Wa táan a bin tiʼ junpʼéel lugar tuʼux mix juntéen xiʼikecheʼ, ¿baʼax ka beetik?

1. 1. ¿Ka bin teʼ bej ka tuklik maʼaloboʼ?

2. 2. ¿Ka bin tuʼux ku bin u maasil tumen ka tuklik u kʼaj óoloʼob le bejoʼ?

3. 3. ¿Ka wilik a nuʼuktikaba yéetel junpʼéel mapa, junpʼéel GPS wa ka kʼáatik tiʼ juntúul a amigo u kʼaj óol le bejoʼ?

Wa ka beetik le yáax kaʼapʼéel baʼax t-aʼaloʼ seguro yaan a kʼuchul wa tuʼux, pero maʼ letiʼe tuʼux taak a bin kaʼachoʼ. Chéen baʼaleʼ wa ka beetik le u yóoxpʼéel baʼax t-aʼaloʼ seguro yaan a kʼuchul teʼ tuʼux taak a binoʼ.

Jeʼel u páajtal u keʼetel le kuxtal yéetel junpʼéel viajeeʼ, tuláakloʼon k-kʼáat k-kaxt junpʼéel bej ka u bisoʼon teʼ lugar tuʼux taak k-kʼuchloʼ: leʼ kiʼimak óolaloʼ. Chéen baʼaleʼ, utiaʼal u kiʼimaktal k-óoleʼ kʼaʼabéet k-chʼaʼik maʼalob decisiónoʼob, utiaʼal leloʼ kʼaʼabéettoʼon junpʼéel maʼalob nuʼuktaj.

Yaʼab tiʼ le decisiónoʼob k-chʼaʼikoʼ maʼ jach importanteʼobiʼ, pero yanoʼobeʼ kʼaʼabéet k-tuklik tubeel. Lelaʼ maases yaan yil yéetel baʼaxoʼob jeʼex bix k-nuʼuktik k-kuxtal, le baʼax k-tuklik uts wa kʼaas según bix líiʼsaʼaniloʼonoʼ. Importante ka k-tukult tubeel baʼax ken k-beete tumen jeʼel u beetik u bin utsil wa kʼaasil tiʼ toʼon bey xan tiʼ le máaxoʼob k-yaabiltmoʼ. Yaʼab tiʼ le baʼaxoʼob k-chʼaʼtuklikoʼ yaan yil yéetel le temasaʼ:

• Le sexo yéetel le tsʼoʼokol beeloʼ

• Le meyajoʼ, le taakʼinoʼ yéetel k-beetik baʼax toj

• U líiʼsaʼal le paalaloʼoboʼ

• U biskuba máak yéetel u maasil

Tiʼ le baʼaxoʼob tsʼoʼok k-aʼalikaʼ, ¿bix jeʼel a chʼaʼik maʼalob decisiónoʼob ka u beetoʼob u kiʼimaktal a wóol bey xan a familiaeʼ?

Unaj k-tuklik lelaʼ: «¿Tuʼux ken in kaxt nuʼuktaj utiaʼal in chʼaʼtuklik in beetik baʼax maʼalob?».

Teʼ revistaaʼ yaan a wilik baʼaxten le Bibliaoʼ jeʼel u nuʼuktikech utiaʼal a wilik baʼax maʼalob yéetel a chʼaʼik maʼalob decisiónoʼobeʼ.