WA JAYPʼÉEL jaʼab paachileʼ Roald yéetel Elsebeth, yaan kex 50 jaʼaboʼob tiʼobeʼ maʼalob u kuxtaloʼob kaʼach Bergen, u kaʼapʼéel kaaj maas nojoch yaan tu luʼumil Noruega. Tiʼ junpʼéeliliʼ múuchʼulil ku binoʼob yéetel Isabel bey xan Fabian, u paalaloʼob. Roaldeʼ anciano yéetel Elsebetheʼ precursora. Isabel yéetel Fabianeʼ u tsʼaamaj u yóoloʼob kʼaʼaytaj.

Le familiaaʼ tu chʼaʼtuklaj u bin kʼaʼaytaj ichil junpʼéel semana tiʼ junpʼéel tuʼux chan náach. Bey túunoʼ tu mesil septiembre tiʼ 2009, Roald, Elsebeth yéetel Fabian tsʼoʼok 18 jaʼaboʼob tiʼeʼ, binoʼob tu peninsulail Nordkinn (Finnmark). Teʼelaʼ tiaʼan u kaajil Kjøllefjord, teʼeloʼ múul kʼaʼaytajnajoʼob yéetel uláakʼ sukuʼunoʼob bijaʼanoʼobiʼ. Roaldeʼ ku yaʼalik: «Tu káajbaleʼ jach kiʼimak in wóol ikil in beetik tuláakal le ku páajtal utiaʼal in kʼaʼaytaj teʼ semanaoʼ». Baʼaleʼ úuch junpʼéel baʼax beet u chiʼichnaktal. ¿Baʼaxiʼ?

Roaldeʼ tu yaʼalaj: «Mario, juntúul precursor yaan Finnmarkeʼ, tu kʼáataj wa jeʼel k-bin áantaj tu múuchʼulil Lakselv tuʼux yaan 23 j-kʼaʼaytajoʼob, lelaʼ maʼ táan in páaʼtik kaʼachiʼ». Teʼ súutukoʼ Roaldeʼ maʼ tu kaxtaj baʼax u yaʼaliʼ. Letiʼeʼ ku yaʼalik: «Teen yéetel Elsebetheʼ k-tukultmaj k-bin áantaj tuʼux kʼaʼabéet j-kʼaʼaytajoʼob. Baʼaleʼ k-tukultmaj k-beetik ken pʼáatkoʼon chéen kaʼatúuloʼon». Ka máan wa jaypʼéel kʼiinoʼob táan u kʼaʼaytajoʼobeʼ Roaldeʼ tu tsʼáaj cuenta jach taak u xook le máakoʼoboʼ. Kʼaʼabéet u séeb áantaʼaloʼob, Roaldeʼ ku yaʼalik: «Le baʼax tu yaʼalajten Mariooʼ chéen le ku máan tin tuukul, yaʼab u téenel maʼ tu chaʼaj in weenliʼ». Marioeʼ tu bisaj tiʼ coche Roald yéetel u familia u kʼaj óoltoʼob le chan múuchʼulil yaan tu kaajil Lakselvoʼ, kex 60 leguas (240 kilómetros) yanil tu lakʼin Kjøllefjord.

Andreas, juntúul tiʼ le ancianoʼoboʼ, tu bisoʼob u kʼaj óoltoʼob le kaajoʼ bey xan u Najil Reino. Le sukuʼunoʼoboʼ kiʼimak u yóoloʼob tu kʼamiloʼob Roald yéetel Elsebeth, tu yaʼaloʼobeʼ jach maʼalob wa ka pʼáatkoʼob kʼaʼaytaj teʼeloʼ. Andreaseʼ táan u sak cheʼej ka tu yaʼalaj tsʼoʼok tak u kaxtik tuʼux jeʼel u meyaj Roald yéetel Fabianeʼ. ¿Baʼax túun ken u chʼaʼtukult u beetkoʼob?

Yáax baʼax tu yaʼalaj Fabianeʼ: «Teneʼ maʼ taak in taal kajtal wayeʼ». Letiʼeʼ maʼ uts tu tʼaan u kajtal tiʼ junpʼéel chan kaaj yéetel u pʼatik u amigoʼob yaan tu múuchʼuliloʼ. Tsʼoʼoleʼ táan u xook utiaʼal u beetik u electricistail. Ka kʼáataʼab tiʼ Isabel, yaan kaʼach 21 jaʼaboʼob tiʼ, wa u kʼáat pʼáatal teʼ kaajoʼ tu núukaj: «¡Letiʼe baʼax kin tsʼíiboltikoʼ!». Baʼaleʼ tu yaʼalaj xan: «Wa maas kin tuklikeʼ, maas maʼ in wojel wa maʼalob le baʼax k-tuklik k-beetkoʼ. ¿Yaan wa in tuklik in amigoʼob? ¿Unaj wa in pʼáatal tin múuchʼulil tuʼux maʼalob u binten?». Elsebeth xaneʼ tu yaʼalaj: «Tin wuʼuyaj bey Jéeoba tsʼáaiktoʼon junpʼéel meyajeʼ, baʼaleʼ joʼopʼ xan in tuukul tiʼ le k-otoch maʼ úuch k-beet u maas jatsʼutstaloʼ yéetel tiʼ uláakʼ baʼaloʼob tsʼoʼok u yantaltoʼon ichil veinticinco jaʼaboʼob».

Ka tsʼoʼok le semanaoʼ, Roald yéetel u familiaeʼ suunajoʼob Bergen. Baʼaleʼ maʼ xuʼul u tuukuloʼob tiʼ le sukuʼunoʼob kajaʼanoʼob Lakselv, kex óoliʼ 550 leguas (2,100 kilómetros) yaniloʼoboʼ. Elsebetheʼ ku yaʼalik: «Yaʼab u téenel payalchiʼinajen yéetel maʼ xuʼul in tʼanik le sukuʼunoʼob t-kʼaj óoltoʼ. T-túuxtajtiʼob fotoʼob yéetel tu túuxtoʼobtoʼon xaniʼ, tsʼoʼoleʼ t-múul tsikbaltaj experienciaʼob». Roaldeʼ ku yaʼalik: «Kʼaʼabéetten kaʼach tiempo utiaʼal in chʼaʼtuklik baʼax ken in beete. Unaj in tuklik bix jeʼel k-kaxtik k-kuxtaleʼ. Payalchiʼinajen mantatsʼ, tsikbalnajen yéetel in familia bey xan yéetel sukuʼunoʼob úuch joʼopʼok u meyajtikoʼob Dios». Fabianeʼ ku yaʼalik: «Wa maas kin tuklikeʼ maas kin tsʼáaik cuenta minaʼan baʼax oʼolal in waʼalik maʼ tu páajtal in bin. Jach payalchiʼinajen yéetel káaj in maas tsʼíiboltik in bin». ¿Kux túun Isabel? Utiaʼal u líiʼskuba wa ku binoʼobeʼ káaj u beetik u precursorail tu múuchʼulil. Ka máan seis meses táan u beetik u precursorail yéetel u jóoʼsik maas tiempo utiaʼal u xakʼalxoktik le Bibliaoʼ, tu yuʼubaj jeʼel u páajtal u bineʼ.

Jeʼex u bin u maas tsʼíiboltkoʼob u binoʼob áantaj tuʼux maas kʼaʼabéeteʼ, yaan baʼax tu beetoʼob utiaʼal u béeytal. Roaldeʼ kex maʼalob u boʼotaʼal yéetel uts tu yich u meyajeʼ, tu kʼáataj permiso utiaʼal maʼ u meyaj junpʼéel jaʼab. Baʼaleʼ chéen utiaʼal u pʼáatleʼ aʼalaʼabtiʼ tumen u patroneʼ jeʼel u páajtal u meyaj kaʼapʼéel semanaeʼ yéetel u jeʼelel seis semanaʼob. Roaldeʼ ku yaʼalik: «Pʼáat maas junpʼíit in náajal, baʼaleʼ bin utsil toʼon».

Elsebetheʼ ku yaʼalik: «In wíichameʼ tu yaʼalajten ka in kaxt junpʼéel naj tu kaajil Lakselv yéetel ka in tsʼáa rentartbil le naj yaantoʼon tu kaajil Bergenoʼ. Kex talamchaj yéetel tu bisajtoʼon tiempoeʼ, béeychaji. Ka máan kʼiineʼ Fabian yéetel Isabeleʼ tu kaxtoʼob junpʼéel meyaj maʼ yaʼab tiempo ku bisiktiʼobiʼ yéetel ku yáantajoʼob utiaʼal le jaanloʼ yéetel utiaʼal k-pasaje».

Isabeleʼ ku yaʼalik: «Tumen chichan le kaaj tuʼux binoʼonoʼ, baʼax maas talamchajteneʼ in kaxtik junpʼéel meyaj ka u chaʼa in beetik in precursorail. Yaan kʼiineʼ tin tuklaj maʼ kun béeytal». Kex beyoʼ Isabeleʼ anchaj tuláakal baʼax kʼaʼabéettiʼ tumen tu kʼamaj tuláakal le meyajoʼob maʼ tu bisiktiʼ yaʼab tiempooʼ, tu chukaj nueve teʼ yáax jaʼaboʼ. ¿Kux túun Fabian? Letiʼeʼ ku yaʼalik: «Utiaʼal in tsʼoʼoksik  in xookeʼ kʼaʼabéet in kaxtik junpʼéel meyaj kex chéen de secreil, lelaʼ tin kaxtaj tu kaajil Lakselv. Ka tsʼoʼokeʼ tin beetaj in examen yéetel tin máansaj. Tsʼoʼoleʼ ooken meyaj de electricistail tiʼ junpʼéel tuʼux maʼ jach bul kʼiiniʼ».

Marelius yéetel Kesia, u yataneʼ, u kʼáatoʼob xan kaʼach bin áantaj tuʼux maas kʼaʼabéet. Marelius, yaan 29 jaʼaboʼob tiʼeʼ, ku yaʼalik: «Le entrevistaʼob yéetel le tsoltʼaanoʼob ku máansaʼal teʼ asambleaʼob yoʼolal le meyaj ku beetik le precursoroʼoboʼ tu yáanten in wil jeʼel u páajtal in maas tsʼáaik in wóol kʼaʼaytajeʼ». Baʼaleʼ utiaʼal Kesia, yaan 26 jaʼaboʼob tiʼeʼ, talam u yilik u bin kajtal táanxel tuʼux. Letiʼeʼ ku yaʼalik: «Ku yaatal in wóol in tuklik yaan in náachtal tiʼ le máaxoʼob in yaabiltmoʼ». Uláakʼ baʼax tu aktáantoʼobeʼ, Mareliuseʼ yaʼab u meyaj utiaʼal u boʼotik u yotochoʼob, tumen u empeñarmoʼob u juʼunil. Letiʼeʼ ku yaʼalik: «Sen payalchiʼinajoʼon tiʼ Jéeoba utiaʼal u yáantkoʼon k-beet baʼax kʼaʼabéet utiaʼal u páajtal k-bin, úuchik u yáantkoʼoneʼ béeychaji». Yáax baʼax tu beetoʼobeʼ u jóoʼskoʼob maas tiempo utiaʼal u xakʼalxoktikoʼob le Bibliaoʼ. Tsʼoʼoleʼ tu konaj u yotochoʼob, tu pʼataj u meyajoʼob, yéetel tu mesil agosto tiʼ 2011, binoʼob Alta, junpʼéel kaaj yaan tu xaman Noruega, yéetel tiʼ ku beetik u precursoriloʼobiʼ. Utiaʼal u kaxtik u kuxtaloʼobeʼ Mareliuseʼ ku bisik u registroil bukaʼaj náajal yéetel bukaʼaj xuup ku beetaʼal tuʼux ku meyaj (contador) yéetel Kesiaeʼ ku meyaj tiʼ junpʼéel tienda.

Knut yéetel Lisbeth, u yatan, yaan junpʼíit maas tiʼ treinta jaʼaboʼob tiʼobeʼ, le ka tu xokoʼob teʼ Anuario yoʼolal le sukuʼunoʼob ku binoʼob áantaj tuʼux maas kʼaʼabéetoʼ, jach kʼuch tu puksiʼikʼaloʼob. Lisbetheʼ ku yaʼalik: «Le baʼaxoʼob t-xokoʼ jach tu beetaj k-tuklik wa jeʼel u páajtal k-bin áantaj táanxel luʼumileʼ. Teneʼ maʼ jach taak in bin kaʼachiʼ, tumen kin tuklikeʼ juntúul máax jeʼex teneʼ maʼ tu tsaʼayal». Kex beyoʼ káaj u líiʼskubaʼob utiaʼal u binoʼob. Knuteʼ ku yaʼalik: «T-konaj k-otoch yéetel utiaʼal maʼ k-sen xuupeʼ, binoʼon kajtal tu yotoch in maama. Tsʼoʼoleʼ utiaʼal k-ilik bix u bin máak táanxel luʼumileʼ, binoʼon áantaj ichil junpʼéel jaʼab tiʼ junpʼéel múuchʼulil inglés yaan tu kaajil Bergen, teʼ kʼiinoʼoboʼ pʼáatoʼon tu yotoch u maama Lisbeth». Maʼ úuch tiʼ leloʼ tu yuʼubaj Knut yéetel Lisbeth jeʼel u páajtal u beetkoʼob le baʼax u chʼaʼtukultmoʼoboʼ, le oʼolal binoʼob tu luʼumil Uganda (Africa). ¿Baʼax ku beetkoʼob utiaʼal u yantal baʼax kʼaʼabéettiʼob yéetel utiaʼal u seguer u beetik u precursoriloʼob? Cada jaʼabeʼ ku suutoʼob meyaj dos meses tu luʼumil Noruega.

¿Bix binik tiʼ le sukuʼunoʼob jach u tsʼaamaj u yóoloʼob kʼaʼaytajaʼ? Roaldeʼ ku yaʼalik: «K-familiaeʼ maas yaʼab tiempo ku múul máansik, maʼ jeʼex le tiaʼanoʼon tu kaajil Bergenoʼ. Bejlaʼeʼ maas maʼalob k-bisikba, yéetel kiʼimak k-óol k-ilik k-paalaleʼ táan u maas meyajtikoʼob Dios». Ku yaʼalik xan: «Bejlaʼeʼ maʼ t-jach chiʼichnaktal wa minaʼantoʼon yaʼab baʼaloʼob, maʼ bakáan jach kʼaʼabéet jeʼex k-tuklik kaʼacheʼ».

 Elsebetheʼ tu yilaj kʼaʼabéet u kanik uláakʼ tʼaan. ¿Baʼaxten? Tumen le tuʼux ku kʼaʼaytaj u múuchʼulil Lakselvoʼ tiaʼan u kaajil Karasjok, tuʼux kajaʼan le samisoʼ. Le máakoʼobaʼ kajaʼanoʼob tu xaman Noruega, Suecia, Finlandia yéetel Rusia. Utiaʼal u béeytal u kʼaʼaytaj Elsebeth tiʼ le samisoʼ joʼopʼ u kanik le tʼaan ku beetkoʼoboʼ, bejlaʼeʼ ku páajtal u wéej tsikbal ichil le tʼaanaʼ. ¿Bix u bintiʼ teʼ tuʼux ku kʼaʼaytajoʼ? Yéetel kiʼimak óolaleʼ, ku yaʼalik: «Kin tsʼáaik seis xookoʼob. ¡Minaʼan uláakʼ tuʼux in kʼáat antal!».

Bejlaʼeʼ Fabianeʼ, táan u beetik u precursoril yéetel siervo ministerial. Letiʼ yéetel Isabeleʼ, tu yáantoʼob óoxtúul máax táan u táankelemtal utiaʼal u maas tsʼáaik u yóoloʼob meyaj teʼ múuchʼuliloʼ. Yoʼolal lelaʼ bejlaʼeʼ tu yóoxtúulal u tsʼaamaj u yóol u meyajtoʼob Dios. Kaʼatúuleʼ tsʼoʼok u yokjaʼob yéetel meyajnajoʼob bey precursor auxiliaril tu mesil marzo tiʼ 2012. Ichil le óoxtúul máaxoʼob tu yáantoʼoboʼ tiaʼan juntúul x-chʼúupal tu tsʼáaj u diosboʼotikil úuchik u yáantaʼal tumen Isabel yéetel Fabian. Fabianeʼ ku yaʼalik: «Le baʼaxoʼob tu yaʼaloʼ kʼuch tin puksiʼikʼal. ¡Jach ku kiʼimaktal u yóol máak ken u yáant u maasil!». Isabeleʼ ku yaʼalik: «Wayeʼ tsʼoʼok in wilik bix u béeychajal le baʼax ku yaʼalik Salmo 34:8: ‹Ilawileʼex bukaʼaj utsil Yuumtsil›». Tu tsʼookeʼ tu yaʼalaj: «Wayeʼ jatsʼuts u yúuchul kʼaʼaytaj».

Marelius yéetel Kesiaeʼ chéen yéetel junpʼíit baʼaloʼob kuxaʼanoʼob, baʼaleʼ kex beyoʼ yaan baʼaxoʼob kiʼimakkúuntik u yóoloʼob; tu múuchʼulil Alta tuʼux binoʼobeʼ bejlaʼeʼ yaan 41 j-kʼaʼaytajoʼobiʼ. Mareliuseʼ ku yaʼalik: «Ken k-tukult bix k-kuxtal kaʼacheʼ ku kiʼimaktal k-óol bix kuxlikoʼon bejlaʼeʼ. K-tsʼáaik u nib óolalil tiʼ Jéeoba ikil u chaʼik k-beetik k-precursoril wayeʼ. Mix baʼal uláakʼ jeʼel u maas kiʼimakkúuntik k-óoleʼ». Kesiaeʼ ku yaʼalik: «Bejlaʼeʼ kin maas kʼubik in wóol tiʼ Jéeoba yéetel letiʼeʼ jach ku kanáantkoʼon. Tin tsʼáaj cuenta xaneʼ in náachtal tiʼ in láakʼoʼobeʼ ku beetik in maas kʼaʼajsik le súutukiloʼob kin máansik tu yéeteloʼoboʼ. Maʼ tu yaatal in wóol úuchik in taal áantaj wayeʼ».

¿Bix u bin tiʼ Knut yéetel tiʼ Lisbeth tu luʼumil Uganda? Knuteʼ ku yaʼalik: «Maʼ séebaʼan suukchajik k-kuxtal jeʼex u kajnáaliloʼob [Ugandaeʼ]. Yaan horaeʼ ku yaatal k-nakʼ, tsʼoʼoleʼ yaan kʼiineʼ minaʼan jaʼ mix corriente, baʼaleʼ t-tsʼáaj tuláakal le xookoʼob k-kʼáateʼ». Lisbetheʼ ku yaʼalik: «Le tuʼux kajaʼanoʼonoʼ tak chéen media hora ka viajarnak máakeʼ ku kʼuchul tiʼ territorioʼob tuʼux mix máak kʼuchuk kʼaʼaytajiʼ. Ken kʼuchkoʼoneʼ k-ilik máakoʼob ku xokikoʼob u bibliaʼob yéetel ku kʼáatkoʼob xook. Maʼ tu páajtal in waʼalik bukaʼaj kiʼimakil k-óol ikil k-kaʼansik le máaxoʼob taak u kaanbaloʼoboʼ».

K-ojel Jesucristo, le máax nuʼuktikoʼonoʼ, jach kiʼimak u yóol u yilik desde teʼ kaʼan, le meyaj tu káajsajoʼ táan u kʼuchul tuláakal tuʼux. Tuláakal le máaxoʼob meyajtik Diosoʼ jach ku kiʼimaktal u yóoloʼob ken u beetoʼob le baʼax tu yaʼalaj Jesusaʼ: «Tiʼ u kajnáaliloʼob tuláakal kaajoʼobeʼ ka a beeteʼexoʼob [disipuloʼob]» (Mat. 28:19, 20).