Jach yaʼab taakʼin ku xuʼupul yoʼolal le guerraʼoboʼ.

•   «Tiʼ tuláakal yóokʼol kaabeʼ tsʼoʼok u xuʼupul 2,2 billones dólares yoʼolal le guerraʼoboʼ» (The Washington Post, 13 tiʼ febrero tiʼ 2024).

 Chéen baʼaleʼ maʼ chéen taakʼin ku xuʼupliʼ. Junpʼéel ejemplo tiʼ leloʼ letiʼe guerra yaan Ucraniaoʼ.

•   Soldadoʼob. Durante le dos años káajak le guerra Ucraniaoʼ tsʼoʼok u kíimil wa u yúuchul loob kex tiʼ 500,000 soldadoʼob.

•   Máakoʼob inocenteʼob. Le Naciones Unidasoʼ ku yaʼalikeʼ tsʼoʼok u kíimil wa u yúuchul loob tiʼ maas tiʼ 28,000 máakoʼob. Juntúul u nojchil le ONU, tu yaʼalaj: «Le bukaʼaj baʼaloʼob tsʼoʼok u causartik le guerraʼoboʼ jach táaj yaʼab, hasta maʼ tu páajtal mix u calculartaʼal». a

 Jach táaj yaʼab máakoʼob táan u sufriroʼob yoʼolal le guerraʼoboʼ bey xan yoʼolal le baʼateloʼob ku yúuchul tiʼ tuláakal yóokʼol kaaboʼ.

•   114 millones. Desde septiembre tiʼ 2023 tak teʼ kʼiinoʼobaʼ letiʼe bukaʼaj máakoʼob tsʼoʼok u pʼatik u yotochoʼob yoʼolal le guerraʼob bey xan yoʼolal le baʼateloʼob táan u yúuchul tiʼ tuláakal yóokʼol kaaboʼ.

•   783 millones. Lelaʼ letiʼe bukaʼaj máakoʼob ku sufriroʼob yoʼolal wiʼijiloʼ. «Le guerraʼoboʼ letiʼe baʼax maas beetik u sufrir máak yoʼolal wiʼijiloʼ. U 70% le máakoʼob ku sufriroʼob yoʼolal wiʼijiloʼ kajaʼanoʼob teʼ tuʼuxoʼob ku yúuchul le guerraʼoboʼ wa teʼ tuʼuxoʼob ku sen úuchul baʼateloʼ» (Programa Mundial de Alimentos).

 ¿Yaan wa u kʼuchul u kʼiinil u xuʼulul le guerraʼoboʼ? ¿Jeʼel wa u yantal jeetsʼelileʼ? ¿Yaan wa u kʼuchul u kʼiinil u yantal tuláakal baʼax kʼaʼabéet tiʼ wíinik yéetel u xuʼulul le wiʼijil yéetel le óotsililoʼ? ¿Baʼax ku yaʼalik le Bibliaoʼ?

 Le Bibliaoʼ u yaʼalmeʼ yaan u yantal guerraʼob yéetel baʼateloʼob jejeláas tuʼux. Hasta ku comparartik yéetel juntúul máak u natʼmaj juntúul chak tsíimin.

•   «Ka túun jóokʼ juntúul tsíimin chak bey kʼáakʼeʼ. Le máax natʼmiloʼ tsʼaʼabtiʼ u páajtalil u luʼsik u jeetsʼelil yóokʼol kaab utiaʼal ka u paklan kíimsuba le máakoʼoboʼ, ka tsʼaʼab junpʼéel nuxiʼ espada tiʼ» (Apocalipsis 6:4).

 Le Bibliaoʼ ku yaʼalik xaneʼ tu paacheʼ tiʼ ku taal uláakʼ kaʼatúul tsíiminoʼobiʼ, leloʼobaʼ ku chíikbeskoʼob wiʼijil yéetel kíimil yoʼolal pakʼbeʼen kʼojaʼaniloʼob wa uláakʼ baʼaloʼob (Apocalipsis 6:5-8). Utiaʼal a wojéeltik u maasil yoʼolal le profecía yéetel baʼaxten k-aʼalik táan u béeytaleʼ, ilawil le xook «¿Máaxoʼob natʼmil le kantúul tsíiminoʼoboʼ?».

 Maʼ kun xáantaleʼ le baʼaxoʼob yaan tiʼ wíinikoʼ maʼ kun meyaj utiaʼal u yantal guerraʼob. Pero lelaʼ maʼ wíinik kun beetkiʼ. Le Bibliaoʼ ku yaʼalik:

•   Dioseʼ yaan u «beetik u xuʼulul u yantal baʼateʼel tiʼ tuláakal yóokʼol kaab» (Salmo 46:9).

•   Dioseʼ yaan u xuʼulsik tiʼ le muʼyajiloʼob ku yantal yoʼolal le guerraʼoboʼ. «Letiʼeʼ yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob» (Apocalipsis 21:4).

•   Maʼ tun xáantaleʼ Dioseʼ yaan u beetik u yantal jeetsʼelil tiʼ tuláakal máak. «In kaajaleʼ yaan u kajtal tuʼux yaan jeetsʼelil, tuʼux mix baʼal jeʼel u beetik u sajaktaleʼ yéetel tuʼux maʼalob utiaʼal u jeʼelskuba» (Isaías 32:18).

 Jeʼex u yeʼesik le profecíaaʼ, le guerraʼob bey xan le uláakʼ baʼaloʼob ku yúuchul teʼ kʼiinoʼobaʼ ku chíikbesikeʼ jach taʼaytak u yantal le jeetsʼelil ku yaʼalik Diosoʼ.

 ¿Bix túun ken u taasil Dios jeetsʼelil? Yaan u beetik yéetel u gobierno wa u Reino yaan teʼ kaʼanoʼ (Mateo 6:10). Utiaʼal a wojéeltik baʼax le Reino yéetel bix ken u yáantil máakeʼ, ilawil le video: ¿Baʼax u Reino Dios?