Úuchjeakileʼ Jéeobaeʼ tu yaʼalaj tiʼ le israelitaʼob ka u tsʼáaʼob le diezmooʼ, lelaʼ ku meyaj kaʼach utiaʼal u adorartaʼal. Lelaʼ u diez por cientoil le baʼaloʼob ku yantaltiʼob cada añooʼ. Letiʼeʼ tu yaʼalajtiʼob: «Cada añoeʼ kʼaʼabéet xan a tsʼáaik u diez por cientoil u yich tuláakal le baʼax a pakʼmoʼ» (Deuteronomio 14:22).

 Ichil le leyoʼob tu tsʼáaj Jéeoba tiʼ u kaajil Israeloʼ táakaʼan le ley ku yaʼalik ka u tsʼáaʼob le diezmooʼ. Como xuʼul u meyaj le Leyoʼ le máaxoʼob meyajtik Jéeoba bejlaʼoʼ maʼ tsaaj u tsʼáaikoʼob le diezmooʼ (Colosenses 2:13, 14). Tu lugar leloʼ letiʼobeʼ ku síikoʼob taakʼin yéetel ku beetkoʼob «jeʼex tsʼoʼok u chʼaʼtuklik ichil u puksiʼi[kʼaloʼoboʼ], maʼ yéetel kʼuuxiliʼ mix bey táan u obligartaʼa[loʼobeʼ], tumen Dioseʼ u yaabiltmaj le máax ku síik wa baʼax yéetel kiʼimak óolaloʼ» (2 Corintios 9:7).

•  ¿Baʼax ku yaʼalik le Biblia yoʼolal le diezmo teʼ Tsʼíiboʼob ich Hebreooʼ?

•  ¿Baʼax ku yaʼalik le Biblia yoʼolal le diezmo teʼ Tsʼíiboʼob ich Griegooʼ?

 Le tʼaan diezmooʼ yaʼab u téenel ku chíikpajal teʼ Tsʼíiboʼob ich Hebreooʼ. Le kéen tʼaanak le Biblia yoʼolal le diezmooʼ ku tʼaan tiʼ le kʼiinoʼob ka tsʼaʼab le leyoʼob tiʼ u kaajil Israeloʼ. Chéen baʼaleʼ antes tiʼ leloʼ le Bibliaoʼ tʼaanaj tiʼ jujuntúul máaxoʼob tu tsʼáajoʼob u diez por cientoil le baʼaxoʼob yaantiʼob kaʼachoʼ.

Antes tiʼ le Ley tsʼaʼab tiʼ le Israelitaʼoboʼ

 Abraháneʼ letiʼe yáax máax tu tsʼáaj u diez por cientoil le baʼaxoʼob yaantiʼ kaʼachoʼ (Génesis 14:18-20; Hebreos 7:4). Le diezmo tu tsʼáajoʼ tu síiaj tiʼ le rey táan u beetik kaʼach u sacerdoteil tu kaajil Salemoʼ. Le Bibliaoʼ maʼ tu yaʼalik wa Abraháneʼ tu kaʼa tsʼáaj le diezmooʼ yéetel maʼ tu yaʼalik wa u paalaloʼobeʼ tu tsʼáajoʼob xan.

 Le Bibliaoʼ ku yaʼalikeʼ Jacob u yáabil Abraháneʼ tu tsʼáaj xan u diezmo. Jacobeʼ tu prometertaj tiʼ Jéeobaeʼ wa ku bendecirtaʼaleʼ yaan u tsʼáaik «u diez por cientoil tiʼ tuláakal» le baʼaxoʼob kun antaltiʼoʼ (Génesis 28:20-22). Jujuntúul máaxoʼob xakʼaltik baʼax ku yaʼalik le Bibliaoʼ ku yaʼalikoʼobeʼ maʼ xaaneʼ le diezmo tu tsʼáaj Jacob tiʼ Jéeobaoʼ letiʼe úuchik u sacrificartik baʼalcheʼob utiaʼal u kʼubik tiʼoʼ. Kex Jacob tu tsʼáaj u diezmoeʼ maʼ u kʼáat u yaʼal wa bey xan ken u beetil u paalaloʼob kaʼachoʼ.

Le ka tsʼaʼab le Leyoʼ

 Úuchjeakileʼ le israelitaʼoboʼ kʼaʼabéet kaʼach u tsʼáaik u diezmoʼob utiaʼal u adorarkoʼob Jéeoba.

•   Le diezmo kaʼachoʼ ku meyaj utiaʼal u tsʼaʼabal baʼax kʼaʼabéet tiʼ le levitaʼoboʼ. Letiʼob kaʼacheʼ minaʼan u luʼumoʼob utiaʼal u meyajtoʼob yéetel yéeyaʼanoʼob utiaʼal u beetik u sacerdoteiloʼob (Números 18:20, 21). Le levitaʼob maʼ táan u beetik u sacerdoteiloʼob kaʼachoʼ ku chʼaʼikoʼob u diez por cientoil le baʼaxoʼob ku tsʼaʼabaltiʼoboʼ yéetel u tsʼáaikoʼob tiʼ le levitaʼob táan u beetik u sacerdoteiloʼoboʼ (Números 18:26-29).

•   Le Bibliaoʼ ku yaʼalikeʼ yaan uláakʼ diezmo ku tsʼaʼabal cada año utiaʼal u yáantaʼal le levitaʼoboʼ bey xan le maʼ levitaʼoboʼ (Deuteronomio 14:22, 23). Le diezmoaʼ ku meyaj tiʼ le israelitaʼob utiaʼal u beetkoʼob jujunpʼéel fiestaʼob utiaʼal Jéeoba. Tsʼoʼoleʼ ku tsʼaʼabal xan tiʼ le óotsiloʼob utiaʼal u yáantaʼaloʼoboʼ (Deuteronomio 14:28, 29; 26:12).

 ¿Bix u yojéeltik kaʼach le israelitaʼob bukaʼaj le diezmo ken u tsʼáaʼoboʼ? Cada añoeʼ le israelitaʼoboʼ ku jóoʼskoʼob u diez por cientoil u yich u paakʼaloʼoboʼ (Levítico 27:30). Chéen baʼaleʼ wa ku chʼaʼtuklikoʼob u tsʼáaikoʼob taakʼin tu lugar u yich u paakʼaloʼobeʼ kʼaʼabéet u tsʼáaikoʼob junpʼíit maas tiʼ u tojol le diez por cientooʼ (Levítico 27:31). Tsʼoʼoleʼ «tiʼ u yalakʼ wakaxoʼob yéetel tiʼ u yalakʼ tamanoʼobeʼ» unaj u tsʼáaikoʼob «juntúul tiʼ cada diez[iʼ]» (Levítico 27:32).

 ¿Bix túun ken u calculart le israelitaʼob jaytúul wakaxoʼob ken u tsʼáaʼob bey diezmoeʼ? Aʼalaʼabtiʼobeʼ unaj u tsʼáaikoʼob juntúul tiʼ cada diez baʼalcheʼob kun máan yáanal le cheʼ ku meyaj tiʼ le j-kanan taman utiaʼal u xokikoʼoboʼ. Le Leyoʼ ku yaʼalik kaʼacheʼ maʼ unaj u yilkoʼob wa maʼalob wa maʼ maʼalob le baʼalcheʼoʼ mix unaj u kʼexkoʼobiʼ. Tsʼoʼoleʼ maʼ unaj xan u tsʼáaikoʼob taakʼin tu lugar le baʼalcheʼoboʼ (Levítico 27:32, 33). Chéen baʼaleʼ le uláakʼ diezmo ku tsʼáaikoʼob cada año wa le ku meyaj utiaʼal u beetaʼal le fiestaʼoboʼ jeʼel u páajtal u tsʼáaikoʼob taakʼin tu lugar baʼalcheʼobeʼ. Beyoʼ ku yáantaʼal le israelitaʼob desde náach ku taaloʼob utiaʼal u yantaloʼob teʼ fiestaʼoboʼ (Deuteronomio 14:25, 26).

 ¿Baʼax kʼiin unaj u tsʼáaikoʼob kaʼach le israelitaʼob le diezmooʼ? Cada año unaj u tsʼáaikoʼob kaʼachi (Deuteronomio 14:22). Chéen baʼaleʼ cada siete añoseʼ maʼatech u tsʼáaikoʼob le diezmooʼ tumen junpʼéel año especial utiaʼal Jéeoba, le oʼolal ku jeʼeleloʼob yéetel maʼatech u meyajtikoʼob u luʼumoʼob (Levítico 25:4, 5). Tsʼoʼoleʼ tu yáamil le siete añosoʼ tu tres añosil yéetel tu seis añosileʼ unaj u tsʼáaikoʼob le u kaʼapʼéel diezmo tiʼ le óotsiloʼoboʼ bey xan tiʼ le levitaʼoboʼ (Deuteronomio 14:28, 29).

 ¿Ku castigartaʼal wa le israelitaʼob kaʼach wa maʼ tu tsʼáaikoʼob le diezmooʼ? Maʼatech, le leyoʼ maʼatech u yaʼalik wa yaan u castigartaʼaloʼob. Letiʼob kaʼacheʼ ku tsʼáaik u diezmoʼob utiaʼal u pʼáatloʼob utsil tu táan Jéeoba yéetel utiaʼal u kʼáatkoʼob ka bendecirtaʼakoʼob tumen letiʼ (Deuteronomio 26:12-15). Wa maʼ tu tsʼáaikoʼob le diezmooʼ bey ka u yokloʼob Jéeobaeʼ (Malaquías 3:8, 9).

 ¿Jach yaʼab wa le diezmo aʼalaʼab ka u tsʼáaʼoboʼ? Maʼatech, chéen baʼaleʼ Jéeobaeʼ tu yaʼalaj tiʼ le kaajoʼ wa maʼ tu tsʼáaik u diezmoʼobeʼ maʼ ken u bendecirtoʼob yéetel maʼ ken u tsʼáa baʼax kʼaʼabéettiʼob (Malaquías 3:10). Wa maʼ tu tsʼáaikoʼob le diezmooʼ ku bin kʼaasil tiʼob. Tsʼoʼoleʼ como maʼatech u tsʼáaikoʼob baʼaxoʼob kʼaʼabéet tiʼ le levitaʼoboʼ maʼatech u jóoʼskoʼob u yutsil le meyaj ku beetkoʼoboʼ (Nehemías 13:10; Malaquías 3:7).

 Le tiaʼan Jesús kaʼach way Luʼumeʼ láayliʼ ku tsʼaʼabal le diezmo utiaʼal u adorartaʼal Jéeobaoʼ. Chéen baʼaleʼ le ka tu kʼubaj u kuxtal Jesúseʼ xuʼul u meyaj le diezmo utiaʼal u adorartaʼal Diosoʼ.

Tu kʼiiniloʼob Jesús

 Le Tsʼíiboʼob ich Griego wa Nuevo Testamentooʼ ku yaʼalikeʼ le tiaʼan Jesús way Luʼumeʼ le israelitaʼoboʼ láayliʼ ku tsʼáaikoʼob kaʼach le diezmooʼ. Jesúseʼ u yojleʼ kʼaʼabéet u tsʼaʼabal le diezmooʼ. Chéen baʼaleʼ tu yileʼ u nuuktakil le religiónoʼoboʼ jach importante u yilkoʼob u tsʼaʼabal le diezmooʼ, pero tu maʼ tu beetkoʼob «le baʼaxoʼob maas kʼaʼanaʼantak ku yaʼalik le Leyaʼ: u beetaʼal justicia, u chʼaʼabal óotsilil bey xan u chúukpajal u yóol máak» (Mateo 23:23).

Le ka tsʼoʼok u kíimil Jesúsoʼ

 Le diezmooʼ xuʼul u meyaj le ka tu kʼubaj u kuxtal Jesúsoʼ. Como xuʼul le Ley tsʼaʼab tiʼ le israelitaʼoboʼ xuʼul xan le ley tuʼux ku kʼáataʼal «u diez por cientoil tiʼ le baʼaloʼob yaan tiʼ le kaajoʼ» (Hebreos 7:5, 18; Efesios 2:13-15; Colosenses 2:13, 14).