Jeová aé yepé Deus surí, aé uputari pañhe família upitá surí yuíri. (1 Timóteo 1:11) Aé umuñhãwaá mendarisá. Aé uputari yamendariwaá yariku arama yepé família. Sá yamuñhã kuayé yané família ta usu ta uyusaã puranga asuí ta upitá ta rurí. Cristãoita supíwaá ta usendu governoita lei asuí ta umendari cartório upé ta umurí arama Deus.​—Releri Luka 2:1, 4, 5.

Yepé mendarisá satambikawaá Deus supé añhu yepé apigá yepé kuñhã irum. Aé ti uputari ta uyuxári. (Ebreoita 13:4) Deus ipuxí umaã sá awá umbawa imendarisá irum. (Malaquias 2:16) Ma Deus uxári yepé mira uparawaka sá uputari umbawa imendarisá irum asuí umendari mukuisá, sá imena u ximiriku umuarixí amu irum.​—Releri Mateu 19:3-6, 9.

Jeová uputari mena asuí iximiriku ta uyuajudari. (Gênesis 2:18) Mena urikuté umuñhã mukũi maã: (1) upuraki umeẽ arama ifamília supé ta uprecisariwaá asuí (2) umbué iximiriku asuí itaíraita Deus resé. Yepé apigá usaisuwaá iximiriku umanduari primeiro iximiriku resé. Mena asuí iximiriku ta urikuté ta uyugustari asuí ta uyurespeitari. Puranga píri ta uyuperdoari yepé família uiku arama surí.​—Releri Efezowaraita 4:31, 32; 5:22-25, 33; 1 Pedro 3:7.

Pañhe mendarisá usasá iwasuwaá rupí. Mena asuí iximiriku ta urikuté ta uyusatambika saisusá irum. (1 Korintowaraita 13:4, 5) Bíblia umbeu ti puranga ta uyuxári usasá resewara iwasuwaá rupí.​—Releri 1 Korintowaraita 7:10-13.

Jeová uputari taíraita ta uiku surí. Yawewaá resewara, umeẽ conselho puranga ta supé. Asuí yuíri, Jeová ukuá payaita ta upuderi ta umbué asuí ta uajudari taíraita ta usasá resewara pañhe maã rupí ta vida upé. (Kolosowaraita 3:20) Taíraita ta urikuté ta usendu Jeová yuíri. Ta rurí sá ta umuñhã maã Jeová asuí Jesus ta umbuéwaá.​—Releri 2 Timóteo 2:22; 3:15; Mateu 19:13-15; 21:15, 16.

Taíraita ta uprecisari ropa, timbiú asuí yepé uka mamé ta umurari arama. (1 Timóteo 5:8) Ma payaita ta urikuté ta umbué ta raíraita ta usaisu arama Deus ta uiku arama supí surí. (Deuteronômio 6:4-7) Mayé? (1) Ta usaisu resewara Deus ta uxári ta rangá ta raíraita supé, asuí yuíri (2) Ta usari rupí Bíblia ta umbué arama ta raíraita. Ape ta usu ta uyumbué ta uparawaka maã purangawaá ta vida upé.​—Releri Efezowaraita 6:3, 4.

Importante retana payaita ta umusurí ta raíraita ta umuñhã ramé maã satambikawaá. Amuramé ta urikuté ta umusatambika ta raíraita, ti arama ta usasá siya iwasuwaá rupí. (Provérbios 22:15) Ta umuñhã ramé kuayé payaita ta urikuté ta umaã ta suí ti arama ta umupiaíwa ne ta umusasiara ta raíraita.​—Releri Kolosowaraita 3:21.

Umbeusáita Jeová resé ta uriku siya paperaita Biblía resé ta uajudariwaá payaita asuí taíraita.​—Releri Romawaraita 15:4.