Abɛ 24:1-34
24 O hɛ nɛ ko kɔ nimli yayamihi a nɔ,Nɛ e ko jlo mo kaa o kɛ mɛ maa bɔ,
2 Ejakaa a tsui susuɔ basabasa peemi he,Nɛ bɔ nɛ a ma plɛ kɛ hao nihi pɛ he munyu lɛ a nya tuɔ.
3 Juɛmi lɛ a kɛ maa we,*Nɛ nɔ́ se kɔmi lɛ a kɛ haa nɛ e maa si kpɛii.
4 Nile nɛ a kɛ haa nɛ we ɔ mi tsu ɔmɛ hyiɔ tɔKɛ juetli slɔɔtohi tsuo nɛ a he jua wa nɛ a ngɛ fɛu.
5 Juɛmitsɛ ngɛ he wami,Nɛ nile haa nɛ adesa náa he wami fuu kɛ piɛɛ e he wami ɔ he.
6 O kɛ blɔ tsɔɔmi kpakpa* lɛ maa hwu o ta a,Nɛ kunimi yemi* baa kɛ guɔ ga woli babauu a nɔ.
7 Kuasia be nyɛe ma ná juɛmi nitsɛnitsɛ;*E be nɔ́ ko nɛ e ma de ngɛ ma agbo ɔ nya.*
8 Nɔ fɛɛ nɔ nɛ toɔ ga yaya a,A ma tsɛ lɛ ke ga tsɔlɔ kpanaku.
9 Ga nɛ kuasia toɔ ɔ* ji yayami,Nɛ nihi hiɔ he fɛu yelɔ.
10 Ke o kɔni mi jɔ̃ ngɛ haomi ligbi nɔ* ɔ,O he wami nɔ ma gbɔ.
11 Kpɔ̃ nihi nɛ a ngɔ mɛ kɛ yaa gbenɔ mi ɔ,Nɛ́ o tsi nihi nɛ a ngɛ dedee kɛ yaa nɔ gbemi he ɔ blɔ.
12 Ke o de ke, “Tse wa li nɔ́ nɛ ɔ he nɔ́ ko” ɔ,
Anɛ nɔ nɛ hyɛɛ tsuihi* a mi ɔ kɔ we se lo?
Ee, nɔ nɛ hyɛɛ mo ɔ* maa leNɛ e maa wo adesa fɛɛ adesa hiɔ ngɛ e ní peepee he.
13 Ye bi, ye hwo, ejakaa e hi;Hwo nɛ je hwo gbaku mi ngɔɔ ngɛ lilɛ nɔ.
14 Jã kɛ̃ nɛ e sa nɛ o le kaa juɛmi he ngɛ se nami ha mo.*
Ke o ná a, e maa hi ha mo hwɔɔ seNɛ o hɛ kɛ nɔ fɔmi ɔ se be poe.
15 Koo pee o he yiwutsotsɛ nɛ o ya wo ka ngɛ dalɔ we he;Ko puɛ he nɛ e jɔɔ e he ngɛ ɔ.
16 Ejakaa dalɔ ma nyɛ maa nɔ si si kpaago nɛ e maa te si ekohu,Se haomi maa tɔ̃tɔ̃ yiwutsotsɛmɛ a nane.
17 Ke o he nyɛlɔ nɔ si ɔ, ko nya,Nɛ ke e nane tɔ̃tɔ̃ ɔ, ko ha nɛ o tsui nɛ nya;
18 Ke pi jã a, Yehowa maa na nɛ e bua be he jɔe,Nɛ e ma je e we abofu ɔ ngɛ e* nɔ.
19 O mi mi nɛ ko fu ngɛ nimli yayamihi a he je;O hɛ nɛ ko kɔ̃ yiwutsotsɛmɛ a nɔ,
20 Ejakaa hɛ nɔ kami ko be ha nimli yayamihi;Yiwutsotsɛmɛ a kane ma gbo.
21 Ye bi, moo ye Yehowa kɛ matsɛ gbeye.
Nɛ o kɛ atuã tsɔli* nɛ ko bɔ,
22 Ejakaa haomi maa ba a nɔ tlukaa.
Mɛnɔ lɛ le hɛ mi kpatami nɛ mɛ ni enyɔ ɔmɛ tsuo* maa ngɔ kɛ ba a nɔ?
23 Juɛmitsɛmɛ a munyuhi ji nɛ ɔmɛ nɛ:
Nɔ hɛ mi hyɛmi ngɛ kojomi mi hí.
24 Nɔ fɛɛ nɔ nɛ deɔ yiwutsotsɛ ke, “Dalɔ ji mo” ɔ,
Nihi maa gbiɛ lɛ, nɛ je ma amɛ maa tu munyu kɛ si lɛ.
25 Se níhi a mi maa hi ha nihi nɛ a kãa e hɛ mi ɔ;A maa jɔɔ mɛ kɛ ní kpakpahi.
26 Nɔ nɛ haa sanehi a heto pɛpɛɛpɛ ɔ, nihi ma fĩɔ e nya he.*
27 Mo tsu o ní tsumi ngɛ kpo nya, nɛ́ o to nɔ́ fɛɛ nɔ́ he blɔ nya ngɛ ngmɔ ɔ mi;Lɔ ɔ se ɔ, moo ma o we ɔ.*
28 Koo ye odase kɛ si o nyɛmi nɔmlɔ be mi nɛ o be nɔ dami nɔ́ ko.
Koo ngɔ o nya kɛ sisi nihi.
29 Ko de ke: “Ma pee lɛ kaa bɔ nɛ e pee mi ɔ;Ma to lɛ nane mi ngɛ nɔ́ nɛ e pee ɔ he.”
30 I be ngɛ hejɔtsɛ ngmɔ he,Ngɛ adesa nɛ be juɛmi* ɔ wai ngmɔ ɔ he.
31 I na kaa nga* fuu puɛ ngɛ e wai ngmɔ ɔ mi;Miohi ha zugba a nɔ tsuo,Nɛ tɛhi nɛ a fia kɛ bɔle lɛ ɔ hu ku kɛ pue si.
32 I na nɔ́ nɛ ɔ, nɛ i kɛ wo ye tsui mi;I na, nɛ i kase nɔ́ nɛ ɔ ngɛ mi:*
33 Oo, ma hwɔ mahe bɔɔ, ma de kɔnɛɛ bɔɔ,Ma bua ye nine nya nɛ ma jɔɔ ye he bɔɔ,
34 O hɛɛ mi jã nɛ ohia ma ba ná mo tlukaa kaa julɔ,Nɛ o he maa fĩ mo kaa nɔ́ nɛ awi yelɔ ba tua mo.
Sisi Ningmahi
^ Aloo “Juɛmi nɛ a kɛ fiaa we mi bimɛ kɛ maa si.”
^ Aloo “blɔ tsɔɔmi nɛ juɛmi ngɛ mi.”
^ Aloo “manye yemi; yi wami hemi.”
^ Nɛ ji juɛmi nɛ je Mawu ngɔ.
^ Ngɛ Hebri gbi mi ɔ, “agbo ɔ mi.”
^ Aloo “Kuasia ga tsɔmihi.”
^ Aloo “ngɛ nyagba behi a mi.”
^ Aloo “o klaa a.”
^ Aloo “susumihi.”
^ Aloo “juɛmi ngɔɔ ha o klaa.”
^ Nɛ ji he nyɛlɔ ɔ.
^ Aloo “nihi nɛ a suɔ nɛ a tsake níhi.”
^ Nɛ ji Yehowa kɛ matsɛ ɔ.
^ Baiblo komɛ de ke, “Heto nɛ a haa nɛ e ji anɔkuale ɔ ngɛ kaa nya he fiɔmi.”
^ Aloo “fiaa o we mi bimɛ kɛ ma si.”
^ Ngɛ Hebri gbi mi ɔ, “be tsui nɛ nuɔ nɔ́ sisi.”
^ Aloo “hu.”
^ Ngɛ Hebri gbi mi ɔ, “i wo tsɔsemi nɛ ɔ ngɛ mi.”
