Efezuwaraita 4:1-32
4 Ixe aintaumprezu yaneruixawa resewara, hapurandu penye pekuawa arama puranga kua mundu upe kuaye uputariwaa yawe kua usenuiwaa penye.
2 Peyumukuaira puranga, tepepiaiwa penye, pemuturusu pepia perumuaraita irumu, peaguentari perumuaraita irumu gustarisawa irumu.
3 Pesikari kirimbawa peiku yepewasu Espiritu rese timaarese arama peiku yepewasu.
4 Nyãse yepenyu ipira, yepenyu yuiri kua Espiritu, kuaye usenuiwaa yawe penye yepenyu yasaruwaa yamaa sese penye usenuiwaita.
5 Yepenyute kua yaneruixawa, yepenyute kua yaruyariwaa, yepenyute yuiri kua batizmu.
6 Yepenyute kua Deus, aintapaya ae panye, kua aintaara kiti piriwaa panye, upuraki aintairumu panye, uiku aintapia upe panye.
Uruyariwaita muraki
7 Maa uxari yande arama ipurangasawa yaneyaweyawe kuaye iturususawa yawe kua Kristu uxari yande arama sikuyaraimawaa.
8 Nyãse yawe unyee:
—Uyupiri irumu iwate kiti urasu irumu siya prezu, asui umee ainta supe arama prezenti ukuawasawa kuaita apigawa.
9 Asui umbeu irumu uyupiri umbeu yuiri uwiyeana iwi wira kiti.
10 Kua uwiyewaa aete kua usemuwaa uyupiri iwate kiti panye iwaka umaa umuteresemu panye maantu.
11 Asui aete yuiri uxari yepeyepe apustuluita ainta, asui yepeyepe utitikawaita ainta, asui yepeyepe aintausenui Yurupari sui ainta, asui uxari yepeyepe usaruwaita ainta, asui yepeyepe umbuewaita ainta.
12 Aintaumukaturu arama kuaita uruyariwaita aintaupuraki arama ixupe puranga, uyukiriari arama puranga Kristu ipira.
13 Ate mairame yepewasu yaruyari, yepewasu yakuawa yuiri Deus raira rese, tuyuweana yande puranga sese kuaye Kristu ukuawasawa turusuwaa yawe.
14 Tiarama yaiku kuaye taina yawe, kuaye iwitu upeyuwaa yawe, kuaita uruyariwaita panye mayewaa nyenga, aintauwike aintaugananisawa irumu kuaita apigawa, asui aintaukuawasawa irumu aintauganani ainta aintaumunya arama puxi.
15 Maa yarikute yasikari yamunya kua supiwa yagustarisawa irumu, ape yayukiriari puranga sese kua yaneakanga Kristu.
16 Asui panye ipira kãwera uyuwike puranga uyumuapiriwaa upe, asui aintayaweyawe aintauyumuapiri puranga, asui uyukiriari puranga kua ipira uyukiriari puranga gustarisawa irumu.
Yamanduarisawa purangawaa
17 Yawe hambeu penye arama supiwa yaneruixawa rese tiarama pewata aintayawe kuaita tiwaita judeu aintaumanduarisawa retentuwaa irumu.
18 Pitunawasu aintaumanduariwaa, timaa aintaukuawa kua Deus upakawaa aintauiku resewara tiwaita ukuawa yawe santa resewara aintapia.
19 Pitunawasu aintaumanduariwaa, asui aintauyuxari aintaumunya arama panye aintapuxuwerasawa, aintaugustari aintaumunya panye ikiawaa.
20 Maa penye timaa peyumbue yawewaa rese Kristu irumu.
21 Supiwa rameana pesendu sesewara, aintaumbue rameana penye sese, kua supiwa Jesus rese,
22 Pemusaka pesui pemanduarisawa kuximawara kua peikuwaa sese kuxima, iyukawaa ae nyãse uganani penye pemunya arama puxi.
23 Pempisasua pemanduarisawa.
24 Asui pemundeu perese pemanduarisawa pisasua Deus umunyawaa iyawe purangawaa ikiaimawaa supiwa ae.
Yaxari yanesui puxuwerawa
25 Sesewara pexari pesui panye gananisawa, pepurungita penye peyaweyawe nyenga supiwa irumu perumuaraita supe nyãse yanerumuaraita ainta.
26 Nepiaiwa rame inde teremunya puxi nepiaiwasawa irumu, rexari usasawa nesui nepiaiwasawa senundere kurasi uwike.
27 Tepexari Yurupari supe sendawa arama pepia upe.
28 Tepexari umunda kua mundawasu kuera maa pexari upuraki puranga ipu irumu uriku arama kuri ae uajudari arama kuaita tiwaita uriku.
29 Tepexari nyenga puxuwerawa usemu peyuru sui, anyunte pexari usemu nyenga purangawaa uxariwaa aintauyukiriari kuaye pepurungitawaa yawe, uxari arama purangawaa ainta supe aintapia upe kuaita usenduwaita ae.
30 Tepemusasiyara kua Deus Espiritu kua umusangawawaa penye ixupe kua ara uri kuri yaneruixawa.
31 Pexari pesui apekatu kiti panye irawawaa, panye pepiaiwasawa kutarawaa, panye pepiaiwasawa yuiri, panye uyakawasawa yuiri, panye marandua puxuwerawa, asui panye puxuwerasawa yuiri.
32 Pemunya penye arama puranga, pirasua peyumaa, peperduari peirumu ainta, kuaye Deus uperduariwaa yawe irumu penye Kristu resewara.
