ግንቦት 29, 2023 | የታደሰው፦ ግንቦት 3, 2024
ሩሲያ

ወቅታዊ መረጃ—ወንድሞች ተፈረደባቸው | ወንድሞች በመጽሐፍ ቅዱስ ጥቅሶች እገዛ ስደትን ተጋፍጠዋል

አጫውት

ግንቦት 2, 2024 በፕሪሞርይስ ግዛት የሚገኘው የፖዣርስኪ አውራጃ ፍርድ ቤት፣ በወንድም ኒኮላይ ዲኽትያር፣ በወንድም አንድሬ ልያኾቭ፣ በወንድም ዩሪ ፖኖማሬንኮ እና በወንድም ኦሌግ ሰርጌዬቭ ላይ የጥፋተኝነት ብይን አስተላልፏል። ስማቸው እንደተጻፈበት ቅደም ተከተል የሁለት ዓመት ተኩል፣ የሁለት ዓመት ከስምንት ወር፣ የስድስት ዓመት ተኩል እና የስድስት ዓመት ከአራት ወር የገደብ እስራት ተፈርዶባቸዋል። አሁን ወህኒ አይገቡም።

አጭር መግለጫ

ኒኮላይ ዲኽትያር

የትውልድ ዘመን፦ 1954 (ዩክሬን)

ግለ ታሪክ፦ የማሞቂያና የማቀዝቀዣ መሣሪያዎች መሐንዲስ ሆኖ ይሠራ ነበር

ወቅታዊ የዓለም ክስተቶች የመጽሐፍ ቅዱስ ትንቢቶች ፍጻሜ እንደሆኑ ሲረዳ በመጽሐፍ ቅዱስ ትክክለኛነት አመነ። በ1998 ተጠምቆ የይሖዋ ምሥክር ሆነ

የሰጠው ሐሳብ

በዚህ ተፈታታኝ ጊዜ ሚዛንህን እንዳትስት የረዳህ ምንድን ነው?

የሩሲያ የይሖዋ ምሥክሮች ላይ ስደት ሲጀምር ነገሩ አላስገረመኝም። ከእኔ የሚጠበቀው ነገር ዝግጁ ሆኖ መጠበቅ እንደሆነ ተገንዝቤ ነበር። ስደትም ሆነ ፈተና የሚቀርልኝ ነገር እንዳልሆነ አውቃለሁ። (2 ጢሞቴዎስ 3:12) የይሖዋ ድርጅት የሚያቀርብልን መንፈሳዊ ምግብ እንዲሁም ወንድሞቻችን ስለ እኛ የሚያቀርቡት ጸሎት ትልቅ ብርታት ሆኖናል። ይሖዋና ኢየሱስ ሁልጊዜ አጠገቤ ያሉ ያህል ሆኖ ይሰማኛል፤ ጥንካሬና ትዕግሥት በመስጠት እየረዱኝ ነው።

አንድሬ ልያኾቭ

የትውልድ ዘመን፦ 1978 (ቮዝኔሴንካ፣ ፕሪሞርይስ ግዛት)

ግለ ታሪክ፦ ቤተ ውበት እና የሕንፃ ማሻሻያ ላይ ይሠራ ነበር

በ2014 ከይሖዋ ምሥክሮች ጋር ተገናኘ። ለጥያቄዎቹ ከመጽሐፍ ቅዱስ ላይ መልስ ሲያገኝ እውነትን እንዳገኘ እርግጠኛ ሆነ። በ2016 ተጠመቀ

የሰጠው ሐሳብ

በመንፈሳዊ ጠንካራ ሆነህ እንድትቀጥል የረዳህ ምንድን ነው?

ለተስፋ መቁረጥ እጅ ከሰጠሁ ጭንቀት በቀላሉ ሊያብረከርከኝና ትግሌን እርግፍ አድርጎ ሊያስተወኝ ይችላል። ደስታዬን ጠብቄ ለመኖር ከመቼውም ጊዜ ይበልጥ አሁን ራሴን በሥራ ማስጠመድ እንዳለብኝ አውቃለሁ። ማቴዎስ 6:33 ላይ ኢየሱስ “ከሁሉ አስቀድማችሁ የአምላክን መንግሥት . . . ፈልጉ” በማለት አበረታቶናል። በዚህ ማሳሰቢያ ላይ ማሰላሰሌ ትኩረቴ ምንጊዜም በመንፈሳዊ ነገሮች ላይ እንዲሆን ይረዳኛል። ምንም መጣ ምን፣ ይሖዋ ችግሩን ለመቋቋም እየረዳኝ እንደሆነ ሁልጊዜ ራሴን እነግረዋለሁ። ገና ለገና በሚል ክፉ ክፉውን እያሰቡ መብሰልሰል ምንም ትርጉም የለውም።

ዩሪ ፖኖማሬንኮ

የትውልድ ዘመን፦ 1958 (ኡሱሪስክ፣ ፕሪሞርይስ ግዛት)

ግለ ታሪክ፦ የኃይል ማመንጫ ጣቢያ ውስጥ የኤሌክትሪክ ባለሙያ ሆኖ ይሠራል

በ1986 ከልዩቦቭ ጋር ትዳር መሠረተ

ይሖዋ በግለሰብ ደረጃ ስለ እሱ እንደሚያስብ ሲማር ልቡ ተነካ። በ1995 ከባለቤቱ ከልዩቦቭ ጋር ተጠመቁ

የሰጠው ሐሳብ

በዚህ ሁሉ ፈተና አዎንታዊ ሆነህ ለመቀጠል የረዳህ ምንድን ነው?

የተስፋ መቁረጥ ስሜት ሲጫጫነኝ ራሴን በመንፈሳዊ እንቅስቃሴዎች ለማስጠመድ እሞክራለሁ፤ ተመሳሳይ ፈተናዎች ያጋጠሟቸውን ሰዎች ታሪክ ማንበቤም በጣም ረድቶኛል። ወንድሞችና እህቶች ፈተናዎችን በጽናትና በታማኝነት የተወጡት እንዴት እንደሆነ ሳይ እኔም እነዚህን ባሕርያት ለማሳየት እነሳሳለሁ።

ኦሌግ ሰርጌዬቭ

የትውልድ ዘመን፦ 1984 (ቭላዲቮስቶክ፣ ፕሪሞርይስ ግዛት)

ግለ ታሪክ፦ የኤሌክትሪክ ባለሙያ ነው

ወላጆቹ የይሖዋ ምሥክሮች የሆኑት እሱ ልጅ ሳለ ነው። መጽሐፍ ቅዱስን በግሉ ማጥናቱ የያዘው ነገር እውነት መሆኑን አሳመነው። በ1999 ተጠመቀ

በ2010 ከአናስታሲያ ጋር ተጋቡ። ሦስት ልጆች አሏቸው

የሰጠው ሐሳብ

በጣም ጠቃሚ ሆኖ ያገኘኸው የመጽሐፍ ቅዱስ ሐሳብ አለ?

ኢየሱስ በሉቃስ 12:25, 26 ላይ የተናገረውን ሐሳብ ብዙ ጊዜ አስቤበታለሁ፤ “ከእናንተ መካከል ተጨንቆ በዕድሜው ርዝማኔ ላይ አንድ ክንድ መጨመር የሚችል ይኖራል? ታዲያ እንዲህ ያለውን ትንሽ ነገር እንኳ ማድረግ የማትችሉ ከሆነ ስለ ሌሎች ነገሮች ለምን ትጨነቃላችሁ?” ይላል። ይህ ጥቅስ፣ ጭንቀት ሊቆጣጠረኝ ሲፈልግ ‘በቃ!’ ብዬ ላስቆመው እንደሚገባ ያስታውሰኛል፤ ለጭንቀት እጅ መስጠት አይኖርብኝም። በሕይወቴ ውስጥ ከእኔ ቁጥጥር ውጭ የሆኑ ሁኔታዎች መፈጠራቸው አይቀርም። ላደርግ የምችለው ነገር ቢኖር አዲሱን ሁኔታ ለመላመድ መሞከርና የይሖዋን እርዳታ መፈለግ ነው።

ከኒኮላይ፣ ከአንድሬ፣ ከኦሌግ እና ከዩሪ ሁኔታ እንደምንማረው የመጽሐፍ ቅዱስን መሠረታዊ ሥርዓቶች ተግባራዊ ማድረጋችን “ለማንኛውም መልካም ሥራ . . . ሙሉ በሙሉ ብቁ” ያደርገናል።—2 ጢሞቴዎስ 3:16, 17

የክሱ ሂደት

ሐምሌ 16, 2021

ዩሪ ላይ የክስ ፋይል ተከፈተበት። የተጠረጠረው “የጽንፈኛ ድርጅትን እንቅስቃሴ አስተባብረሃል” በሚል ወንጀል ነው
ሐምሌ 22, 2021

የዩሪ መኖሪያ ቤት ተፈተሸ
ሐምሌ 24, 2021

ዩሪ የጉዞ ክልከላዎች ተጣሉበት
ኅዳር 1, 2021

የኦሌግ መኖሪያ ቤት ተፈተሸ
ኅዳር 2, 2021

ኦሌግ የጉዞ ክልከላዎች ተጣሉበት
የካቲት 12, 2022

ኦሌግ በክስ መዝገቡ ውስጥ ተካተተ
መጋቢት 14, 2022

ኒኮላይ በክስ መዝገቡ ውስጥ ተካተተ
መጋቢት 15, 2022

አንድሬ በክስ መዝገቡ ውስጥ ተካተተ
ነሐሴ 10, 2022

ክሱ በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች