Jiobá cayabi laanu: «Cadi gácatu binni rudxii deche» (Malaquías 2:16). Cadi naquiiñeʼ gaca binni zacá lu xquendaxheelaʼ, purtiʼ rirá confianza ora rudxii deche tuuxa xheelaʼ. Ne naquiiñeʼ gapa chupa binni confianza para guiroobaʼ guendarannaxhii sticaʼ.

Yanna riʼ, nuu stale cosa ni zanda gucaa binni gudxii deche xheelaʼ. Para cadi chuʼ xiixa ni guniná xquendaxheelaluʼ la? naquiiñeʼ quixheʼ íqueluʼ guʼnuʼ chupa cosa.

NI RUSIIDIʼ BIBLIA: «[Lacuí] ni dxandí risaca» (Filipenses 1:10). Xquendaxheelaluʼ nga tobi de ca cosa jma risaca lu xquendanabániluʼ. Laani nga primé que intiica cosa.

Qué racalaʼdxiʼ Jiobá guyadxiluʼ sti binni ni cadi xheeluʼ, ni racaláʼdxibe nga guibánitu nayecheʼ (Eclesiastés 9:9). Laabe cayábibe lii cadi gusaana de guizaalaʼdxuʼ xheeluʼ ne guyubuʼ modo chuʼ nayecheʼ (1 Corintios 10:24). Naquiiñeʼ guni sentir xheeluʼ riquiiñuʼ laa ne rusisácaluʼ laa.

NI ZANDA GUʼNUʼ:

• Gatigá gulee tiempu chuʼneuʼ xheeluʼ juntu ne biiyaʼ xi caquiiñeʼ

• Guníʼ ique xi caquiiñeʼ guirópatu ne cadi ni caquiiñesiouʼ

NI RUSIIDIʼ BIBLIA: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe» (Mateo 5:28). Pa qué gusaana binni de guiníʼ ique cosa dxabaʼ la? maʼ cucheené xheelaʼ.

Jiobá cayabi laanu naquiiñeʼ gápanu ladxidoʼno (Proverbios 4:23; Jeremías 17:9). Para ganda guʼnuʼ nga la? naquiiñeʼ chuʼluʼ cuidadu né cani ruuyuʼ (Mateo 5:29, 30). Yenanda ejemplu stiʼ Job, laa biʼniʼ ti pactu né bizalú ti cadi guyadxí sti gunaa ne gacalaʼdxiʼ chuʼné laabe (Job 31:1). Gudixhe ique cadi guʼyuʼ pornografía. Ne qué chuʼ dxi chuulaʼdxuʼ sti binni ni cadi xheeluʼ.

NI ZANDA GUʼNUʼ:

• Bisihuinni nezalú binni jma risaca xheeluʼ que xcaadxi cosa

• Biʼniʼ respetar ni runi sentir xheeluʼ ne pa huaxiéʼ riuulaʼdxiʼ modo ridxaaguʼ tuuxa la? nagueendaca bisaana de guʼnuʼ ni