Mwakulekangana ni ŵandu, Yesu mkanapagwe pachilambo chapasi ŵatamaga kwinani mpela lilayika. (Yohane 8:23) Jwalakwe jwaliji jwandanda kupanganyidwa ni Mlungu, soni ŵamkamulichisye masengo pakupanganya yakupanganyikwa yosope. Yehofa msyene ŵampanganyisye Yesu, ni ligongo lyakwe akusakolanjikwa kuŵa Mwanache “jumpepe” jwa Mlungu. (Yohane 1:14) Yesu akusakolanjikwasoni kuti “Maloŵe” ligongo lyakuti ŵaŵechetaga m’malo mwa Mlungu.​—Aŵalanje Misyungu 8:22, 23, 30; Akolose 1:15, 16.

Mlungu ŵamtumisye Mwanagwe pachilambo chapasi mwakuwusamisya umi wakwe kwinani nikuwuleka m’chitumbo cha mwali jwachiyuda jwakolanjikwa Maliya. Myoyo Yesu nganakola mtati jwa umundu. (Luka 1:30-35) Yesu ŵayiche pachilambo chapasi (1) kukwiganya usyesyene wakwamba Mlungu, (2) kukupeleka chisyasyo cha mwampaka tutendele yakusasaka Mlungu atamose tuli mkusimana ni yipwetesi, soni (3) kukupeleka umi wakwe ‘pakwawombola’ ŵandu.​—Aŵalanje Mateyu 20:28.

Kumwombola mundu kuli kulipila mbiya kapena chindu chine pakusaka kumgopola mundujo ku yindu yampaka yimtendekasye kuwa. (Ekisodo 21:29, 30) Chiwa ni kukalambala nganichiŵa chakulinga cha Mlungu kwa ŵandu. Ana tukumanyilila yeleyi chamtuli? Mlungu ŵamsalile mundu jwandanda Adamu kuti naga akutenda “ulemwa,”  chachiwa. Sambano yikaŵe kuti Adamu nganalemwa, jwalakwe ngakanawa. (Genesesi 2:16, 17; 5:5) Mwakamulana ni Baibulo, chiwa “chayiche” pachilambo chapasi kupitila mwa Adamu. Myoyo Adamu ŵapelele ŵanache ŵakwe ulemwa soni chiwa chachili malipilo gakwe. Myoyo pakusosekwa kuti jwine atuwombole kuti tugopoche ku chiwa chatwachijigele kwa Adamu.​—Aŵalanje Aloma 5:12; 6:23.

Ana ŵani ŵakatuwombwele ku chiwa? Patuwile, tukusalipilaga malipilo ga ulemwa wetu. Pangali mundu jwalijose jwangali umlama jwampaka akombole kwalipilila ŵane ulemwa wawo.​—Aŵalanje Salimo 49:7-9.

Mwakulekangana ni m’weji, Yesu jwaliji jwamlama. Myoyo nganasosekwa kuwila ulemwa wakwe ligongo jwalakwe nganatenda chakulemwecheka chilichose. Mmalo mwakwe, jwalakwe ŵawilile ulemwa wa ŵandu ŵane. Mlungu ŵalosisye chinonyelo mnope kwa ŵandu mwakumtumisya Mwanagwe kukutuwila. Yesu ŵalosisye chinonyelo kwa m’weji mwakwapikanila Atati ŵakwe, soni kuwupeleka umi wakwe ligongo lya m’weji.​—Aŵalanje Yohane 3:16; Aloma 5:18, 19.

Alolele fidiyo jakuti Ligongo Chichi Yesu Ŵawile?

Paŵaliji pachilambo chapasi, Yesu ŵaposyaga ŵakulwala, ŵajimusyaga ŵawe, soni ŵakulupusyaga ŵandu pangosi syakogoya. Myoyo ŵalosisye yachachitenda msogolo kwa ŵandu ŵakupikanila. (Mateyu 15:30, 31; Yohane 5:28) Yesu paŵawile, Mlungu ŵamjimuchisye ku umi wa usimu. (1 Petulo 3:18) Myoyo Yesu ŵatemi kumkono wamlyo wa Mlungu ni kwembecheyaga kuti Yehofa ampe machili gakulamulila chilambo chosope chapasi mpela Mwenye. (Ahebeli 10:12, 13) Sambano jino Yesu akulamulila mpela Mwenye kwinani soni ŵakumkuya ŵakwe akulalichila ngani syambone pachilambo chosope.​—Aŵalanje Daniele 7:13, 14; Mateyu 24:14.

Pachangakaŵapa, Yesu chachikamulichisya masengo machili gakwe mpela Mwenye pakumasya kulaga kosope soni ŵakusakutendekasya. Wosope ŵakusalosya chikulupi mwakumpikanila Yesu chachikola umi mu paladaiso pachilambo chapasi.​—Aŵalanje Salimo 37:9-​11.