CÉSAR yéetel Rocío, u yataneʼ, maʼalob kajlikoʼob kaʼach California. Cesareʼ bul kʼiin ku meyaj kaʼach tiʼ calefacción, ventilación yéetel aire acondicionado. U yataneʼ ku meyaj chéen chúumuk kʼiin tiʼ junpʼéel consultorio. Le naj tuʼux kajaʼanoʼoboʼ u tiaʼaloʼob yéetel minaʼan u paalaloʼob. Chéen baʼaleʼ úuch junpʼéel baʼal tu kʼexaj u kuxtaloʼob.

Tu mesil octubre tiʼ 2009, u najil Betel yaan Estados Unidoseʼ tu túuxtaj junpʼéel carta tiʼ tuláakal le múuchʼuliloʼob yaan teʼ luʼumiloʼ. Teʼ cartaoʼ aʼalaʼabeʼ le máaxoʼob u yojloʼob jejeláas meyajoʼoboʼ jeʼel u páajtal u chupik u solicitudoʼob utiaʼal ka xiʼikoʼob áantaj teʼ meyaj táan u beetaʼal Wallkilloʼ (Nueva York). Invitartaʼab tak le máaxoʼob tsʼoʼok u máan u edabil u chupik u solicitudoʼob utiaʼal u yookloʼob meyaj Beteloʼ. César yéetel Rocíoeʼ ku yaʼalikoʼob: «Tumen tsʼoʼok u chan antal k-edabeʼ, maʼ xaaneʼ maʼ ken k-kaʼa invitartbil wa maʼ t-kʼamik le invitacionoʼ». ¿Baʼax túun tu beetoʼob? Tu séebaʼanil tu chupaj u solicitudoʼob.

Máan maas tiʼ u año táan u páaʼtik u invitartaʼaloʼob. Kex beyoʼ tu yiloʼob bix jeʼel u kuxtaloʼob chéen yéetel junpʼíit baʼaloʼobeʼ. Cesareʼ ku yaʼalik: «Máanoʼon kajtal teʼ tuʼux k-tsʼáaik coche kaʼachoʼ, beyoʼ t-tsʼáaj rentarbil le nojoch naj tuʼux yanoʼonoʼ. Jóokʼoʼon tiʼ le jatsʼuts naj jach úuch joʼopʼok k-tsʼíiboltik u yantaltoʼonoʼ, u nojchil tuláakal le najoʼ 200 metros. Kex maʼ úuch k-beeteʼ t-pʼataj, ka máanoʼon kajtal tuʼux k-tsʼáaik kaʼach le cocheoʼ, lelaʼ 25 metros u nojchil. Le baʼax t-beetoʼ yaan u yáantkoʼon kaʼach utiaʼal k-kʼamik le invitación ken u beet u najil Betel, wa k-invitartaʼaloʼ». ¿Baʼax túun úuchi? Rocíoeʼ ku yaʼalik: «Ka máan u meseʼ invitartaʼaboʼon utiaʼal ka xiʼikoʼon áantaj teʼ meyajoʼob táan u beetaʼal Wallkilloʼ. T-ileʼ úuchik k-kʼexik k-kuxtaleʼ, Jéeobaeʼ tu bendecirtoʼon».

Jeʼex César yéetel Rocíoeʼ, yaʼab sukuʼunoʼob yéetel kiikoʼobeʼ táan u beetkoʼob jujunpʼéel kʼeexoʼob utiaʼal ka xiʼikoʼob áantaj teʼ meyaj ku beetaʼal tu kaajil  Nueva Yorkoʼ. Yanoʼobeʼ táan u yáantajoʼob utiaʼal u nojochkíintaʼal u najil Betel yaan Wallkilloʼ, yéetel uláakʼoʼobeʼ ku binoʼob áantaj teʼ meyajoʼob táan u beetaʼal teʼ tuʼux kun nuʼuktbil tuláakal le meyajoʼob ku beetik u j-jaajkunajoʼob Jéeobaoʼ, lelaʼ tiʼ yaan tu kaajil Warwickeʼ. * Yaʼab sukuʼunoʼob yéetel kiikoʼob tsʼokaʼan u beeloʼobeʼ tsʼoʼok u pʼatik u yotochoʼob, u meyajoʼob bey xan u yaalakʼoʼob utiaʼal u maas meyajtikoʼob Jéeoba. ¿Tsʼoʼok wa u yilkoʼob bix u bendecirtaʼaloʼob tumen Jéeoba? Tsʼoʼoki.

Way, juntúul sukuʼun electricista, yéetel Debra, u yataneʼ, yaan óoliʼ 60 años tiʼob. Letiʼobeʼ tu konaj u yotochoʼob bey xan yaʼab tiʼ le baʼaloʼob yaantiʼob tu kaajil Kansasoʼ, tsʼoʼoleʼ binoʼob kajtal Wallkill utiaʼal ka áantajnakoʼob tiʼ le meyajoʼob ku beetaʼal tu najil Beteloʼ. * Kex anchaj u kʼexik u kuxtaloʼobeʼ, tsʼoʼok u yilkoʼob maʼ chéen kunel le baʼax tu beetoʼoboʼ. Yoʼolal le meyaj ku beetik Beteloʼ, Debraeʼ ku yaʼalik: «Yaan kʼiineʼ kin wuʼuyik bey tiaʼanen teʼ Paraíso ku yeʼesaʼal teʼ publicacionoʼob tuʼux ku yilaʼal le sukuʼunoʼob táan u líiʼskoʼob najoʼoboʼ».

Melvin yéetel Sharon, kajaʼanoʼob Carolina del Sureʼ, tu konaj u yotochoʼob bey xan baʼaxoʼob yaantiʼob utiaʼal u binoʼob áantaj Warwick. Kex maʼ chéen chʼaʼabil le baʼax tu beetoʼoboʼ, jach jatsʼuts u yilik u yáantajoʼob. Letiʼobeʼ ku yaʼalikoʼob: «Ku taasik kiʼimak óolal k-ojéeltik táan k-áantaj utiaʼal u yutsil k-sukuʼunoʼob tiʼ tuláakal yóokʼol kaab, minaʼan uláakʼ baʼax beetik k-uʼuyikba beyaʼ».

Kennetheʼ, juntúul sukuʼun jubilartaʼan yéetel ku beetik najoʼob kaʼachi. U yataneʼ, Maureen, tu kaʼatúulaloʼobeʼ yaan maas tiʼ 50 años tiʼob. Letiʼobeʼ lukʼoʼob California utiaʼal u binoʼob áantaj Warwick. Táanil tiʼ u binoʼobeʼ tu kʼáatoʼob tiʼ juntúul kiik teʼ múuchʼulil wa jeʼel u bin u kanáant u yotochoʼobeʼ. Tu kʼáatoʼob xan tiʼ u láakʼtsiloʼob ka u kanáantoʼob u taata le sukuʼun Kenoʼ, tumen tsʼoʼok u chʼíijil. ¿Ku arrepentiroʼob wa yoʼolal le baʼaxoʼob anchaj u beetkoʼob utiaʼal u binoʼob meyaj tu najil Beteloʼ? Keneʼ ku yaʼalik: «Yaʼab utsiloʼob táan k-kʼamik. Kex maʼ chéen chʼaʼabileʼ, kiʼimak k-óol. K-invitartik u maasil utiaʼal u beetkoʼob xan beyoʼ».

Yaʼab tiʼ le máaxoʼob ku binoʼob áantajoʼ yaan baʼax tsʼoʼok u aktáantkoʼob. Jeʼex William yéetel Sandraeʼ, letiʼobeʼ yaantiʼob junpʼíit maas tiʼ 60 años yéetel maʼalob kajlikoʼob kaʼach Pensilvania. Yaantiʼob kaʼach junpʼéel chan empresa tuʼux ku beetaʼal u piezasil maquinaʼob, teʼelaʼ 17 máakoʼob ku meyajoʼobiʼ. Desde tu chichniloʼobeʼ mix juntéen u kʼex u múuchʼuliloʼob yéetel naatsʼ kajaʼaniloʼob tiʼ u láakʼtsiloʼob. Le  ka invitartaʼaboʼob áantaj teʼ meyajoʼob ku beetaʼal Wallkilloʼ, tu yiloʼobeʼ yaan kaʼach u kʼaʼabéettal u pʼatkoʼob tuláakal le máaxoʼob u kʼaj óoloʼob bey xan le baʼaxoʼob suukaʼan tiʼob teʼ tuʼux líikʼoʼoboʼ. Williameʼ ku yaʼalik: «Baʼax maas talamchaj toʼoneʼ letiʼe k-pʼatik tuláakal baʼax yaantoʼonoʼ». Ka tsʼoʼok u sen oraroʼobeʼ tu chʼaʼtuklaj u binoʼob, yéetel maʼ arrepentirnakoʼob yoʼolal le baʼax tu beetoʼoboʼ. Williameʼ ku yaʼalik: «Yéetel mix baʼal jeʼel u páajtal u keʼetel k-múul meyaj yéetel le sukuʼunoʼob yanoʼob tu najil Beteloʼ. Teen yéetel Sandraeʼ, ¡mix juntéen k-uʼuy kaʼach le kiʼimak óolal yaantoʼon bejlaʼaʼ!».

Rickyeʼ, ku nuʼuktik kaʼach junpʼéel construcción ku beetaʼal Hawái, letiʼeʼ invitartaʼab utiaʼal ka xiʼik áantaj teʼ meyaj ku beetaʼal Warwickoʼ. Kendra, u yataneʼ, u kʼáat ka kʼaʼamak le invitación tumen u yíichamoʼ. Chéen baʼaleʼ yaan baʼax chiʼichnakkúuntikoʼob kaʼachi, bix ken u yuʼubiluba Jacob, u hijoʼob, tumen chéen 11 años yaantiʼ. Xáanchaj táan u tuklikoʼob wa maʼalob ka xiʼikoʼob kajtal tu kaajil Nueva York, tumen maʼ u yojloʼob wa jeʼel u suuktal Jacob táanxel tuʼuxeʼ.

Rickyeʼ ku yaʼalik: «Toʼoneʼ taak k-kaxtik kaʼach junpʼéel múuchʼulil tuʼux yaan táankelmoʼob u tsʼaamaj u yóol u meyajtoʼob Jéeoba. K-kʼáat ka yanak maʼalob amigoʼob tiʼ Jacob». Tu tsʼookeʼ pʼáatoʼob tiʼ junpʼéel múuchʼulil tuʼux maʼ jach yaʼab paalaloʼob yaniʼ, chéen baʼaleʼ tiʼ ku bin yaʼab táankelem betelitaʼobiʼ. Rickyeʼ ku seguer u yaʼalik: «Ka tsʼoʼok le yáax muchʼtáambaloʼ tin kʼáataj tiʼ Jacob bix u yuʼubikuba teʼ túumben múuchʼulil kex minaʼan uláakʼ paalaloʼob igual tu yéeteloʼ. Ka tu yaʼalajten: ‹Maʼ a tuklik papi, yéetel le betelitaʼob ken in bisinbaoʼ›».

Jach bey úuchik xanoʼ. Bejlaʼeʼ maʼalob u biskuba Jacob yéetel le táankelmoʼob yanoʼob Beteloʼ. Lelaʼ ¿bix tu yáantilak Jacob? Rickyeʼ ku yaʼalik: «Junpʼéel áakʼab ka máanen tu jool u cuartoeʼ tin wilaj láayliʼ tʼaabal le luzoʼ. Tin tuklaj chéen táan u báaxtik junpʼéel videojuegoeʼ, ¡táan bakáan u xokik le Bibliaoʼ! Ka tin kʼáatajtiʼ baʼax ku beetkeʼ tu yaʼalajten: ‹Juntúul betelitaen yéetel yaan in láaj xokik le Biblia ichil junpʼéel añooʼ›». Ricky yéetel Kendraeʼ jach kiʼimak u yóoloʼob. Rickyeʼ béeychaj u yáantaj teʼ meyajoʼob ku beetaʼal Warwickoʼ, tsʼoʼoleʼ úuchik u binoʼob kajtal táanxel tuʼuxeʼ Jacobeʼ táan u maas tsʼáaik u yóol u meyajt Dios (Pro. 22:6).

Le meyajoʼob ku beetaʼal Wallkill yéetel Warwickoʼ yaan u kʼuchul u kʼiinil u tsʼoʼokol, le oʼolal le máaxoʼob ku meyajoʼoboʼ yaan u xuʼulul u yáantajoʼobiʼ. ¿Chiʼichnak wa le sukuʼunoʼob tu yoʼolal tuʼux kun binoʼob wa baʼax ken u beetoʼob ken tsʼoʼokok le meyajoʼ? Maʼatech. Yaʼab tiʼ letiʼobeʼ ku yuʼubikubaʼob jeʼex  le sukuʼunoʼob ken k-chʼaʼchiʼit beoraaʼ. Letiʼobeʼ tiʼ kajaʼanoʼob Floridaeʼ yéetel maʼ jach anak u edaboʼobiʼ. Johneʼ, juntúul máax nuʼuktik junpʼéel construcción, letiʼ yéetel Carmen, u yataneʼ, tiʼ ku yáantajoʼob Warwickeʼ. Letiʼobeʼ ku yaʼalikoʼob: «Tak bejlaʼeʼ Jéeobaeʼ táan u tsʼáaiktoʼon baʼax kʼaʼabéet. Yéetel k-ojel Jéeobaeʼ maʼ ken u xúumpʼattoʼon ken tsʼoʼokok le meyajoʼ» (Sal. 119:116). Luiseʼ, juntúul máax beetik baʼaxoʼob ku meyaj utiaʼal u tuʼupul kʼáakʼ, letiʼ yéetel Quenia, u yataneʼ, tiʼ ku meyajoʼob Wallkilleʼ. Letiʼobeʼ ku yaʼalikoʼob: «Jéeobaeʼ mantatsʼ ku tsʼáaiktoʼon baʼax kʼaʼabéet. Kex maʼ k-ojel tuʼux, baʼax kʼiin  yéetel bix ken u beetileʼ, k-ojel yaan u seguer u kanáantkoʼon» (Sal. 34:10; 37:25).

Yaʼab tiʼ le sukuʼunoʼob tsʼoʼok u binoʼob áantaj Nueva Yorkoʼ, maʼ xaaneʼ jeʼel kaʼach u kaxtikoʼob baʼax u yaʼaloʼob utiaʼal maʼ u binoʼobeʼ. Chéen baʼaleʼ jeʼex u yaʼalik le Bibliaoʼ tu probartoʼob Jéeoba utiaʼal u yilkoʼob wa jach tu jaajil jeʼel u yáantaʼaloʼobeʼ (Mal. 3:10).

Kux túun teech, ¿yaan wa a chaʼik u yáantkech Jéeoba? Tsikbalttiʼ le baʼax taak a beetkoʼ yéetel ilawil wa jeʼel u páajtal a wáantaj Nueva York wa tiʼ uláakʼ tuʼux kʼaʼabéeteʼ, wa ka beetkeʼ yaan a wilik bix ken u yáantilech (Mar. 10:29, 30).

Dale, juntúul ingeniero, yéetel Cathy, u yataneʼ, tiʼ u taaloʼob Alabamaeʼ. Letiʼobeʼ ku meyajoʼob Walkill yéetel ku yaʼalikoʼob tiʼ u maasil ka xan u meyajtoʼob Jéeoba beyaʼ. Ku yaʼalikoʼob: «Wa ka chʼaʼtuklik a beetik junpʼéel túumben meyajeʼ, yaan a wilik bix ken u yáantilech u kiliʼich muukʼ Jéeoba». ¿Baʼax jeʼel a beetik wa taak a wáantajeʼ? Daleeʼ ku yaʼalik baʼax jeʼel a beetkeʼ: «Kuxlen yéetel junpʼíit baʼal, ilawil a kuxtal yéetel junpʼíit baʼal, chéen yéetel junpʼíit baʼal. ¡Mix bikʼin kun yaatal a wóol wa ka beetik!». Garyeʼ, tiʼ u taal Carolina del Norteeʼ, letiʼeʼ tsʼoʼok 30 años joʼopʼok u nuʼuktik le meyaj tiʼ construccionoʼ. Letiʼ yéetel Maureen, u yataneʼ, ku meyajoʼob Warwick yéetel kiʼimak u yóoloʼob ikil «u múul meyajoʼob yéetel le sukuʼunoʼob bey xan le kiikoʼob úuch joʼopʼok u meyajtikoʼob Jéeoba tu najil Beteloʼ». Garyeʼ ku yaʼalik: «Utiaʼal u meyaj máak tu najil Beteleʼ kʼaʼabéet u kiʼimaktal u yóol máak yéetel junpʼíit baʼal, lelaʼ letiʼe bix maas maʼalob ka kuxlak máak teʼ kʼasaʼan yóokʼol kaabaʼ». Jasoneʼ, ku meyaj bey electricista tiʼ junpʼéel empresaeʼ, letiʼ yéetel Jennifer, u yataneʼ, tiʼ u taaloʼob Illinoiseʼ. Letiʼobeʼ ku yaʼalikoʼobeʼ u táakpajloʼob tiʼ junpʼéel nojoch meyaj jeʼex le táan u beetaʼal Wallkilloʼ «bey jeʼex ka kuxlak máak teʼ túumben luʼumoʼ». Jennifereʼ ku yaʼalik xan: «Jach ku kiʼimaktal u yóol máak ken u tukult nojoch baʼal u yilik Jéeoba le baʼax táan u beetkoʼ, bey xan u kʼaʼajsik mix bikʼin kun tuʼubsbil. Tsʼoʼoleʼ Jéeobaeʼ yaan u bendecirtikech».