Wɔ tsuo wa hia sika nɛ waa kɛ maa tsu wa weku mi bimɛ a hiami níhi a he ní. (Abɛ 30:8) Niinɛ, “sika faa nɔ he.” (Fiɛlɔ 7:12) E he wa kaa nɔ kɛ e yo maa sɛɛ sika he ní, se nyɛ ko ngmɛ blɔ nɛ sika nɛ ngɔ nyagbahi kɛ ba nyɛ gba si himi ɔ mi. (Efeso Bi 4:32) E sa nɛ nihi nɛ a sɛ gba si himi mi ɔ nɛ a he a sibi ye, nɛ a pee kake ke mwɔ a yi mi kpɔ ngɛ níhi nɛ a kɛ sika ma he ɔmɛ a he.

NƆ́ NƐ BAIBLO Ɔ DE: “Ke nɔ ko ngɛ hlae nɛ e ma mɔ ɔ, kekleekle ɔ, e hii si nɛ e buu nya, nɛ e hyɛɛ kaa e ngɛ sika nɛ maa su nya gbemi lo.” (Luka 14:28) E he hia kaa nyɛ maa to blɔ nya ngɛ bɔ nɛ nyɛɛ kɛ sika ma tsu ní ha a he. (Amos 3:3) Nyɛ susu níhi nɛ nyɛ ma he ɔmɛ a he nɛ nyɛɛ hyɛ sika nɛ nyɛ ma puɛ ɔ. (Abɛ 31:16) Ke nyɛ ngɛ sika nɛ nyɛɛ kɛ ma he nɔ́ ko ɔ, lɔ ɔ tsɔɔ we kaa doo ɔ, e sa nɛ nyɛ he. Nyɛ ko flii níhi nɛ nyɛ ba ye hiɔ. Sika nɛ nyɛ ngɛ ɔ nya ní pɛ nyɛ he.​—Abɛ 21:5; 22:7.

NƆ́ NƐ O MA NYƐ MAA PEE:

• Ke nyɔhiɔ ɔ gbo nɛ nyɛ sika a eko piɛ ɔ, nyɛɛ pee kake kɛ susu nɔ́ nɛ nyɛɛ kɛ maa pee ɔ he

• Nɛ ke nyɛ ye hiɔ ɔ, nyɛɛ to blɔ nya pɔtɛɛ konɛ nyɛ je níhi nɛ ha nɛ nyɛ bɔ hiɔ ɔ a nɔ. Kaa nɔ hyɛmi nɔ ɔ, ke nyɛ heɔ niye ní nɛ a hoo momo nɛ nyɛ yeɔ, lɛɛ nyɛ bɔni ní hoomi ngɛ we mi

NƆ́ NƐ BAIBLO Ɔ DE: “Pee nɔ́ nɛ da, pi ngɛ Nyɔmtsɛ Mawu hɛ mi kɛkɛ, se ngɛ ni kpahi a hɛ mi hulɔ.” (2 Korinto Bi 8:21) Moo ye o he piɛɛlɔ ɔ anɔkuale nɛ o de lɛ o hiɔwo kɛ sika nɛ o puɛɔ.

Be tsuaa be nɛ o kɛ o sika maa pee nɔ́ ko ɔ, e sa nɛ o kɛ o he piɛɛlɔ ɔ nɛ susu he kekle. (Abɛ 13:10) Ke nyɛ pɔɔ bɔ nɛ nyɛɛ kɛ sika ma tsu ní ha a he ní sɛɛmi ɔ, e ma ha tue mi jɔmi maa hi nyɛ gba si himi ɔ mi. Moo na o hiɔwo ɔ kaa e ji weku ɔ sika, se pi mo pɛ o sika.​—1 Timoteo 5:8.

NƆ́ NƐ O MA NYƐ MAA PEE:

• Nyɛ susu he konɛ nyɛ ti nɔ tsuaa nɔ nɛ e le sika nɛ e kɛ maa wo e he nɛ e kɛ ma tsu e hiami ní

• Nyɛ ko mlɛ nɛ nyagba ko nɛ te si loko nyɛ susu sika he