Suma jaqenakan tʼaqesiñapajj janiw wakiskiti. Jupanakar tʼaqesir uñjasajja, inas maynejj suma luräwinak lurañajj inamayawa sasin amuychispa.

Yaqhep jaqenakajj jiwjjasin yaqha cuerponsa maynejj mayamp jakkaspa ukhamwa creyipjje, mä arunjja jiwjjasin maynejj kutin kutinsa naskaspa ukhamwa amuyapjje. Jiwasatï suma luräwinak jichha tiempon lurañäni ukhajja, mayamp naskañäni ukhajj wali sumaw jakasiñäni, ukampis jan walinak lurañäni ukhajja, walja jan walinakanwa uñjasiñäni sasaw amuyapjjaraki. Akham jisktʼasim:

• Taqe kunas destinorjamäspa ukhajja, ¿sum jakasiñasa jan walinak jan lurañas kunatakis servispa?

• Diosajj munasiri ukat khuyapayasir Diosawa sasaw waljanejj sapjje, ukhamajj ¿cheqapunit jaqenakar yantʼanakar puriyas jan sinttʼasis tʼaqesiyaspa?

  JUKʼAMP YATJJATAÑATAKEJJA

  ¿Kunatsa Diosajj tʼaqesiñanak jan chhaqtaykpacha? sat video Internetan jw.org cheqar mantasaw uñtasma.

Tʼaqesiñanakajj janiw Diosan castigopäkiti

Awisajj mä akatjamatwa kunas pasaspa, inas jan wali cheqana ukat jan wali horasan jikjjatassna.

“Tʼijuñanjja janiw wali tʼijurinakapuniti atiptʼapkejja, jan ajjsaririnakapunisa nuwasïwina atipjapkejja; janiw yatiñanïpki ukanakapuniti tʼantʼanïpkejja, chʼikhinakapuniti qamirïpkejja, suma yatichatanakapunisa suma katoqatäpkejja; jan ukasti horasajj jan waltʼañajj taqeniruw [akatjamat] puri” (ECLESIASTÉS 9:11).

Juchar purtʼasirïtas laykuw tʼaqestanjja

Jaqenakajja, jan wali luratanakat parlañatakiw jucha aru apnaqapjje. Bibliajja suma jaqenakana, jan wali jaqenakan pantjasirïpjjatapat parlañatakiw uka aru apnaqaraki, juchjja Adanampi Evampitwa katoqawaytanjja.

“Nayajj yuritajjatpach juchan muyuntatätwa; taykajjan purakapatpach juchanïtwa” (SALMO 51:5).

Juchajja taqe jaqenakaruw jan waltʼayawayi

Janiw Diosamp sum apasiñaruk jarkʼkiti, jan ukasti kunanaktï Diosajj lurawayki ukanakamp jan sum apasiñsa jarkʼarakiwa, mä arunjja jiwasjam jaqenakampi ukat kunanakatï jiwas jakʼanakan utjki ukanakamp sum apasiñwa jarkʼi. Ukaw walja tʼaqesiñanak utjayawayi, janirakiw khitis ukat qhespiyaskaspati.

“Kunatï walïki uk lurañ nayajj munkta ukhajja, kunatï jan walïki ukaw nayamp chikäski” (ROMANOS 7:21).

“Diosan taqe luratanakapajj taqpachaniw jachasipki, taqpachanirakiw jichhakamajj wal tʼaqesisipki” (ROMANOS 8:22).