Maʼalob decisiónoʼob: Chʼaʼtukult a beetik baʼax maʼalob
Le bix k-nuʼuktik k-kuxtaloʼ jeʼel u beetik u bintoʼon utsil wa kʼaasileʼ. Le oʼolal Jéeobaeʼ u kʼáat ka kuxlakoʼon jeʼex uts tu tʼaaneʼ.
Jéeobaeʼ u kʼáat ka yanaktoʼon kiʼimak óolal yéetel jeetsʼelil.
«Teneʼ Jéeobaen, teen a Dios, teen le máax kaʼansikech utiaʼal u bintech utsiloʼ, teen le máax nuʼuktikech teʼ bej tuʼux unaj a binoʼ. ¡Bukaʼaj maʼalobil wa ka a beet u cuentail le baʼaxoʼob kin waʼalikoʼ! Beyoʼ le jeetsʼelil yaantechoʼ yaan u pʼáatal jeʼex junpʼéel ríoeʼ, yéetel a justiciaeʼ yaan u pʼáatal jeʼex u olasil le kʼáaʼnáaboʼ» (Isaías 48:17, 18).
Jejeláas bix jeʼel k-chʼaʼtuklik k-kuxtaleʼ, pero como Jéeoba beetmiloʼoneʼ u yojel bix maas maʼalob ka kuxlakoʼon. Letiʼeʼ u kʼáat ka k-beet baʼax ku yaʼalik tumen u yojel chéen bey jeʼel u bintoʼon utsiloʼ. Wa k-beetik baʼax ku yaʼaliktoʼoneʼ seguro yaan u bintoʼon maʼalobil, yaan k-chʼaʼik maʼalob decisiónoʼob, yaan u yantaltoʼon jeetsʼelil yéetel kiʼimak óolal.
Jéeobaeʼ maʼ tu kʼáatiktoʼon baʼax maʼ tu páajtal k-beetik.
«Chéen baʼaleʼ le mandamientoʼob táan in tsʼáaiktech bejlaʼoʼ maʼ junpʼéel baʼal jach istikyaj a beetkiʼ mix junpʼéel baʼal jach náach yanil tiʼ techiʼ» (Deuteronomio 30:11).
Maʼ xaaneʼ yaan u kʼaʼabéettal k-kʼexik bix k-tuukul yéetel baʼaxoʼob k-beetik utiaʼal k-kuxtal jeʼex u yaʼalik Dioseʼ. Como letiʼ beetmiloʼoneʼ maʼatech u kʼáatiktoʼon baʼaloʼob difíciltak wa baʼaloʼob u yojel maʼ tu páajtal k-beetik. Kéen k-kʼaj óolt tubeel Dioseʼ k-tsʼáaik cuentaeʼ «le baʼaxoʼob ku yaʼalikoʼ maʼ talam u beetaʼaloʼobiʼ» (1 Juan 5:3).
Jéeobaeʼ u prometermaj u yáantik le máaxoʼob adorarkoʼ.
«Tumen teen, Jéeoba a Dioseʼ, in machmaj a x-noʼoj kʼab, teen aʼaliktech: ‹Maʼ a chʼaʼik saajkil. Teneʼ jach tu jaajil yaan in wáantkech›» (Isaías 41:13).
Jeʼel u béeytal k-kuxtal jeʼex u yaʼalik Dioseʼ tumen letiʼ áantkoʼon. Yéetel le Bibliaoʼ ku nuʼuktikoʼon, ku líiʼsik k-óol yéetel ku tsʼáaiktoʼon esperanza.
U millonesil máakoʼob tiʼ tuláakal yóokʼol kaabeʼ tsʼoʼok u yilkoʼobeʼ ikil u beetkoʼob baʼax ku yaʼalik le Bibliaoʼ tsʼoʼok u maas maʼalobtal bix u kuxtaloʼob. Techeʼ, ¿jeʼel wa a chaʼik u nuʼuktaʼal a kuxtal tumen le Bibliaoʼ? ¿A kʼáat a wojéelt le consejoʼob ku tsʼáaikoʼ? Jeʼel u páajtal a xokik le folleto ¡Disfrutart le kuxtal mantatsʼoʼ! Tiaʼan teʼ sitio jw.org yéetel jeʼel u páajtal a descargartik gratiseʼ. Ku taasik le óoxpʼéel xookoʼobaʼ:
-
«¿Jeʼel wa u yáantkech le Biblia ichil a kuxtaloʼ?»
-
«Le Bibliaoʼ ku tsʼáaiktoʼon esperanza»
-
«¿Ku páajtal wa k-confiar tiʼ le Bibliaoʼ?»
Jeʼex u bin a kaanbal tiʼ le Bibliaoʼ yaan a tsʼáaik cuentaeʼ le consejoʼob ku tsʼáaikoʼ maʼ tu máan de modaiʼ yéetel «mantatsʼ jeʼel u páajtal u kʼubik u yóol máak tiʼ baʼaxoʼob ku yaʼalikeʼ» (Salmos 111:8). U beetaʼal baʼax ku yaʼalik le Bibliaoʼ letiʼe baʼax maas maʼalob jeʼel u páajtal u beetik máak yéetel u kuxtaloʼ. Chéen baʼaleʼ Dioseʼ maʼ tu obligarkoʼon k-adorarte. (Deuteronomio 30:19, 20; Josué 24:15). Cada juntúul máak kʼaʼabéet u chʼaʼik u decisión.
