LIJIGANYO 7
Ana Uchimwene wa Mlungu Uli Chichi?
1. Ana Uchimwene wa Mlungu uli chichi?
Ana chichi chachikumtendekasya Yesu kuŵa Mwenye jakuŵajilwa?—MALIKO 1:40-42.
Uchimwene wa Mlungu jili boma jakwinani. Bomaji jichilamulila mmalo mwa maboma gosopega, soni jichitendekasya kuti chakulinga cha Mlungu chitendekwe kwinani soni pachilambo chapasi. Jili ngani jambone kuti Mlungu chachikamulichisya masengo Uchimwene wakwe kutenda yeleyi. Pachangakaŵapa Uchimwene wa Mlungu uchikamuchisya ŵandu kola boma jambone. Uchikamuchisya ŵandu wosope ŵakutama pachilambo kuŵa ŵakamulana.—Aŵalanje Daniele 2:44; Mateyu 6:9, 10; 24:14.
Uchimwene ukusakola mwenye. Yehofa ŵamsagwile Mwanagwe, Yesu Klistu, kuti aŵe Mwenye jwa Uchimwene Wakwe.—Aŵalanje Chiwunukuko 11:15.
Alolele fidiyo jakuti Ana Uchimwene wa Mlungu Uli Chichi?
2. Ligongo chichi Yesu ali Mwenye jakuŵajilwa?
Mwanache jwa Mlungu ali Mwenye jakuŵajilwa ligongo ali jwambone mtima, soni jwakusachilila kutenda yayili yakuŵajilwa. (Mateyu 11:28-30) Jwalakwe akwete machili gakwanila gakwakamuchisya ŵandu ligongo chachilamulila pachilambo chapasi ali kwinani. Paŵajimwiche ku ŵawe, ŵapite kwinani niŵatemi kumkono wamlyo wa Mlungu ni kwembecheyaga. (Ahebeli 10:12, 13) Kaneko Mlungu ŵampele ulamusi kuti atande kulamulila.—Aŵalanje Daniele 7:13, 14.
3. Ana ŵani ŵachachilamulilaga yimpepe ni Yesu?
Likuga lyakolanjikwa kuti “ŵaswela” lichilamulila yimpepe ni Yesu kwinani. (Daniele 7:27) Ŵandu ŵaswela ŵandanda kwasagula, ŵaliji ŵandumetume ŵa Yesu ŵakulupichika. Yehofa aŵele mkusagula achalume ni achakongwe ŵakulupichika mpaka masiku agano kuti aŵe ŵaswela. Mpela Yesu, jemanjaji akusajimukasoni ku ŵawe ni chilu chausimu.—Aŵalanje Yohane 14:1-3; 1 Akolinto 15:42-44.
Ana ŵandu ŵalingwa ŵakwawula kwinani? Yesu ŵakolasile jemanjaji kuŵa ‘kakuga ka ngondolo.’ (Luka 12:32) Kumbesi kwakwe chachikwana 144,000. Chachilamulila chilambo chapasi yalumo ni Yesu.—Aŵalanje Chiwunukuko 14:1.
4. Ana Yesu paŵatandite kulamulila chatendekwe chichi?
Uchimwene wa Mlungu watandite kulamulila mu 1914. * Chindu chandanda chiŵatesile Yesu paŵagambile kuŵa Mwenye chaliji kumponya Satana ni yiŵanda yakwe pachilambo chapasi. Satana ŵatumbile mnope, ni ŵatandite kutendekasya yipwetesi pachilambo chosope chapasi. (Chiwunukuko 12:7-10, 12) Kutandila ndaŵi jelejo, ŵandu aŵele ali mkuyiwona yipwetesi. Ngondo, sala, milili, soni yisichinya, yosopeyi yili mbali ja “chimanyililo” chakuti Uchimwene wa Mlungu usigele panandi kutanda kulamulila pachilambo chapasi.—Aŵalanje Luka 21:7, 10, 11, 31.
5. Ana Uchimwene wa Mlungu ukombwele kutenda chichi?
Kupitila m’masengo gakulalichila ga pachilambo chosope, Uchimwene wa Mlungu ukukombola kukamulanya likuga lyekulungwa lya ŵandu ŵakutyochela m’mitundu josope. Mamiliyoni gejinji ga ŵandu ŵambone mtima akuŵa pasi pa Uchimwene wa Mlungu wakulamuligwa ni Yesu. Uchimwene wa Mlungu uchakulupusya ŵanduŵa pawuchijonangaga chilambo chakusakalachi. Myoyo wosope ŵakusaka kuŵa ni umi Uchimwene wa Mlungu pawuchilamulilaga pachilambo akusosekwa kumpikanila Yesu.—Aŵalanje Chiwunukuko 7:9, 14, 16, 17.
Mu ndaŵi ja yaka 1,000, Uchimwene uchikwanilisya chakulinga chandanda cha Yehofa kwa ŵandu. Paladaiso jichiŵa pachilambo chosope chapasi. Kumbesi kwakwe, Yesu chachiwuchisya Uchimwene kwa Atati ŵakwe. (1 Akolinto 15:24-26) Ana akummanyilila jwalijose jwakusaka ali amsalile ya Uchimwene wa Mlungu?—Aŵalanje Salimo 37:10, 11, 29.
^ ndime 6 Naga akusaka kumanyilila yejinji ya yakulochesya ya m’Baibulo pakwamba ya chaka cha 1914, alole m’buku jakuti Ana Baibulo Jikusatujinganya Yatuli? mapeji 216-219.
