiihe toi? Kiki héga: Baa u nhémle le Djob a yé? Ibale hala, inyuki? Mambe mam ma nkwés we nkaa le Djob a yé?

Baa u nhémle le matiñ ma Djob ma yé inyu loñge yoñ? Ibale ñ, inyuki?

Sôk i nsôk, njee w’a pôôna? Baa w’a ba kiki minkôt mi tjai, mi mi nkwo isi ngéda man mbebi a nhôñ, tole w’a ba kiki e i i nyégle bitétéé yak ngéda mbuk mbebi a nhôñ? Yidis libak joñ, ndi w’a ba kiki e i. Hala a ga hôla ki we i ti ndimbhe i mbadga ini le, Umbe ntén mut me yé?