¿Baʼax ku kaʼansiktoʼon le profetaʼob yoʼolal Diosoʼ?
Úuchjeakileʼ Dioseʼ tu túuxtaj profetaʼob utiaʼal u tsʼáaik u yojéelt le máakoʼob jujunpʼéel baʼaloʼoboʼ. ¿Tu yaʼaloʼob wa baʼax u kʼáat Dios ka k-beet utiaʼal ka u bendecirtoʼon? Jaaj, tu yaʼaloʼob. Koʼoneʼex ilik baʼax jeʼel u páajtal k-kanik tiʼ le baʼax tu yaʼalaj óoxtúul profetaʼoboʼ.
PROFETA ABRAHÁN (IBRAHIM)
Dioseʼ mix máak jelaʼan u paktik yéetel u kʼáat u bendecirt tuláakal máak
Dioseʼ tu yaʼalaj tiʼ profeta Abrahán: «Ta woʼolaleʼ yaan xan in bendecirtik tuláakal le kaajoʼob yanoʼob teʼ luʼumoʼ» (Génesis 12:3).
¿Baʼax ku kaʼansiktoʼon? Ku kaʼansiktoʼoneʼ Dioseʼ u yaabiltmoʼon yéetel taak u bendecirtik tuláakal le xiiboʼob, koʼoleloʼob yéetel le mejen paalaloʼob ku yuʼubikoʼob u tʼaanoʼ.
PROFETA MOISÉS (MUSA)
Dioseʼ jach uts yéetel ku bendecirtik le máaxoʼob ku maas natsʼkubaʼob tiʼ letiʼoʼ
Le Dios jach táaj yaan u poderoʼ tu tsʼáaj tiʼ Moisés u páajtalil u beetik milagroʼob. Kex beyoʼ Moiséseʼ tu kʼáataj tiʼ Dios: «Beet uts a wáantken in wil baʼax uts ta tʼaan, beyoʼ yaan u páajtal in kʼaj óoltikech yéetel maʼ kun xuʼulul in lúubul utsil ta táan» (Éxodo 33:13). Dioseʼ jach maʼalob tu yilil le baʼax kʼáataʼabtiʼoʼ, le oʼolal tu tsʼáaj naʼat tiʼ Moisés yéetel tu kaʼansajtiʼ bix u modos. Moiséseʼ tu kaneʼ Dios, le Máax Beetmil tuláakal baʼaloʼ, «ku chʼaʼik óotsilil yéetel jach uts» (Éxodo 34:6, 7).
¿Baʼax ku kaʼansiktoʼon? Ku kaʼansiktoʼoneʼ kex wa xiiboʼon, koʼoleloʼon wa mejen paalaloʼoneʼ, Dioseʼ yaan u bendecirkoʼon wa k-ilik kʼaj óoltik tubeel. Ichil u Tʼaaneʼ Dioseʼ ku yaʼalik bix u kʼáat ka k-adorarte yéetel ku yaʼalikeʼ u kʼáat u pul u bendición t-óokʼol.
PROFETA JESÚS (ISA)
Jesúseʼ tu chʼaʼaj óotsilil tiʼ u maasil yéetel tu tsʼakaj jejeláas kʼojaʼaniloʼob
Dioseʼ yaan u bendecirkoʼon mantatsʼ wa k-kaanbal tiʼ le baʼaxoʼob tu kaʼansaj yéetel tu beetaj Jesúsoʼ
Ichil u Tʼaan Dioseʼ yaʼab baʼaloʼob jeʼel k-kanik tiʼ Jesús yéetel tiʼ le baʼaxoʼob tu kaʼansoʼ. Dioseʼ tu tsʼáaj poder tiʼ Jesús utiaʼal u tsʼakik le máaxoʼob chʼóopoʼoboʼ, le kóokoʼoboʼ yéetel le móochoʼoboʼ. Tsʼoʼoleʼ tu kaʼa kuxkíintaj xan le kimenoʼoboʼ. Beyoʼ tu yeʼesaj le baʼaloʼob jatsʼutstak ken u beet Dios maʼ tun xáantaloʼ. Jesúseʼ tu yaʼalaj baʼax unaj k-beetik utiaʼal k-ilik le baʼaloʼobaʼ: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).
Jesúseʼ tu chʼaʼaj óotsilil, tu yeʼesaj u yutsil yéetel tu yaabiltaj u maasil. Yaʼab xiiboʼob yéetel koʼoleloʼob jejeláas u edadoʼobeʼ tu yuʼuboʼob le baʼax tu yaʼalaʼ: «Kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal, beyoʼ jeʼel a jeʼelsikabaʼexeʼ» (Mateo 11:29). Tu kʼiiniloʼob Jesúseʼ jujuntúul xiiboʼobeʼ maʼ maʼalob u tratarkoʼob kaʼach le koʼoleloʼoboʼ. Chéen baʼaleʼ Jesúseʼ maʼ bey tu beetiliʼ, letiʼe tu respetartoʼob yéetel tu yeʼesaj u yutsil tiʼob.
¿Baʼax ku kaʼansiktoʼon? Ku kaʼansiktoʼoneʼ Jesúseʼ jach u yaabiltmaj le máakoʼoboʼ yéetel tu yeʼesaj bix unaj k-tratartik u maasil.
JESÚSEʼ MAʼ DIOSIʼ
U Tʼaan Dioseʼ ku yaʼalikeʼ «chéen juntúuliliʼ Dios yaan». Jesúseʼ letiʼe máax tu tsʼáaj ojéeltbil baʼax u kʼáat Diosoʼ (1 Corintios 8:6). Jesúseʼ tu yaʼaleʼ Dioseʼ maas nojoch tiʼ letiʼ, tu yaʼalaj xaneʼ Dios túuxt way Luʼumeʼ (Juan 11:41, 42; 14:28). *
^ xóot’ol 17 Wa taak a wojéeltik u maasil yoʼolal Jesucristoeʼ, ilawil le xook 4 tiʼ le folleto U maʼalob péektsiloʼob Dios yaan teʼ sitio jw.org.
