Die antichris is nie net ’n enkele persoon of entiteit nie, want die Bybel sê dat daar “baie antichriste” is (1 Johannes 2:18). Die term “antichris”, wat van ’n Griekse woord kom wat “teen (of in plaas van) Christus” beteken, verwys in werklikheid na enigiemand wat die volgende doen:

•   Ontken dat Jesus die Christus (Messias) is of ontken dat hy die Seun van God is.—1 Johannes 2:22.

•   Die Christus, God se Gesalfde, teëstaan.—Psalm 2:1, 2; Lukas 11:23.

•   Voorgee dat hy die Christus is.—Matteus 24:24.

•   Die volgelinge van Christus vervolg, aangesien Jesus enigiets wat aan hulle gedoen word, beskou asof dit aan hom gedoen word.—Handelinge 9:5.

•   Valslik beweer dat hy ’n Christen is hoewel hy wetteloos of bedrieglik is.—Matteus 7:22, 23; 2 Korintiërs 11:13.

 Die Bybel verwys nie net na individue wat sulke dinge doen as antichriste nie, maar verwys ook na hulle gesamentlik as “die antichris” (2 Johannes 7). Die antichris het in die tyd van die apostels verskyn en is sedertdien nog altyd bedrywig. Hierdie verwikkeling is in die Bybel voorspel.—1 Johannes 4:3.

•   Hulle bevorder valse idees in verband met Jesus (Matteus 24:9, 11). Byvoorbeeld, diegene wat die Drie-eenheidsleer voorstaan of leer dat Jesus God die Almagtige is, staan in werklikheid die leringe van Jesus teë, wat gesê het: “Die Vader is groter as ek.”—Johannes 14:28.

•   Antichriste verwerp wat Jesus gesê het oor hoe God se Koninkryk funksioneer. Byvoorbeeld, party godsdiensleiers sê dat Christus deur middel van menseregerings werk. Maar hierdie lering weerspreek Jesus, wat gesê het: “My koninkryk is geen deel van hierdie wêreld nie.”—Johannes 18:36.

•   Hulle sê dat Jesus hulle Here is, maar hulle gehoorsaam nie sy gebooie nie, insluitende die een om die goeie nuus van die Koninkryk te verkondig.—Matteus 28:19, 20; Lukas 6:46; Handelinge 10:42.