Hégda le jam lini: Alex a yé nhelek. Niñ yé yosôna, a bi hémle le Djob a yé, ni le nyen a bi heg mam momasôna. Ndi i len ini, malét wé njôôñ yi a yé kal le mam momasôna ma bi lo ndigi ni momede, ni le bini biniigana bi yé maliga inyule bi niñne i ngii nyiña bôt ba njôôñ yi ba bi boñ. Alex a nsômbôl bé nene kiki jôñ mut. A nkal mu ñem wé le: “Ibale bôt ba njôôñ yi ba nhémle le mam momasôna ma bi lo ndigi ni momede, ba kalak le hala a yé maliga, me me yé njee inyu pééna jam li?”

Ibale wen u bak Alex, baa ki u neebe le mam momasôna ma bi lo ni momede ndigi inyule bikaat bikeñi bi nkal le hala yé maliga?

Pééna i mbéna ba ipôla bôt ba nhémle le mam ma bi lo ndigi hala, ni ba ba nhémle le mam ma bi héga. Ndi bôt ba bini bipes gwo biba, ba mbéna bé toñol jam ba nhémle, ni inyuki ba nhémle jo.

• Bôt bape ba nhémle le mam ba bi héga, ndik inyule ba bi niiga bo hala i ndap base.

• Bôt bahogi ba nhémle le mam ma bi lo ni momede, inyule ba bi niiga bo hala i suklu.

Bibel i nkal le: “Inyule hi ndap ni ndap i ñôña ni mut, ndi Nyambe nyen a oñ mam momasôna.” (Lôk Héber 3:4) Baa i yé ndutu i hémle bibuk bi?

BA NKAL LE: Mam momasôna i ngii ni isi, ma bi lo ndik hala ngélé yada.

BA NKAL LE: Bôt ba binam ba nlôl ni binuga.

BA NKAL LE: Biniigana le mam momasôna ma bi lo ndik hala, bi yé maliga.

“Ibale u yé hiôm ikété lipan ndi u tehe loñge man ndap, baa w’a kal le: ‘Kinje loñge ndap! Bie bi nkwo hana, bi yila mabam, ndi bi sôk bi yila nunu loñge man ndap.’ Hala a nla bé ba maliga! To nôôga, hala a nôôga bé. Inyuki di nlama ni hémle le mam momasôna i ngii ni isi, ma bi lo ndik hala?”—Yulia.

“Hégda le ba nkal we le ngim homa bôlô het ba mpémés bikaat a nyoñ hié. I mbus, ini ndap i lôs, kayéle pén ni mabap ma ndap momasôna ma pôdna, ma sôk yila loñge soso kaat ngobol i bibuk. Baa w’a hémle nya jam i?”—Gwen.

Bibel i nti bés makénd i gwélél ‘pék yés.’ (Rôma 12:1, MN) Hala nkobla le u nlama bé hémle le Djob a yé inyule

• HALA A YÉ NDIK JAM U NHOÑOL (Me nôgda ndik le mut numpe nu a nlel mut binam ngui, a niñ ngim homa)

• U GWÉ NGÔÑ I LÉMÉL BÔT BAPE (Me bi néñél ipôla bôt ba ba nhémle Djob)

• BÔT BAPE BON BA NTINDE WE I HÉMLE JAM LI (Bagwal bem ba bi niiga me le Djob a yé—jon yak me nhémle hala)

Ndi u nlama bana ngim manjom, i i ntinde wemede i hémle le Djob a yé.

“Ngéda me yé ndap suklu, me emblege malét a ntoñol lelaa bijô gwés bi nyuu bi nsal, me yé me ba nkoog nkaa mukété yem ñem le, ni mbale, Djob a yé. Inyule yak ngéda di nyimbe bé hala, hiki jô i nyuu yés, to ibale i yé isii lelaa, i nsal bôlô i tôbôtôbô. Hala a yé toi mbale le nyuu i mut binam i yé jam li mbuma ñañ!”—Térésa.

“Ngéda me ntehe ndap ngii i i yé keñi, soso sitima (soso môñgô), tole litôa, me mbadba le: ‘Njee a bi boñ gwom bini?’ Inyu boñ le ba bañ litôa, hala a nyoñ bôt ba pék ngéda, inyule ba nlama kot ngandak disii di gwom, bi bi nlama sal ntôñ kayéle litôa li la ke. Ndi ibale i mbéda i ba mut pék inyu bañ litôa, bôô ni ngélé yañen inyu heg mut binam.”—Richard.

“Kiki me nkônde nigil njôôñ yi, hala nyen me nkônde tehe le biniigana le mam ma bi lo ndik hala bi gwé ha bé ngui i mis mem. . . . Inyu yem, i mbéda ngandak ‘hémle’ inyu neebe le mam ma bi lo ndik ni momede, iloo kiki i mbéda hémle inyu neebe le Nheg a yé.”—Antôni.

To hala kiki ba ntégbaha ngandak ñwii i nyiña, bôt ba njôôñ yi ba yé ngi tibil toñol lelaa mam momasôna ma bi lo ndik hala, bobasôna ba gwé bé to nyo wada mu biniigana bi. Ibale bôt ba njôôñ yi bobasôna ba nôgla bé munu biniigana bini le mam momasôna ma bi lo ni momede—ki le bon ba yé bayi mam—baa yak we u gwé bé kunde i pééna biniigana bi?