MATÉRIA UYUPIRŨWAÁ KUÁ PAPERA
Pornografia – yawaité u umbaá?
Yané tempo upé aikué siya pornografia asuí siya miraitá ta usikari ta umaã arama aé. a Aikué pornografia filme upé, música upé, papera upé, televisão upé, videogame upé, celular upé, tablet upé, internet upé asuí amú maã upé. Miraitá ta umaã piri pornografia kuá tempo upé asuí siya maã rupí. — Remaã kuá quadro “ Yepeyepé maã pornografia resé”.
Pornografia ti uikú mayé uikuwaá kuera. Yepé umbuesara iserawaá Gail Dines umbeu kuxiíma miraitá ta utií ta umaã ramé pornografia ma uyíyara aintá ti ta umaã aé mayé puxiwerawaá.
Maã remanduári pornografia resé? Será ti aikué problema yamaã ramé pornografia u aé yawaité? Jesus umbeu: “Kua mirá purangawaita aintauxari aintaiya purangawaa, maa kua mirá tenyuntuwaraita aintauxari aintaiya puxuweawa.” (Mateu 7:17) Mayewaá kuá iya pornografia umeẽwaá? Yakuá arama, yasú yamaã yepeyepé resé ta upuranduwaá pornografia resé.
Maã pornografia umuñhã miraita supé?
MAÃ MIRAITÁ TA UKUAWAÁ KUÁ RESÉ TA UMBEU: Pornografia umuñhã miraitá ta upitá viciada, asuí yepeyepé pesquisadoritá asuí terapeutaitá ta umbeu aé mayé yepé droga iserawaá crack.
Yepé apigá iserawaá Brian b upitá kuera viciado pornografia irum internet upé. Aé umbeu: “Ixé ti aconseguiri apituú. Asaã mayé pornografia umundú se resé. Asaã ikiá se manduárisá upé, kuayewaá resewara ixé arirí asuí sasí se akanga. Siya akayú pukusá ayuesforçari retana apituú arama amaã pornografia, ma ti aconseguiri apituú.”
Miraitá ta umaãwaá siya pornografia ti ta ugustari ta uyumuatiri amu miraitá irum, asuí ta umbeu gananisá ta uyumimi arama maã ta umuñhãwaá. Kuá resewara siya ta uyusaã ta pesúa, ta utií, tá upitá sasiára asuí ta piaíwa. Amuramé yepeyepé até ta usikari ta uyuyuká. Sérgio umaãwaá kuera pornografia icelular upé pañhe ara. Aé umbeu: “Ixé amanduári añhũ se resé, ti amanduári maã resé upoderiwaá usasá. Amanduári ti avaleri ne maã, asaã ikiá maã amanduáriwaá, se pesúa asuí sasiára. Ixé asikié asuí atií apurandú arama ajuda.”
Até yepé mira supé umaã pornografia ti ramé uputari, u umaã ramé kutara mirĩntu upitá iwasú retana isesarái arama umaãwaá. Yepé pesquisadora iserawaá Judith Reisman usikari ukuá maã pornografia umuñhã miraitá supé. Aé umbeu: “Mairamé yepé mira umaã pornografia kuá rangaitá upitá iapetuma upé asuí umuñhã yepé memória bioquímica, kuá usasá kutara asuí kuá mira ti upoderi ucontrolari kuá. Maã upitawaá iapetuma upé, iwasú retana isesarái arama, yeyepé miraitá ne mairamé ta uconseguiri ta resarái. Susan urikuwaá 19 akayú umaã kuera pornografia internet upé. Aé umbeu: “Kuá rangaitá upitá se akanga upé. Amuramé ixé amanduári kuá rangaitá resé tiwaá upé aputari. Ti akuá sá yepé ara asú aconseguiri ayuka kuá rangaitá se akanga suí.”
MAÃ YAYUMBUÉ: Pornografia ucontrolari miraitá asuí umuapatuka retana ta vida. — 2 Pedro 2:19.
Maã pornografia umuñhã anamaitá supé?
MAÃ MIRAITÁ TA UKUAWAÁ KUÁ RESÉ TA UMBEU: “Pornografia umbawa mendarisaitá irum asuí anamaitá irum.” — The Porn Trap (A Armadilha da Pornografia), de Wendy e Larry Maltz.
Pornografia umbawa mendarisá asuí anamaitá irum ñhãsé:
Umuñhã yepé mendasará tiã ta uyuputari asuí tiã ta uruyari ta resé. — Provérbiuitá 2:12-17.
Umuñhã kuá mira umanduári añhũ sesé pawaté, ti uyupreocupari maã amuitá ta usaã asuí umuñhã tiã ta uputari imena u iximirikú. — Efezowaraitá 5:28, 29.
Umuñhã kuá mira umanduári sexo yepé jeito puxiwera retana asuí umanduári siya maã ikiá. — 2 Pedro 2:14.
Umuñhã kuá miraitá uforçari imena u iximirikú umuñhã arama maã ikiawaá u yepé maã warixiwaá. — Efezowaraitá 5:3, 4.
Umuñhã yepé mena u yepé ximirikú upisika amú miraitá. — Mateu 5:28.
Biblia umbeu mena asuí ximirikú ti ta upoderi ta uganani. (Malakia 2: 16) Mairamé yepé mena u yepé ximirikú upisika amu miraitá irum, kuá upoderi umuñhã aintá ta uyuxari, umbawa arama mendarisá irum, asuí ta rairaitá ta upurará retana kuá resewara.
Pornografia upoderi umuñhã puxiwera tairaitá supé arama. Brian ukuntari: “Arikú kuera 10 akayú ayumusarai aikú amu tainaitá irum. Ape awasemu yepé papera pornografia resé se paya yara. Ixé ayumimi amaã arama kuá rangaitá asuí ti aconseguiri aintenderi marã agustari amaã ñhã rangaitá. Ixé ti aconseguiri apituú amaã kuá rangaitá. Usasá siya akayú asuí ixé ayukirari, ma ti aconseguiri apituú amaã pornografia.” Ciência umbeu pisasuwaitá ta uyupirũ ta uyupisika pornografia resewara. Aintá ta uyupirũ ta umanduári maã ikiwaá, upitá sexualmente violentos asuí ti ta uconseguiri ta ucontrolari maã ta umanduári asuí ta usaã.
MAÃ YAYUMBUÉ: Pornografia umbawa saisusá irum asuí umuñhã miraitá ta upurará retana. — Provérbiuitá 6:27.
Maã Biblía umbeu pornografia resé?
MAÃ DEUS ÑHEENGA UMBEU: “Ape pexari umanu pesui panye pemanduarisawa kua mundu puraita, panye warixisawa, panye ikiawaa, panye pepira uputariwaa umunya kirimbawa, panye peputarisawa puxuwerawa, panye umuasisawa idulu yawe” — Kolosowaraitá 3:5.
Ape yakuawaté Jeová c umaã ipuxí pornografia, ma aé ti umaã ipuxí uyupisikasá. Jeová umuñhã apigá asuí kuñhã ta upoderi arama ta uviveri yepewasú asuí surí, asuí yuíri ta upoderi arama ta urikú ta rairaitá. — Tiago 1:17.
Mayé yakuá Jeová umaã ipuxí pornografia? Yasú yamaã marã:
Jeová ukuá pornografia upoderi umbawa miraitá irum. — Efezowaraitá 4:17-19.
Jeová usaisú yandé asuí uputari umukaturu yandé pañhe maã puxiwerawaá suí. — Izaía 48:17, 18.
Jeová uputari umuñhakunta mendarisá resé asuí anamaitá resé. — Mateu 19:4-6.
Jeová uputari yaviveri ikiaíma asuí yarespeitari amuitá. — 1 Tesalonikawaraitá 4:3-6.
Jeová uputari yarespeitari yané pira yapoderi arama yameẽ gloria ixupé. — Ebreoitá 13:4.
Jeová ukuá pornografia umukameẽ uyupisikasá mayé yepé maã puxiwera asuí ikiá, asuí umuñhã miraitá ta umanduári añhũ ta resé mayé Yurupari yawé. — Gênesis 6:2; Judas 6, 7.
MAÃ YAYUMBUÉ: Pornografia umuapatuka yané amizade Deus irum — Romawaraitá 1:24.
Ma Jeová umaã pirasúawaá awaitá ta uputari ta upituú ta umaã pornografia. Biblia umbeu Jeová umaã pirasúa yandé asuí urikú paciencia, ñhãsé aé “ukuá mayé umuñhã yandé, ukuá yandé iwí suíwara.” (Salmo 103:8, 14, TNM) Jeová uputari yandé yayumukuaíra asuí yapurandú iajuda, ape ‘aé usú uajudari yandé mairamentu.’ — Ebreoitá 4:16; remaã kuá quadro “ Mayé repoderi remuserana pornografia”.
Siya miraitá ta uconseguiri ta umuserana pornografia Deus ajuda irum. Remaã maã Bíblia umbeu kuá resé: “Yaneruixawa umuyasukana penye, uxari ixupe aramawaita penye uxari penye pekaduimawaita yawe yaneruixawa Jesus Kristo rera rese, sese yuiri kua yaneDeus Espiritu.” (1 Korintowaraitá 6:11) Aintá ta upoderi ta umbeu mayé Paulo yawé “Hapuderi panye maantu irum kua umukirimbawa ixe.” — Filipowaraitá 4:13.
Susan umuserana pornografia. Aé umbeu: “Añhũ Jeová upoderi uajudari indé. Sá repurandú iajuda asuí remuñhã maã aé umbeuwaá, indé resú repoderi repitá ne manduarisá ikiaíma, asuí aé ne mairamé usú uxari indé.”
