Jan walinakar saykatir mä jaqejja, jan waltʼäwinakan uñjasisajj janiw aynachtʼkiti. Jan walinakar saykatirïñajj jukʼat jukʼatwa yateqasi. Kunjamtï mä wawajj sarnaqañ yateqañatakejj walja kuti tinkkejja, ukhamarakiw maynejj kunayman problemanakan uñjasisajj ukanakar saykatañ yateqani.

Yaqhep wawanakajja, kuns jan sum lurapki, jan walinakan uñjasipki, cheqañchat uñjasipki ukhajj aynachtʼapjjewa. Yaqhep wawanakasti janiw mayamp kuns lurañ munjjapjjeti. Ukampis akanakwa amuyapjjañapa:

• Taqeniw walja kuti pantjastanjja (Santiago 3:2).

• Taqeniw jakäwisan jan waltʼäwinakan uñjastanjja (Eclesiastés 9:11).

• Cheqañchatäñasajj wakisipuniwa, ukhamatwa yateqañäni (Proverbios 9:9).

Wawamatï llakimp jan aynachtʼañ yateqani ukhajja, jan walinakarojj jan ajjsartʼasaw saykatani.

Wawam pantjasipana

BIBLIAJJ KAMSISA: “Aski jaqejj paqallq kutis aynachtʼkanejja, kutjtaskakiniwa” (Proverbios 24:16).

Mä problemajj jan walipuniti janicha uk amuytʼasiñwa wawamar yatichañama. Sañäni, ¿examenan jan suma nota apsuskaspa ukhajj kamachaspasa? ¿“¡Janiw kuns sum lurkti!” sasat aynachtʼaspa?

Wawamaru jan aynachtʼirïñ yatichañatakejja, kunjamsa mayan sum luraspa uk amuytʼañapatakiw yanaptʼañama. Ukhamatwa aynachtʼañat sipansa problemanakar saykatani.

Maysa toqetjja, janiw jumajj problemanakap askichañamäkiti. Antisas jupa pachpa askichañapatakiw yanaptʼañama. Inas akham jisktʼchisma: “¿Kuntï yatichasipktam uk sumpach amuyañatakejj kunsa lurasma?” sasa.

Jan walin uñjasisa

BIBLIAJJ KAMSISA: “Kunas qharürojj jakäwinakaman pasani ukjja janiw yatipktati” (Santiago 4:14).

Kunas jakäwisan pasani ukajj janiw yatiñjamäkiti. Mä akatjamatwa jan qollqen uñjassna jan ukajj  usuntsna. Bibliajj akham siwa: “Tʼijuñanjja janiw wali tʼijurinakapuniti atiptʼapkejja, jan ajjsaririnakapunisa nuwasïwina atipjapkejja; [...] horasajj jan waltʼañajj taqeniruw puri” sasa (Eclesiastés 9:11).

Awk taykjamajja, wawamar jan walinakat jarkʼaqañatakejj kunatï wakiski ukwa lurtajja. Cheqas kuna jan walinakantï wawamajj jakäwipan uñjaskani ukanakat janiw taqet jarkʼaqañ puedkätati.

Inas wawamajj jiskʼäskatap laykojja, kunjamas jan trabajonïñasa qollqet pistʼañasa uk jan yatkchiti. Ukampis inas amigopamp jan waltʼayasitaparu, jan ukajj mä munat familiaran jiwatapar saykatañapächi. *

Sum lurañapataki ewjjtʼatäkasina

BIBLIAJJ KAMSISA: “Istʼam suma ewjja arunakaru, [...] ukhamatwa yatiñan jaqëyätajja” (Proverbios 19:20).

Wawamar yanaptʼañatak ewjjtʼapki ukajj janiw aynachtʼayañ amtampïkiti. Antisas kunanti pantjaski, jan ukajj jan sum lurki ukanak askichañatakiwa.

Wawamaru ewjjtʼanaka katoqasiñ yatichäta ukhajja, jupasa jumasa walja askinakwa jikjjatapjjäta. Wawanakani John sat mä awkejj akham siwa: “Wawanakaman problemanakap jumak askichaskäta ukhajja, janiw yateqapkaniti. Mä problemat yaqha problemaruw puripjjani, ukatjja jumakipuniw problemanakap askichaskäta. Ukajj jumarusa wawanakamarus jan waltʼayapjjätamwa” sasa.

¿Kunjamsa wawamar ewjjtʼanak katoqasiñapatak yanaptʼasma? Kunapachatï escuelansa jan ukajj yaqha cheqansa wawamaru cheqañchapjjani ukhajja, “janiw uk lurapjjañapäkänti” sasajj janiw sañamäkiti. Antisas akhamwa wawamar jisktʼañama:

• “¿Kunatsa cheqañchapjjpachätam uk amuytati?”.

• “¿Kunjamsa sum lurañatak chʼamachasisma?”.

• “¿Mayan cheqañchapjjätam ukhajj kunsa luräta?”.

Ewjjtʼanakajj janiw jichhak wawamar yanaptʼkaniti, jan ukasti jilïrëjjani ukhas yanaptʼarakiniwa.