Óoliʼ tuláakal máak u yojel baʼax uts yéetel baʼax kʼaas. Por ejemploeʼ jach kʼaas u yilaʼal u kíimsaʼal wa u violartaʼal máak bey xan mejen paalal. Pero jatsʼuts u yilaʼal u yeʼesaʼal yaabilaj, u chʼaʼabal óotsilil yéetel u beetaʼal baʼax maʼalob. Chéen baʼaleʼ, ¿kux túun tiʼ uláakʼ baʼaloʼob yaan u yil yéetel le kuxtal, jeʼex máax yéetel ku múul chital máak, u yaʼalik u jaajil wa bix ken u líiʼsil u paalal? ¿Bix u yilaʼal tumen u maasil? Yaʼabeʼ ku tuklikeʼ jeʼel baʼaxak ka u chʼaʼtukult u beetik máakeʼ maʼalob. Le oʼolaleʼ yaʼab máakoʼobeʼ ku beetkoʼob chéen le baʼax ku tuklikoʼob maʼaloboʼ wa le baʼax ku tuklik u maasiloʼ. ¿Jeʼel wa túun u bin maʼalobil tiʼob ikil u beetkoʼob beyoʼ?

U suukileʼ kéen k-chʼaʼtukult k-beetik wa baʼaxeʼ k-chaʼik u nuʼuktikoʼon k-conciencia. Lelaʼ bey juntúul máax aʼaliktoʼon baʼax maʼalob yéetel baʼax kʼaaseʼ (Romanos 2:​14, 15). Tak juntúul chan paaleʼ jeʼel u tsʼáaik cuenta kʼaas junpʼéel baʼaleʼ, yéetel wa maʼ maʼalob baʼax ku beetkeʼ ku yaatal u yóol. Jeʼex u bin k-nojochtal xaneʼ, ku káajal k-tuukul jeʼex le máaxoʼob yéetel k-bisikbaoʼ: k-familia, k-éet xookoʼob, k-maestroʼob, le máakoʼob tuʼux kajaʼanoʼonoʼ wa k-religión. Le kéen k-beet wa baʼax túuneʼ le concienciaoʼ ku yaʼaliktoʼon wa uts wa kʼaas, según le baʼax k-kaʼansmajtiʼoʼ.

Le concienciaoʼ ku yáantkoʼon utiaʼal k-tsʼáaikba tu lugar u maasil, k-chʼaʼik óotsilil, k-tsʼáaik u graciasil, yéetel k-beetik baʼax toj. Ku yáantkoʼon xan utiaʼal maʼ k-beetik wa baʼax jeʼel u beetik u yaatal u yóol le máaxoʼob k-yaabiltmoʼ, wa ka u beet k-suʼlaktal wa k-chiʼichnaktal.

¿Jeʼel wa u bintoʼon utsil wa chéen k-beetik baʼax k-tuklik maʼalobeʼ? Tu táankelmileʼ, Garrickeʼ tu chʼaʼtuklaj u kuxtal jeʼel bixak u kʼáateʼ. Ka máan kʼiineʼ tu tsʼáaj cuentaeʼ u beetik chéen le baʼax u kʼáatoʼ mix junpʼéel utsil ku taasik tiʼ, tumen «káaj u bisik junpʼéel kʼaakʼas kuxtal, lúub tiʼ núupkʼeban, káaj u usartik drogaʼob, u sen káaltal yéetel u baʼateʼel».

Kex k-chaʼik k-nuʼuktaʼal tumen k-concienciaeʼ yaan kʼiin xaneʼ k-chaʼik nuʼuktaʼal tumen le baʼax ku tuklik u maasil maʼaloboʼ. Lelaʼ ku yáantkoʼon k-kaanbal tiʼ u maasil yéetel tiʼ le baʼaxoʼob tsʼoʼok u máanskoʼoboʼ. Kéen k-beet baʼax ku tuklaʼal maʼalob tumen k-familia, k-amigoʼob wa k-éet kaajaloʼobeʼ k-lúubul utsil tiʼob.

¿Jeʼel wa u bintoʼon utsil wa k-seguertik baʼax ku beetik u maasileʼ? Priscilaeʼ, tu x-lóoʼbayanileʼ suuk kaʼach u beetik xan le baʼax ku beetik u amigoʼoboʼ. Letiʼobeʼ maʼ kʼaas u yilkoʼob u yantal relaciones sexuales tiʼob kex maʼ tsʼokaʼan u beeloʼobiʼ. Pero tu tsʼáaj cuentaeʼ maʼ kiʼimak u yóol ikil u beetik le baʼax ku tuklik u maasil maʼaloboʼ. Letiʼeʼ ku yaʼalik: «In beetik le baʼax ku beetik u maasiloʼ mix junpʼéel utsil tu taasajten, chéen baʼaloʼob kʼaastak tin beetaj. Le oʼolaleʼ binten kʼaasil».

Kéen yanak k-chʼaʼtuklik k-beetik wa baʼaxeʼ maʼ kʼaas ka k-beet baʼax k-tuklikiʼ wa baʼax ku tuklik u maasiliʼ. Pero wa ku suuktal k-beetik beyoʼ, maʼ mantatsʼ kun bintoʼon utsiliʼ. Yaan kʼiineʼ maʼ t-tsʼáaik cuenta wa le baʼax k-chʼaʼtuklik k-beetkoʼ jeʼel u beetik k-muʼyajeʼ wa u muʼyaj u maasileʼ (Proverbios 14:12). Wa le baʼax k-chʼaʼtuklik k-beetik k-ilik maʼalob yéetel bey xan u yilik u maasiloʼ, leloʼ maʼ u kʼáat u yaʼal wa jach tu jaajil beyoʼ. ¡Tumen séeb u kʼexpajal tuláakal! Por ejemploeʼ yaan baʼaloʼob kaʼacheʼ kʼaas u yilaʼal, pero bejlaʼeʼ maʼ beyiʼ hasta normal u yilaʼaloʼob. Yaan xan baʼaloʼob normal u yilaʼaloʼob kaʼacheʼ bejlaʼeʼ kʼaas u yilaʼaloʼob.

¿Baʼax túun jeʼel u yáantkoʼon utiaʼal k-ilik baʼax maʼalob yéetel baʼax kʼaaseʼ? ¿Yaan wa baʼax jeʼel u yáantkoʼon k-chʼaʼ maʼalob decisiónoʼobeʼ?

Yaan, yéetel ku yáantik tuláakal máak kex jeʼel tuʼuxak kajaʼaneʼ. Teʼ xook ku segueroʼ yaan k-ilik máakalmáakiʼ.