NI RINABADIIDXAʼ CA JOVEN
¿Xi riníʼ ique binni ora gu’ya’ naa?
¿Xiñee risaca modo gáculuʼ lari? Purtiʼ pur modo gáculuʼ lari, zahuinni ximodo nácaluʼ. Yanna, ¿xi riníʼ ique binni de lii yaʼ?
Chonna cosa ni qué ganna binni de moda ne xi caquiiñeʼ gúninu para cadi guiábanu luni
Primé: Cadi gudiiluʼ lugar gucaa guiráʼ anunciu ca lii cuiluʼ xi gáculuʼ.
Ti joven láʼ Theresa guníʼ: «Ora stale biaje gú’yalu’ ca anunciu ca la? ziuuláʼdxiluʼ ca ni». Ora guiráʼ ladu ruuyaluʼ anunciu de ngueca moda zanda gucaa ni lii gáculuʼ lari zaqueca».
Cadi ca baʼdudxaapaʼ si ca nga rinándacaʼ modo zeʼ moda. Libru ni láʼ The Everything Guide to Raising Adolescent Boys (Una guía completa para criar chicos adolescentes) ná: «Laaca ruyubi ca hombrehuiiniʼ ca gánnacaʼ xi nuu de moda [...]. Dede nahuiinicabe rucaa ca anunciu ca laacabe ximodo guzuchaahuicabe».
Ni jma galán gúniluʼ. Biblia ná: «Ni nahuati runi cré intiica ni gábicabe laa, peru ti binni nuu xpiaaniʼ la? riníʼ ique ante guni xiixa» (Proverbios 14:15). Guníʼ ique xi cucaa ca anunciu ca lii gúniluʼ, casi pa gú’yalu’ anunciu de lari nabé sexy o ni gucaa xcaadxi binni guyadxí lii, galán guníʼ íqueluʼ ndiʼ:
«¿Tu zaca beneficiar pa chinandaʼ moda riʼ yaʼ?»
«Pa gacuaʼ lari riʼ, ¿xi zaníʼ binni de naa?»
«¿Ñee rusihuinni lari stinneʼ ximodo naa ne xi runeʼ cré la?»
Ti conseju. Semana riʼ, biiyaʼ xi lari jma cayúnicabe anunciu stiʼ. ¿Xi tipu lari racaláʼdxicabe siʼ binni? ¿Ñee raʼbuʼ nuucabe gucaabe lii siluʼ ti tipu lari purtiʼ nga nuu de moda la? Ti baʼdudxaapaʼ láʼ Keren ná: «Nabé rucaacabe ique binni guihuinni galán, gacuʼ lari galán ne gapa ti cuerpu galán. Nanna ca ni runi anunciu ca cadi nagana gucaacaʼ ca joven ca sicaʼ ca ni cutoocabe».
Guiropa: Gáculuʼ lari ni nuu de moda para si chuula’dxi’ xcaadxi guidxaaga lii.
Ti joven láʼ Manuel ná: «Ora nuu ti tipu de lari de moda la? guiráʼ binni racu ni, ne pa qué gáculuʼ ni la? zaníʼcabe mal de lii». Zacá ga bizeeteʼ ti baʼdudxaapaʼ láʼ Anna, nabe: «Cadi zacusiou’ lari ni nuu de moda, sínuque zuyubu’ chuula’dxi’ ca xhamíguluʼ lari ni náculuʼ».
Ti cosa ni zanda gúniluʼ. Biblia ná: «Cadi chinándatu modo nabani binni tiempu riʼ» (Romanos 12:2). Casi ná conseju riʼ, biiyaʼ xi tipu lari nápaluʼ ne guníʼ ique ndiʼ:
«¿Xi jma ricá iqueʼ ora cuyubeʼ xi lari gacuaʼ?»
«¿Ñee nabé riuuladxeʼ gacuaʼ lari de marca la?»
«¿Ñee ruyubeʼ guidxagayaa xcaadxi naa pur modo racuá’ lari la?»
Ti conseju. Nuu tu riníʼ ique chupa si cosa zanda guni: Pa chinanda moda la? zuni aceptárcabe laa, ne pa qué guni ni la? zucaanácabe laa. Pa zacá riníʼ íqueluʼ la? jma galán gúniluʼ ndiʼ: Bi’ni’ stipa gápaluʼ personalidad stiluʼ. Pa guni sentirluʼ galán modo lii la? qué ziuuluʼ xizaa xi guiníʼ ique xcaadxi de lii.
Guionna: Jma galán gáculuʼ lari sexy.
Sicaríʼ guníʼ ti baʼdudxaapaʼ láʼ Jennifer, nabe: «Nuu biaje rudii gana naa gacua’ lari ni cadi jneza, casi gacua’ lari nachucu, ni guquiichiʼ naa o ni gusihuinni xcuerpua’».
Ti cosa ni zanda gúniluʼ. Biblia ná: «Cadi guicá íquetu puru si guendaruzuchaahuiʼ de luguiáʼ, sínuque ni jma guicá íquetu nga gácatu nachaʼhuiʼ ne nadóʼ» (1 Pedro 3:3, 4). Guníʼ ique conseju riʼ ne biiyaʼ xii nga ni jma galán para lii: gunibiáʼ binni lii pur modo ráculuʼ lari la? o purtiʼ nácaluʼ ti binni nacha’hui’.
Ti conseju. Jma galán gácaluʼ sencíu. Neca cadi laa diʼ ni nga ruuyaʼ binni tiempu riʼ, peru guníʼ ique ndiʼ:
¿Ñee huaníʼneluʼ tuuxa diidxaʼ ni riníʼ puru si de laa la? Ni jma triste nga qué rudiibe cuenta ruxhélebe xcaadxi binni de laabe.
Cásica zanda guixeleʼ binni de laanu pa puru si de laanu guininu la? zacaca nga zanda guixélecabe de laanu pa cadi jneza gácunu lari.
Pa gáculuʼ lari sexy, laaca zaxeleʼ binni de lii. Pa gáculuʼ lari ni gucaa binni guyadxí lii la? zusihuínniluʼ qué gápaluʼ confianza laca lii ne nácaluʼ presumidu o guiropaʼ ni. Ne zándaca gucaaluʼ binni guiníʼ ique ni nuuluʼ nga guni llamarlu’ atención ne pur nga guiníʼcabe mal de lii.
Jma galán gácaluʼ modestu que guyúbiluʼ guni llamarluʼ atención stiʼ binni. Ti baʼdudxaapaʼ láʼ Mónica guníʼ: «Gáculuʼ lari sencíu qué riníʼ diʼ ni gáculuʼ lari casi ti binni huaniisi, sínuque pa gáculuʼ lari jneza la? zuni respetarluʼ xcaadxi ne laaca zuni respetárcabe lii».
