1 ¿Diosat tʼaqesitanakasat juchanïpacha?
¿Kunatsa ukham jisktʼasiñasajj wali wakiskiri?
Diosaw tʼaqesiyistu sasin amuyasaw walja jaqenakajj Diosar jan serviñ munjjapjjeti.
Aka toqet amuytʼam
Walja religionanakan pʼeqtʼirinakapajja, Diosas tʼaqesiñanak utjaykaspa ukhamwa nayratpachas yatichawayapjje. Sañäni, yaqhepanakajj akham sapjjewa:
-
Aka oraqen utjki uka jan waltʼäwinakajj Diosan castigopawa.
-
Diosajj angelitonakwa alajjpachan muni, ukatwa wawanakajj jiwapjje.
-
Jachʼa guerranakanjja Diosaw nuwasiñan yanapi.
Ukampis ¿kuntï religionanakan pʼeqtʼirinakapajj Diosat yatichapki ukajj janit kʼarïkpacha? ¿Diosajj janit jupanakar jan walit uñjkpacha?
JUKʼAMP YATJJATAÑATAKEJJA
¿Kunatsa Bibliat yatjjatañama? sat video Internetan jw.org cheqar mantasaw uñtasma.
Bibliajj akham siwa
Diosajj janiw tʼaqesiñanak utjaykiti
Jupatï cheqapun tʼaqesiyistaspa ukhajja, Bibliajj kunjam Diosaw siskitï ukajj janis cheqäkaspa ukhamäspawa. Bibliajj Diosat akham siwa:
“Luräwipasa cheqaparakiwa [...]. Jupasti cheqapa Diosawa” (DEUTERONOMIO 32:4).
“¡Taqe chʼamani Diosajj janiw kuna jan walsa lurkaspati, janirakiw kunatejj jan cheqapäki uksa lurkaspati!” (JOB 34:10).
“Taqe chʼamani Diosajja, janiw kuna ñanqhsa, kunatejj jan cheqapäki uksa lurkiti” (JOB 34:12).
Diosajj kawkïr religionanakatï Jupat kʼarinak yatichapki ukanakarojj janiw katoqkiti
Sañäni, kawkïr religionanakatï Diosaw tʼaqesiñanak utjayi sasin yatichapki ukat guerranakaru jaqe jiwayañanakar apoyapki ukanakarojja, Diosajj janiw katoqkiti.
“Profetanakajj nayan sutejjaru sasipkchejja, ukapachajj kʼarisipjjewa. Janiw nayajj jupanakaru khitankti, janiw kuna arojjsa churkaraktti, ni jupanakarojj kunsa siskaraktti. Ukanakajj kʼari yatiyäwinakakiwa, kʼari uñjäwinakak parlapjjaraki, jupanakan amtatanakaparu parlapjjatapakiwa” (JEREMÍAS 14:14).
Jesusajja kʼari chuyman religión pʼeqtʼirinakarojj juchañchänwa
“Janiw taqe khitinakatï ‘Tatay, Tatay’ sasin sapkitu ukanakajj alajjpachankir Reinorojj mantapkaniti, jan ukasti taqe khitinakatï alajjpachankir Awkijan munañap lurapki ukanakakiw mantapjjani. Khä urunjja waljaniw akham sapjjetani: ‘Tatay, Tatay, ¿janit profecianak sutimjjar arsupktjja, janit demonionaksa sutimjjar alissupkaraktjja, janit walja milagronaksa sutimjjar lurapkaraktjja?’ sasa. Nayajj jupanakarojj akham säwa: ‘¡Janipuniw jumanakar uñtʼapksmati! ¡Nayat jitheqtapjjeta, jan walinak lurir jaqenaka!’ sasa” (MATEO 7:21-23).