Toʼoneʼ chéen k-creertik le baʼaxoʼob ku yaʼalik le Bibliaoʼ. Le oʼolaleʼ jeʼex u bin k-maas naʼatikoʼ bey u bin k-kʼexik le baʼax k-creertikoʼ. a

 Le baʼax ku yaʼalik Proverbios 4:18, ku yáantkoʼon k-il baʼaxten maʼalob ka k-beet jujunpʼéel kʼeexoʼob. Teʼeloʼ ku yaʼalik: «U beel le [máaxoʼob toj u kuxtaloʼoboʼ] bey u sáasilil junpʼéel túumben kʼiineʼ; ku bin u jóokʼol jujunpʼíitil tak ken jóom sáasilchajak yéetel tuláakal u muukʼ». Jeʼex u bin u sáastal jujunpʼíitil tak ken sáasilchajak tubeeleʼ, Dioseʼ jujunpʼíitil xan u bin u yeʼesik u jaajil tiʼ le máaxoʼob meyajtikoʼ, tsʼoʼoleʼ u yojel baʼax kʼiin maas maʼalob ka u beete (1 Pedro 1:​10-​12). Le Bibliaoʼ u yaʼalmiliʼeʼ teʼ tu tsʼook kʼiinoʼobaʼ, tiʼ ken u beet u maas séebtal u naʼataʼal u jaajiloʼ (Daniel 12:4).

 Le kʼeexoʼobaʼ maʼ unaj u beetik k-chiʼichnaktal mix u jaʼakʼal k-óoliʼ. Tumen tak le máaxoʼob adorart Dios úuchjeakiloʼ anchaj u kʼexkoʼob jujunpʼéel baʼaxoʼob ku tuklikoʼob yéetel ku creertikoʼob.

•   Moiseseʼ u kʼáat kaʼach u jáalkʼabt le israelitaʼob cuarenta años táanil tiʼ le tiempo u tukultmaj Diosoʼ (Baʼaxoʼob 7:​23-​25, 30, 35).

•   Le apostoloʼoboʼ maʼ tu naʼatoʼob le profecía eʼesik yaan u kíimil yéetel u kaʼa kuxtal le Mesíasoʼ (Isaías 53:​8-​12; Mateo 16:21-​23).

•   Jujuntúul tiʼ le yáax cristianoʼoboʼ maʼ tu jach naʼatoʼob baʼax kʼiin u kʼuchul u kʼiinil Jéeobaiʼ (2 Tesalonicailoʼob 2:​1, 2).

 Ka máan kʼiineʼ Dioseʼ tu yeʼesajtiʼob bix unaj u naʼatkoʼob le baʼaloʼobaʼ. Teʼ kʼiinoʼobaʼ k-kʼáatik xan tiʼ ka seguernak u yeʼesiktoʼon u jaajil (Santiago 1:5).