ሐምሌ 8, 2022 | የታደሰው፦ ግንቦት 13, 2024
ሩሲያ

ወቅታዊ መረጃ—ወንድሞች ታሰሩ | ጸሎት ብርታት ሰጥቷቸዋል

አጫውት

ግንቦት 13, 2024 በኢዢፍስክ የሚገኘው የፐርቮማይስኪ አውራጃ ፍርድ ቤት፣ በወንድም ሰርጌ አሺክሚን፣ በወንድም ማክሲም ዴሬንድዬቭ እና በወንድም አሌክሳንደር ኩቲን ላይ የጥፋተኝነት ብይን አስተላልፏል። ሦስቱም የሦስት ዓመት እስራት ተፈርዶባቸዋል። ከፍርድ ቤት በቀጥታ ወህኒ ወርደዋል።

የክሱ ሂደት

ሚያዝያ 14, 2021

የፌዴራል ደህንነት አባላት ቢያንስ 12 የይሖዋ ምሥክሮች ቤቶችን ፈተሹ። ሰርጌ ለሰባት ሰዓታት ምርመራ ተደረገበት። ማክሲም እና አሌክሳንደር ተይዘው ጣቢያ ተወሰዱ
ሚያዝያ 15, 2021

ማክሲም እና አሌክሳንደር ማረፊያ ቤት እንዲገቡ ተደረጉ
ሚያዝያ 29, 2021

አሌክሳንደር ከማረፊያ ቤት ተለቀቀ
ግንቦት 14, 2021

አሌክሳንደር የቁም እስረኛ ተደረገ
ሐምሌ 9, 2021

ማክሲም ከማረፊያ ቤት ተፈትቶ የቁም እስረኛ ተደረገ
መጋቢት 14, 2022

የክሱ ሂደት በፍርድ ቤት መታየት ጀመረ

አጭር መግለጫ

ሰርጌ አሺክሚን

የትውልድ ዘመን፦ 1973 (ዤሻርት፣ ኮሚ ሪፑብሊክ)

ግለ ታሪክ፦ የጥበቃ ሥራ ይሠራ ነበር፤ በኋላ ላይ ደግሞ የሽያጭ ሠራተኛ ሆነ። በቅርቡ የልብ ቀዶ ሕክምና ስላደረገ ሥራ መሥራቱን አቁሟል

ኢየሱስ ቤዛ እንደሆነልን ማወቁ ልቡን በጥልቅ ነካው። በ2001 ተጠምቆ የይሖዋ ምሥክር ሆነ። በ2007 ከአናስታሲያ ጋር ትዳር መሠረተ

የሰጠው ሐሳብ

ጸሎት የጠቀመህ በየትኞቹ ሁኔታዎች ውስጥ ነው?

ቤታችን በተፈተሸበት ወቅት ሁሉም ነገር የሆነው በቅጽበት ነው። ረዘም ያለ ጸሎት ለማቅረብ አጋጣሚ አልነበረኝም። ስለዚህ በመጽሐፍ ቅዱስ ውስጥ እንደተጠቀሰው እንደ ነህምያ በልቤ አጭር ጸሎት አቀረብኩ፤ ይሖዋ ጥበብና ድፍረት እንዲሰጠኝ ለመንኩት።

ከዚህም ሌላ በምርመራው ወቅት በርካታ አሳሳች ጥያቄዎች ቀርበውልኝ ነበር። መቼ መልስ መስጠት እንደሌለብኝ ለማወቅና መናገር ባለብኝ ጊዜ በአግባቡ ለመናገር እንዲረዳኝ ይሖዋን ጠየቅሁት።

ማክሲም ዴሬንድዬቭ

የትውልድ ዘመን፦ 1985 (ኢዢፍስክ፣ ኡድሙርቲያ ሪፑብሊክ)

ግለ ታሪክ፦ የኤሌክትሪክ ባለሙያ ነው

የይሖዋ ምሥክሮች ያሳዩት ደግነት ከእነሱ ጋር መጽሐፍ ቅዱስን እንዲያጠና አነሳሳው። በ2000 ተጠመቀ። በ2015 ታቲያናን አገባ

የሰጠው ሐሳብ

ማረፊያ ቤት ውስጥ ምን ዓይነት ተፈታታኝ ሁኔታዎች አጋጥመውሃል? የተወጣሃቸውስ እንዴት ነው?

ከማን ጋር እንደምትታሰር መምረጥ አትችልም። አንዳንድ ጊዜ እስረኞቹ የሚቀልዱብኝን ቀልድ እንዳልሰማሁ ሆኖ ማለፍ በጣም ይከብደኝ ነበር።

በኋላ ላይ ግን ለሚናገሩት ነገር ቦታ መስጠት እንደሌለብኝ ተረዳሁ። ሁኔታው በጣም እየተፈታተነኝ እንደሆነ በመግለጽ ወደ ይሖዋ ጸለይኩ፤ ተገቢውን መልስ ለመስጠት እንዲረዳኝም ለመንኩት። በዚህ ሁሉ አስቸጋሪ ጊዜ ይሖዋ ምን ያህል እንደሚያስብልኝና እንደሚጨነቅልኝ አይቻለሁ።

አሌክሳንደር ኩቲን

የትውልድ ዘመን፦ 1982 (ኢዢፍስክ)

ግለ ታሪክ፦ በያጅ ሆኖ ይሠራል

ስለ ኢየሱስ ሲማር የእሱን ምሳሌ ለመከተል ተነሳሳ። በ2002 ተጠመቀ። በ2018 ከጉዜል ጋር ትዳር መሠረተ

የሰጠው ሐሳብ

ማረፊያ ቤት በነበርክበት ውስጥ ደስታህን እንዳታጣ የረዳህ ምንድን ነው?

ማረፊያ ቤት ስገባ ያሉኝን ነገሮች በሙሉ አጣሁ፤ የምወዳቸውን ሰዎች ማግኘት፣ ስብሰባዎች ላይ መገኘት፣ መጽሐፍ ቅዱስን ማንበብ ሌላው ቀርቶ ጥሩ ልማዶቼን ይዤ መቀጠል አልቻልኩም። ቤት እያለሁ በማለዳ ተነስቼ ቡና ወይ ሻይ አፈላና ከባለቤቴ ጋር በአንድ ጥቅስ ላይ እንወያይ ነበር። ይህን ሁሉ ላጣ እንደምችል ፈጽሞ አስቤ አላውቅም። ሆኖም ሊነጥቁኝ የማይችሉት አንድ ነገር አለ፤ ይህም የጸሎት መብቴ ነው። ስጸልይ ይሖዋ ቅዱስ መንፈሱን እንደሚሰጠኝ ይሰማኛል፤ የአምላክ መንፈስ ደስታዬን እንዳላጣና ተስፋ እንዳልቆርጥ ይረዳኛል።

ለመመሥከር የሚያስችሉ አጋጣሚዎችም አግኝቻለሁ። . . . ስምንት ሰዎች በሚይዝ ክፍል ውስጥ በታሰርኩበት ወቅት በዚያ የነበሩት ሁሉ ለምን እንደታሰርኩ ይጠይቁኝ ነበር። እኔም ለሁሉም ምክንያቱን ነገርኳቸው። በዚያ ወቅት ይሖዋ እንድረጋጋና ሰላም እንዲኖረኝ አድርጎኛል። ለዚህም ይሖዋን በልቤ አመሰገንኩት።

ወንድሞቻችን፣ ይሖዋ “እኔ ከአንተ ጋር ነኝና አትፍራ” በማለት በገባው ቃል በመተማመን የሚደርስባቸውን ግፍ እየተጋፈጡ ነው።—ኢሳይያስ 43:5