Yehowa suɔ kaa waa ye “anɔkuale sisiisi.” (La 15:2) Enɛ ɔ he hia saminya ngɛ gba si himi mi, ke pi jã a, nyɛɛ kɛ nyɛ hɛ be nyɛe maa fɔ nyɛ sibi a nɔ. Nɛ ja nyɛ heɔ nyɛ sibi yeɔ loko suɔmi nɛ nyɛ ngɛ ha nyɛ sibi ɔ mi maa wa.

Mwɔnɛ ɔ, nihi yi anɔkuale ngɛ a gba si himi mi hu. Ní enyɔ komɛ ngɛ nɛ e sa kaa o pee bɔ nɛ pee nɛ o po o gba si himi ɔ he piɛ ɔ.

NƆ́ NƐ BAIBLO Ɔ DE: “Nyɛ ko hi si kaa nihi nɛ li nɔ́ ko nɔ́ ko, se mohu kaa ní leli.” (Efeso Bi 5:15, 16) Ní lemi ngɛ mi kaa o maa bu o gba si himi ɔ kaa níhi nɛ a he hia ngɛ o si himi mi ɔ a kpɛti kake. E sa nɛ e he nɛ hia mo wawɛɛ.

Yehowa suɔ nɛ o ná suɔmi kɛ ha o he piɛɛlɔ ɔ nɛ o kɛ lɛ nɛ ná bua jɔmi ngɛ si himi mi. (Fiɛlɔ 9:9) E pee lɛ heii kaa e sɛ nɛ o ngmɛɛ o he piɛɛlɔ ɔ he kɛ fɔ si, mohu ɔ, e sa nɛ nyɛ hla blɔhi a nɔ nɛ nyɛ maa gu konɛ nyɛ bua nɛ jɔ. (1 Korinto Bi 10:24) Mo ha nɛ o he piɛɛlɔ ɔ nɛ nu he kaa e he hia, nɛ o bua jɔ e he.

NƆ́ NƐ O MA NYƐ MAA PEE:

• Moo bɔ mɔde nɛ o ná be kɛ ha o he piɛɛlɔ ɔ, nɛ o bu lɛ tue saminya

• Mo susu nyɛ ni enyɔ ɔmɛ nyɛ he se pi mo pɛ o he

NƆ́ NƐ BAIBLO Ɔ DE: “Nɔ tsuaa nɔ nɛ hyɛɛ yo, nɛ e he peeɔ lɛ akɔnɔ ɔ, e kɛ lɛ puɛ gba momo ngɛ e tsui mi.” (Mateo 5:28) Ke nɔ ko susuɔ akɔnɔ yaya he ɔ, ngɛ blɔ ko nɔ ɔ, e yi e he piɛɛlɔ ɔ anɔkuale.

Yehowa de kaa e sa nɛ waa “bu wa tsui ɔ he.” (Abɛ 4:23, NW; Yeremia 17:9) Loko wa ma nyɛ maa pee jã a, e sa nɛ waa hyɛ wa hɛngmɛ saminya. (Mateo 5:29, 30, NW) Moo kase anɔkualetsɛ Hiob nɔ hyɛmi nɔ́ kpakpa nɛ e pee ɔ. E ka kita kaa e kɛ akɔnɔ hɛngmɛ be zangmayo ko hyɛe gblegbleegble. (Hiob 31:1) Fiaa o pɛɛ si kaa o be bɔmi nami he fonihi hyɛe kɔkɔɔkɔ. Nɛ moo mwɔ o yi mi kpɔ hu kaa o be suɔmi nae kɛ ha nɔ ko nɛ pi o he piɛɛlɔ.

NƆ́ NƐ O MA NYƐ MAA PEE:

• Mo ha nɛ nihi nɛ a na heii kaa o be o he piɛɛlɔ se jee

• Mo susu o he piɛɛlɔ ɔ he numi he, nɛ o kpa huɛ bɔmi ko nɛ ma gba o he piɛɛlɔ ɔ nya a amlɔ nɔuu