Tiagu 1:1-27
1 Ixe Tiagu upurakiwaa Deus supe arama, ixupe yuiri kua yaneruixawa Jesus Kristu, kuekatu penye arama penye duzi tribu aintaumusaĩwaita yanesui apekatu kiti.
2 Semuita, puxuwerawa uri rame pepiri peiku kuri suuri,
3 Nyãse pekuawate pepurara rame sesewara kua peruyariwaa peiku kuri santa inyenga rese.
4 Ape perikute peiku puranga peiku resewara santa inyenga rese, periku arama pemanduarisawa purangawaa supiwa, tiarama maa watari penye arama.
Yapurandu irumu yakuawasawa arama
5 Tirame yepe pesuiwara ukuawa, urikute upurandu Deus irumu kua uxariwaa ainta supe panye kua aintaupuranduwaa irumu, timaa usaisu aintasui ae, asui uxari kuri ixupe ae.
6 Urikute upurandu uruyarisawa irumu, timaa mukuĩ umanduarisawa, nyãse kua mukuĩ umanduarisawa kuaye parana turusuwaa gapenusawa yawe ae, iwitu upeyuwaa yawe ae.
7 Kua apigawa tiupuderi umanduari yaneruixawa uxari ixupe maantu;
8 Nyãse mukuĩ umanduarisawa, yawewarawate utiari umanduarisawa.
Ukanyemuwaita panye
9 Kua yanemu pirasuawaa urikute uyumusuuri sese kua urikuwaa purangawaa.
10 Asui kua rikuwaa urikute uyumusuuri aintaumaa resewara ae yepewasute pirasuawaa irumu, nyãse upawa kuri ae kuaye kapĩ putira yawe.
11 Nyãse kurasi usemu irumu umuturi saku, asui uxirika kua kapĩ, asui uwari iputira, asui ipurangasawa ukanyemu. Yawete yuiri ukanyemu kuri kua rikuwaa uputari rame turusu imaa arama.
Maa suiwarataa pekadu
12 Suuriwaa kuri kua apigawa uaguentariwaa puxi uri rame sese, nyãse uiku rame santa puxi uri rame sese uriku kuri kua kurua upakawaa Deus uxariwaa kuri ainta supe kuaita ugustariwaita ae.
13 Yurupari uputari rame uganani yepe umunya arama puxi, tiupuderi umbeu:
—Deus uganani ixe hamunya arama puxi. Nyãse tiawa upuderi uganani Deus umunya arama puxi, tiyuiri uganani amu umunya arama puxi.
14 Nyãse muiri kuaita miraita Yurupari uputari uganani ainta aintaumunya arama puxi aintauputari irumu aintaumunya kuaye aintapira uputariwaa yawe.
15 Asui aintauputari resewara aintaumunya kuaye aintapira uputariwaa yawe, anyunte aintaumunya aintapuxuwerasawa, asui aintaumunya rireana aintapuxuwerasawa, anyunte manusawa uwari aintarese.
Maa suiwarataa panye purangawaa
16 Tepeyuganani penyepawate penye semuita hagustariwaita.
17 Iwaka suiwara panye kua purangawaa uxariwaa yande arama kua yanepaya uikuwaa murutingawaa upe, kua tiwa upuderi utrukari umanduarisawa nẽ kuaira.
18 Inyenga supiwa irumu uxari tairaita yande uputari resewara yawe, yayupiru arama yaruyari aintasuiwara kuaita umunyawaita.
Maitaa yamanduari Deus puranga
19 Ape penye semuita hagustariwaita, haputari pekuawa puranga kua nyenga. Aintausendu arama kutara panye kuaita apigawaita, tiaintaupurungita arama kutara, tiaintapiaiwa kutara yuiri.
20 Nyãse ipiaiwa kuaita apigawaita tiuxari aintaumunya kuaye Deus uputariwaa yawe.
21 Ape pexari pesui panye ikiawaa, panye puxuwerawa yuiri peyukiriariwaa sese, tiarama pepiaiwa pesuanti kua nyenga upuderiwaa umukaturu penye uyukiriari resewara pepia upe.
22 Pemunya kuaye inyenga umbeuwaa yawe, yawaite maa peruyari retentuwaa, yawaite peyuganani penyepawate.
23 Nyãse kua usenduwaa retentu kua nyenga tiwa umunya ae, iyawe ae kua umaawaa suwa waruwa upe;
24 Nyãse uyumaa aepawa, asui usu isui asui anyunte sesarai isui kua umaawaa.
25 Suuri kuri kua apigawa umanduari kua nyenga purangawaa uyurawawaa yande, kua uikuwaa sese santa, kua tiwa usendu retentu, maa umunya ae kirimbawa.
26 Yepe umanduari rame umanduari Deus, asui timaa upukuari iapeku uyuganani aepawate, retentu umanduari Deus.
27 Yaputari rame yamunya puranga yanepia ikiaimawaa irumu umaa kua yanepaya Deus, yarikute yamanduari kuaita ipayaimawaita, viuvaita yuiri aintaupurara rame yumãsi, yarikute yamukaturu yuiri yanepia ikiaimawaa kua mundu sui.
