AZI’NÉ 9
Atseung-è nguia jou ghô ghaa té nang mé lékak?
1. Lé mèrè mvhô ngomna ghô gheu atseung-è nguia nang mé lékak mela’akô?
Joovah, Ndem lékak, éyi wè ménkeu mbông, A si nkông-ô nguè métseung-è nguia nang mé lékak. (1 Timothée 1:11) Yi mè lé tshiè mèrèti. Mèrèti mvhô ngomna azou té ntseukné azi ghô yè lékak a mbou atseung-è nguia, mela’mi a si ngô kwa’ aji’ zi mè ghô kô’té wônkheu wou, a nteu mbouèné. Mékritèn pôngtè lé zing-è anè mémbeu émi si ntchiitè mèrèti ala’ pôp.—Tông-ô Luc 2:1, 4, 5.
Akwangtè Ndem anè mérèti aziè? A kông nguè gning mbang-a pô ngwi yi fou zôkô nang-a a nteu mbouèné. Joovah kông nguè méloo pô wôngwi wou’tè laanguia zôp, gning-è lé ping sètnzeum a mbou mô’ gning-è. (Hébreux 13:4) A pou té kông nguè mè faknè laanguia. (Malachie 2:16) Téta’, a ghô veung nguè ta’ kritèn faknè laanguia zi afœu’ zi éyi mô’ gheu aghaa.—Tông-ô Matthieu 19:3-6, 9.
2. Gning mbang-a pô ngwi yi pôngtè lé jiô ménèt môp lèkô?
Joovah lé pôô wômbang-a pô wôngwi nguè, pô tôôté ménèt môp a nteu alaanguia. (Genèse 2:18) Pa’ gning mbang-a mè si ngô efô atseung-è nguia la, a pôngtè lé yè akœuè-kœuè zi si nzaka a mbou atseung-è nguia zi mbing nzeung nzi’nè wôp lé zhè Ndem. A pôngtè lé kông-ô ngwi yi té tchii nzeum. Wômbang-a pô wôngwi pôngtè lé kông-né mbing ngou’té ménèt môp. Pa’ nkwa pômbang-a pô wôngwi wè mé lô’ la, ntsi mbông a lé lôk nang mé lékak a nteu atseung-è nguia, é si ngô wôp lé tchoussi méfaa môp.—Tông-ô Éphésiens 4:31, 32; 5:22-25, 33; 1 Pierre 3:7.
3. Tè o pôngtè lé touô laanguia mela’mi o té wou njou’ô mbông-ô?
A ghô yi pè wè ménguengue nteu laanguia zè; pè mépia fa’ méshheu lé tsui nkông-né pô wou’té a tsetsèrè pè. (1 Corinthiens 13:4, 5) Ashoung-nè Ndem teuk épouô épi mèrè nguè, lé touô laanguia a té si ngô éshheu lé lôk ntchoungté ménguengue émi nteu métseung-è nguia.—Tông-ô 1 Corinthiens 7:10-13.
4. Wônkheu, Ndem si nzu’tè akô a mbou pè?
Joovah si nkông-ô nguè pè nang mé lékak. A yè wè nteukné mbông ézi ghô kuitè wè lé ghangté afœu’ zi pè zèè ngwèsso. A si nkông-ô nguè pè jheuè apè anè léghi pô azhènou mémô’ô pè. (Colossiens 3:20) Joovah, éyi mbôô jouô tseum si nkông-ô nguè pè nông-ô ngôkô mbou Yi pô meung yi, pè ghô mé lékak.—Tông-ô Ecclésiaste 11:9–12:1; Matthieu 19:13-15; 21:15, 16.
5. Mémô’ô, pè ghô ghaa tè wônkheu pè ghô mé lékak-é?
Pè pôngtè lé fôk mbœu’ ngôk ndôk nguiè étsoo léjheu, pô nguia mbô ménzhou a mbou wônkheu pè. (1 Timothée 5:8) Pè zeung mbôngtè lé zi’nè wôp lé kông-ô Ndem, mbing mveung mézi’né mi ndôk nkuitè wôp lé ghô mé lékak. (Éphésiens 6:4) Nkông-né zi pè wè mbou Ndem ghô pou mpfeung-è taa nteu wônkheu pè. Ménteukné émi pè fôkô nteu Biible, é ghô koupné mékwangté wônkheu pè anè ntsi mbông.—Tông-ô Deutéronome 6:4-7; Proverbes 22:6.
Wônkheu jou’ô mbông-ô afœu’ zi mè seumtè wôp nzeung ngou’tè wôp. A zeung nzèté nguè mè yè wôp nteukné, mbing mbœu’tè akhou lézing-è zôp. Ntsi jiô mèt lé lôk nkô’tè wôp é kaptè wôp, anè atshuè tépông zi ghô vènè wôp lé ghô mé lékak. (Proverbes 22:15) Mémô’ô té pôngtè lé lôkô azang-a lông pô lébat té mbœu’té wônkheu pôp-ô.—Tông-ô Colossiens 3:21.
Ménjheuè-njiô Joovah wè mékèté tè zaané émi ghô kuité wônkheu pô mémô’ô. Mékèté mouô mèt pou ntsou’né anè Biible.—Tông-ô Psaume 19:7, 11.