Uka jisktʼan qhanañchäwipajja, jakäwisar kunjamsa uñjasktan uk amuyañatakiw yanaptʼistu.

Diosajj wali sumwa aka oraq lurawayi, ukhamajj ¿kunatsa tʼaqesiñanak jan chhaqtaykpacha?

Religionar jan sarapki uka jaqenakat yaqhepajja, tʼaqesiñanak utjatapat Diosas juchanïkaspa, Jupajj janis suma amtamp lurawaykistaspa, Diosajj janis utjkaspa ukhamwa parlapjje. Ukatjja, tʼaqesiñanakajj akanakwa uñachtʼayi sasaw creyipjjaraki: 1) Diosajj tʼaqesiñanak chhaqtayañatakejj janiw chʼamanïkiti, 2) Diosajj janiw chhaqtayañ munkiti, 3) Diosajj janiw utjkiti.

Ukampis uka razonanakatakti ¿jaqenakajj tʼaqespachätanjja?

Diosajj janiw tʼaqesiñatak lurawaykistuti

Jupajj kusisit jakasiñaswa muni.

“Jaqetakejj askiwa jakañapana kusisiñapajja, ukhamarak suma sarnaqañapajja. Diosaw churistojja ukatwa jiwasajj manqʼtansa, umastansa, ukhamarak luratanakasatsa kusistanjja” (ECLESIASTÉS 3:12, 13).

Diosajj nayrïr chacha warmir lurkän ukhajja, perfectwa luräna, kusisitäpjjañapatakejj taqe kunwa churarakïna

Nayrïr chacha warmisa wawanakapas jan tʼaqesipjjañapwa munäna.

“[Diosasti] bendecirakïnwa: ‘Jichhajj wali mirantapjjam, aka oraqerusti phoqhantapjjarakim, apnaqapjjarakim [...]’ sasa” (GÉNESIS 1:28).

Nayrïr chacha warmejja Diosar jan istʼañwa amtapjjäna

Diosar jan istʼapjjatapatwa jupanakajj tʼaqesipjjäna, wawanakapas ukhamaraki.

“Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” (ROMANOS 5:12). *

Diosajj janiw amtasarjam sarnaqañasatak lurawaykistuti

Jiwasajj janiw uma manqhan jakañatak luratäktanti, ni jiwas pachpa apnaqasiñatakis luratäktanti.

“Jaqejj janiw alaskiti pachpa jakañapjja, janirakiw tukuyäwipsa munañapar apnaqkaspati” (JEREMÍAS 10:23).

Diosajj janiw tʼaqesiñas munkiti

Jan walinakar jan purtʼasiñasatakejja ewjjtʼanakwa Jupajj churistu.

“Nayan arunakajjaru istʼasamäna ukapachajj, waltʼañamajj mä jawirar uñtataw jiljjatasapäna” (ISAÍAS 48:18).