¿Tiaʼan wa tuláakal tuʼux Dioseʼ?

PAX ICH

Baʼax ku yaʼalik le Bibliaoʼ

Dioseʼ ku yilik tuláakal baʼal yéetel ku meyaj u poder tiʼ jeʼel baʼalak súutukileʼ (Proverbios 15:3; Hebreos 4:13). Chéen baʼaleʼ le Bibliaoʼ maʼ tu yaʼalik wa tiaʼan tuláakal tuʼuxeʼ mix wa tiaʼan tiʼ tuláakal baʼaliʼ. Baʼaxeʼ letiʼeʼ juntúul espíritu yéetel yaan tuʼux kajaʼan.

Bix Dios: Letiʼeʼ juntúul espíritu (Juan 4:24). Le oʼolal mix juntúul wíinik jeʼel u páajtal u yilkeʼ (Juan 1:18). Teʼ tsikbaliloʼob yaan teʼ Bibliaoʼ mix tuʼux ku yaʼalik wa Dioseʼ tuláakal tuʼux yaan (Isaías 6:1, 2; Apocalipsis 4:2, 3, 8).
Tuʼux kajaʼan: Dioseʼ maʼ kajaʼan way yóokʼol kaabeʼ, letiʼeʼ tiʼ kajaʼan teʼ kaʼanoʼ (1 Reyes 8:30). Le Bibliaoʼ ku yaʼalikeʼ juntéenjeakeʼ le ángeloʼoboʼ bin u muchʼubaʼob tu táan Jéeoba. a Leloʼ ku yeʼesikeʼ yaan tuʼux kajaʼan (Job 1:6).

¿Jeʼel wa u kanáantken Dios wa chéen junpʼéeliliʼ tuʼux yaneʼ?

Jeʼeleʼ. Kex kajaʼan teʼ kaʼanoʼ letiʼeʼ u yaabiltmaj le máaxoʼob yanoʼob way Luʼumoʼ. Tsʼoʼoleʼ ku yilik u yáantik le máaxoʼob beetik baʼax uts tu tʼaanoʼ (1 Reyes 8:39; 2 Crónicas 16:9). ¿Bix u yáantkoʼon?

Kéen orarnakoʼon: Jéeoba Dioseʼ ku yuʼubik tuláakal baʼaxoʼob k-aʼaliktiʼ (2 Crónicas 18:31).
Kéen lúubuk k-óol: «Jéeobaeʼ naatsʼ yanil tiʼ le máaxoʼob ku muʼyajoʼoboʼ, ku yáantik le máaxoʼob yaachajaʼan u yóoloʼoboʼ» (Salmo 34:18).
Kéen tsoʼoloktoʼon u nu’uk: Teʼ Bibliaoʼ Jéeobaeʼ ku yaʼaliktoʼon baʼax unaj k-beetik utiaʼal ka xiʼiktoʼon utsil (Salmo 32:8).

Baʼaloʼob maʼ jaajtak ku yaʼalaʼaliʼ

Baʼax ku creertaʼal: Dioseʼ tiaʼan tiʼ tuláakal le baʼaxoʼob u beetmoʼ.

U jaajil: Dioseʼ maʼ kajaʼan way yóokʼol kaabeʼ mix tiʼ le uláakʼ baʼaloʼob u beetmoʼ (1 Reyes 8:27). Le Bibliaoʼ ku yaʼalikeʼ le estrellaʼob yéetel le uláakʼ baʼaloʼob beetaʼanoʼoboʼ táan u yaʼalikoʼob «bukaʼaj nojchil u poder Dios» (Salmo 19:1). Chéen baʼaleʼ lelaʼ maʼ u kʼáat u yaʼal wa tiʼ kajaʼaniʼ. Chéen táan u yeʼesik le jatsʼuts modos yaan tiʼ Diosoʼ jeʼex u poder, u naʼat yéetel u yaabilajoʼ (Romanos 1:20).

Baʼax ku creertaʼal: Wa maʼ tuláakal tuʼux yaan Dioseʼ maʼ tu páajtal u yaʼalaʼal wa yaan u poder yéetel u naʼat.

U jaajil: Le espíritu santooʼ letiʼe poder ku meyaj tiʼ Dios utiaʼal u beetik tuláakal baʼaloʼ. Yoʼolal lelaʼ Dioseʼ u yojel baʼax ku yúuchultoʼon yéetel jeʼel u páajtal u yáantkoʼon kex jeʼel tuʼuxak ka yanakoʼoneʼ (Salmo 139:7).

Baʼax ku creertaʼal: Salmo 139:8 ku yaʼalikeʼ Dioseʼ tuláakal tuʼux yaan. Ku yaʼalik: «Wa ka xiʼiken teʼ kaʼanoʼ, tiʼ yanechiʼ, wa ka xiʼiken teʼ Muknaloʼ, tiʼ xan yanechiʼ».

U jaajil: Le tekstoaʼ maʼ u kʼáat u yaʼal wa Dioseʼ tiaʼan tuláakal tuʼuxeʼ. Baʼaxeʼ chéen táan u yeʼesik letiʼeʼ jeʼel u yáantkoʼon kex jeʼel tuʼuxak ka yanakoʼoneʼ.

a Le Bibliaoʼ ku yaʼalikeʼ u kʼaabaʼ Dioseʼ Jéeoba.