Neca guʼnuʼ guiráʼ ni gándatiʼ para chuʼ xquendaxheelaluʼ ne familia stiuʼ nayecheʼ, ziuu ora zazaaca xiixa ni cadi cabezuʼ ne pur laani maʼ qué ziuuluʼ nayecheʼ (Eclesiastés 9:11). Peru zudii Dios ni gacané laanu ora guidxaagalunu xiixa guendanagana. Lii ne familia stiuʼ zanda guni huantartu intiica guendanagana, nin ñácani jma naroʼbaʼ, pa chinándatu ca principiu zeeda lu Biblia ni chiguzéʼtenu riʼ.

NI RUSIIDIʼ BIBLIA: «Cadi chuʼ tu xizaa, sínuque laquixhe irá ni lu ná be, purti laabe cayapa be laatu» (1 Pedro 5:7). Qué chuʼ dxi guiaandaʼ lii, cadi Dios diʼ napa donda pur ca guendanagana stiuʼ (Santiago 1:13). Pa guidxíñaluʼ laabe la? nabé galán modo zacanebe lii (Isaías 41:10). Biblia na: «Laguiníʼ guiráʼ ni nuu ndaaniʼ ladxidoʼto nezalube» (Salmo 62:8).

Sti cosa ni zacané lii nga gúʼndaluʼ Biblia ne guni estudiarluʼ ni guiráʼ dxi. Pa guʼnuʼ nga la? zudiiluʼ cuenta dxandíʼ racané Jiobá laanu ora «tiica acaná ladxidóʼ no» (2 Corintios 1:3, 4; Romanos 15:4). Laabe cudii stiidxabe lii zaguixhedxibe ladxidoʼloʼ «dede iruti zanda guiene ximodo ni» (Filipenses 4:6, 7).

NI ZANDA GUʼNUʼ:

• Gunabaʼ Jiobá gacané lii ti cadi gaca lúguluʼ ne gunabaʼ laabe gacanebe lii guiníʼ ique chaahuiluʼ xi guʼnuʼ

• Biiyaʼ xi guiráʼ zanda guʼnuʼ ne gulí tobi ni jma zacané lii

NI RUSIIDIʼ BIBLIA: «Ladxidóʼ ti binni ni riene rapa guendananna, ne diaga cani nuu xpiaaniʼ runi stipa guidxela guendananna» (Proverbios 18:15). Biyubi gannuʼ xi guiráʼ cayaca. Biiyaʼ chaahuiʼ xi caquiiñeʼ cada tobi de ca binniliʼdxuʼ. Guniʼné laacaʼ ne bicaadiaga laacaʼ (Proverbios 20:5).

Laga pa gatiʼ tuuxa binni ni nadxiiluʼ yaʼ. Cadi guituí luluʼ gusihuinnuʼ ni cayuni sentirluʼ. Cadi guiaandaʼ lii dede nepeʼ Jesús biinaʼ (Juan 11:35; Eclesiastés 3:4). Laaca naquiiñeʼ guiziilaʼdxuʼ ne cadi cuee xcaandaluʼ (Eclesiastés 4:6). Pa guʼnuʼ nga la? qué zaca nagana para lii gudxiiluluʼ guendanagana ca.

NI ZANDA GUʼNUʼ:

• Gatigá byuiʼné familia stiuʼ xi gúnitu pa guizaaca ti desgracia. Pa guʼnuʼ ni, qué zaca nagana para laacabe guiniʼnécabe lii ora gápatu guendanagana

• Guniʼné ca binni ni gudiʼdiʼ lu guendanagana cadiʼduʼ

NI RUSIIDIʼ BIBLIA: «Ni dxandíʼ xhamígunu la? guiráʼ ora nadxii laanu, ne zeeda gácabe casi ti bíchinu o ti bizánanu ni nuuca para gacané laanu ora nápanu xiixa guendananá» (Proverbios 17:17). Zándaca gacalaʼdxiʼ ca xhamíguluʼ gacané lii, peru nuu tiru qué zadxélacaʼ ximodo gúnicaʼ ni. Nga runi, gudxi laacaʼ xi zanda gúnicaʼ para gacanecaʼ lii (Proverbios 12:25). Laaca zanda guyubuʼ gacané ca binni ni nanna de Biblia lii. Ne zacanécabe lii gannuʼ xi guʼnuʼ ra iquiiñecabe Stiidxaʼ Dios (Santiago 5:14).

Pa gatigá guidxaaguʼ ca binni ni dxandíʼ napa fe Dios ne napa confianza zúnibe cani maʼ guniʼbe la? zadxeʼluʼ tu gacané lii. Laaca nabé zatadxí ladxidoʼloʼ ora gacaneluʼ cani caquiiñeʼ cúʼcabe gana laa. Guniʼné laacabe de fe napuʼ Jiobá ne de cani maʼ bidii stiidxaʼ guni. Cadi guiaanadxiluʼ de gacaneluʼ xcaadxi ne cadi guixeluʼ de ca binni ni nadxii lii ne rizaalaʼdxiʼ lii (Proverbios 18:1; 1 Corintios 15:58).

NI ZANDA GUʼNUʼ:

• Guniʼné ti binni ni nabé xhamíguluʼ ne bidii lugar gacané lii

• Bisiá stiidxaluʼ ora guiniuʼ xipeʼ caquiiñuʼ